🔸️حلقة 71
🔸️سيلا_تحكي:
حليت الباب و دخلت...هزيت الريدو شوية و عديت عينيا على البيرو متاعي...منعرفش علاش حسيت روحي توحشتو و توحشت كل واحد يعدي عندي بالرسمي ولاو جزء من حياتي و حتى مشاكلهم تعتبر ملجأ ليا...خاطرني نغوص فيها و نعيش وجيعتهم كيما هاذي أول مرة نحس لي أنا بديت من جديد بالحق و أني نستحق فرصة أخرى...و نعيش حياتي كيما اللي تحرمت منها...حتى عيلتي لي قطعتها ولات عندي رغبة باش نشوفهم و نقابلهم من جديد...نحب فرصة تخليني نخرج من دوامة الماضي و نحب روحي أكثر و الأهم إني نربط حبل الوصال لي قطعتو بموت ليث...نعرف لي أنا مانيش باش ننسى بالساهل...أما حبي ليه و وجيعة السنين...مظطرة باش نخبيها في بلاصة بعيدة داخل قلبي و نرضى بالواقع و الحقيقة لي هربت منها...ليث ماهوش موجود و ماهوش باش يرجع مهما حزنت عليه لا الماضي باش يحل أبواب متاعو قدامي و يحضني مرة أخرى و يرجعلي لي خسرتو و لا ذكريات ليث تنجم داويني...يمكن لحق الوقت باش نعيش الحاضر متاعي منعرفش إذا مشاعري لي تحركت من جديد و بعد سنين تخليني نحكي هكا...أما لأول مرة نحس روحي لي أنا نجم نبدا من جديد و من غير ما نخسر روحي أكثر من هكا..فقت من سرحتي على صوت الباب لي تحل..دورت راسي و تبسمت بالوقت قرب مني شوية و حط بوكي الورد في يدي...يحكي
إيهاب:حمد الله على سلامتك
تبسمت و خذيت نفس من الورد لي بين يديا...و غزرتلو نحكي
أنا:عيشك إيهاب
إيهاب:كيفاش تحس في روحك ؟
أنا:أحسن من قبل...و هذا كلو بفضلك أنت
إيهاب:ما عملت شي عزيزتي...كنت نعرف لي إنتي مستحيل تستسلم...خاصة للمرض
عديت عينيا على وجهو و تبسمت...حطيت الورد من يدي و قربت منو شوية نحكي
أنا:شنية تحب تشرب ؟
مد يدو شوية...كبس على يدي و جبدني عندو يحكي
إيهاب:ما نحب حتى شي سيلا...يكفي أنك لباس غير هكا ما يهمني حتى شي آخر
بقيت ساكتة من غير حتى كلمة...عدا صوابعو على خدي و نزل عليا أكثر باش يبوسني...دورت وجهي بالوقت...و جبدت روحي شوية...عدا يدو على وجهو و وخر خطوة لتالي...رجعت شعري لتالي و أنا نغزرلو منعرفش علاش عملت هكا...أما منحبش الحكاية تطور قبل ما نعرف فاش يخمم و لا شنية مصير علاقتنا لي لتوا معندهاش إسم معين...حطيت يدي على رقبتي و خذيت نفس نحكي
أنا:إيهااب...أنا منجمش هكا...نقصد منحبش نضيع معاك أكثر
إيهاب:سيلا أسمعني
أنا:أسمعني أنت...أنا مانيش باش ننكر مشاعري و لي نحس فيه ناحيتك...و على الأغلب أنا وقعت في اللي كنت نهرب منو ديما و عشقتك إيهاب
عدا عينيه على وجهي من غير حتى كلمة...لميت قوتي مرة أخرى و كملت كلامي
أنا:أما منجمش نواصل معاك في ثنية مسدودة...و لا حتى نضيف جرح جديد لقلبي...منحبكش تقرب مني لهدرجة و أنت لتوا معلق بطليقتك
تنهد بالقاوي و قرب مني شوية...عدا يدو على وجهو يحكي
إيهاب:صحيح...مانيش باش ننكر لي أنا متعلق بملاك لتوا...خاطر حياتي الكل كانت تتمحور عليها و عمري ما خممت في أنثى غيرها و لتوا نحمل روحي مسؤولية خسارتها...خاطرني تعبتها معايا برشا و ضريتها طول السنين لي عاشتهم معايا...أما لأول مرة نظن وصلت لآخر الثنية و بديت نتقبل حقيقة أنها ولات ملك راجل آخر
سكت شوية...حسيت بالخنقة متاعو و هو يحكي حتى نعرف أنو مش بالساهل يتعدى المرا لي حبها و بكى عليها طول الشهور لي فاتت...خاصة أنو هو الغالط في حقها و حد ما ينجم يلومها على قرارها خذيت نفس باش نهدي روحي...قرب مني أكثر و حاوط وجهي بيديه زوز و كمل يحكي
إيهاب:كيما لأول مرة نحس لي أنا نجم نبدا من جديد...كلشي نحب عليه يا سيلا...أنك تعاوني...نحب نبرا من الماضي و من ملاك زادة...و نحبها تسامحني على كل لحظة ضريتها فيها باش نجم نسامح روحي نحب على فرصة جديدة معاك إنتي...من غير ما نضرك معايا..نقصد نحب نكون شخص جديد..شخص متوازن...معادش نحب نعيش بقواعد معينة و لا حتى نكون عنيف مرة أخرى...نحب نعيش حياة عادية و كهو
مديت يدي مترددة و حطيتها على خدو...حسيت بضعفو للحظة...كأنو يحاول يستنجد بيا باش ميضيعش أكثر...كيما عملت أنا بالظبط..وقت تمسكت بيه و مستسلمتش...كبست عليه نحكي
أنا:أنت مستعد باش تبرا منها ؟ مستعد تنسى الماضي و متحاولش ترجعلو و الأهم من هكا...إذا إحنا كنا باش نعطيو فرصة لعلاقتنا...نحبك توعدني أنو تفكيرك و قلبك و حبك و حياتك باش يكونو ليا أنا و كهو
عدا عينيه على وجهي و نزل بصوابعو لشفايفي يحكي
إيهاب:خلينا نبداو من توا ملا
أنا:مفهمتكش
إيهاب:نحبك ترجع طبيبتي مرة أخرى...أسمعني و أنصحني كيما كنت تعمل ديما...خليني نضيع فيك و معاك سيلا...أنا بحاجتك معايا و مشاعري ناحيتك صادقة...ساعة لأول مرة نعترف لروحي لأنا عشقت من جديد...رغم النقص لي فيا الكل...أنا منحبش فرصة منك و كهو...نحبك تعاوني و تكون سند ليا كيما باش نكون ليك زادة...خلينا ننقذو بعضنا سيلا
عديت عينيا على وجهو و هزيتلو براسي إيه...تبسم و جبدني عندو أكثر...عنقتو و غمضت عينيا...بيني و بين روحي...نعرف أنو ثنيتنا طويلة و يمكن مش بالساهل ينجم ينساها...أما إستعدادو باش يتبدل على خاطري كافي بالنسبة ليا...الفرصة لي باش نعطيوها لبعضنا...هي ملاذنا الوحيد...أنا منجمش ننكر مشاعري ناحيتو...كيما منجمش نتجاهل لحظات الضعف لي قاعد يمر بيها جراير الماضي...خاطرني نعرفها بالقدا...كبس عليا أكثر و باسني من راسي عديت يديا زوز على ظهرو و تنهدت براحة...حتى اني نحب نعيش معاه اللحظة هاذي من غير ما نخمم في حتى شي آخر.
VOUS LISEZ
صرخة صمت 🌬
Lãng mạn🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
