ကံကြမ္မာဖျက်ဆီးခြင်း ဧကရာဇ်၏ ခရီးလမ်း စာစဉ် (၄၄)
မူရင်းရေးသားသူ - lazySageDao
ဘာသာပြန်သူ - Fortuna(ကြည်ဖြူ) (ရိုးရာ)
အခန်း (၆၀၉) : အသက်ရှည်ခြင်းလမ်းစဉ်ကို ရှာဖွေခြင်း အပိုင်း (၅)
မဟာလုတိုင်းပြည်၏ မင်းဆရာ စံအိမ်အတွင်း ဝမ်ဝေ့က ဆက်လက်ကျင့်ကြံနေသည်။ မဟာလုတိုင်းပြည် နယ်မြေချဲ့ထွင်လာပြီး လူများ၏ ဘဝက ပိုမိုကောင်းမွန်လာသည်နှင့်အမျှ ကျောင်းဆောင်များကို ပိုမိုဆောက်လုပ်ကာ သူ့ဝိညာဉ်ကို သန့်စင်ဖို့ ယုံကြည်မှု စွမ်းအား အများအပြားကို စုစည်းနိုင်ခဲ့သည်။
ဝမ်ဝေ့ ခန်းရုံနှင့် နောက်ဆုံးတွေ့ဆုံစဉ်အခါက ၁၄၃ နှစ်ရှိပြီဖြစ်ကာ နှစ် ၄၀ ကို ရလဒ်အနည်းငယ်ဖြင့် ကုန်ဆုံးခဲ့ရသည်။ ယခု သူက ဖြစ်စဉ် အဆုံးသတ်သွားသည့်အခါ နှစ် ၃၃၀ ရှိနေပြီ ဖြစ်၏။
ထိုအချိန်တွင် သူ့အာရုံကို ဖမ်းစားနိုင်သည့် ပြင်ပလောကမှ ကိစ္စတချို့သာ ရှိလေသည်။ ခန်းရုံ၏ သား ခန်းသဲ့က တစ်ကမ္ဘာလုံးကို စုစည်းနိုင်ခဲ့သည်။ သူ မသေဆုံးခင် သူ့အား လာရောက်တွေ့ဆုံခဲ့၏။ သူက ဝမ်ဝေ့အား တော်ဝင်မိသားစုထံ မသေမျိုးအခွင့်အရေးနောက်တစ်ခု ပေးဖို့ ဆက်လက် တောင်းဆိုချင်သော်လည်း အငြင်းခံလိုက်ရသည်။
ထိုစဉ် ယခင်ကျင့်ကြံဖို့ လက်လျှော့ထားသည့် မင်းသား (၁၃)က နောက်ထပ် အခွင့်အရေးတောင်းဖို့ ရောက်ရှိလာသည်။ သူ့ အသက် ၃၀ အတွင်း ခန္ဓာကိုယ်က အားနည်းလာကာ သေခြင်းတရားကို ကြောက်ရွံ့လာမိ၏။
ထို့ကြောင့် သူက ကျင့်ကြံဖို့ ကြိုးစားလိုက်သည်။ သို့သော် သူ့ခန္ဓာကိုယ်က အိုမင်းနေပြီဖြစ်ကာ နှစ်များစွာ သောက်စားပျော်ပါးနေသည့်အတွက် အခြေခံက အားပျော့နေပြီ ဖြစ်၍ သွေးစွမ်းအားက အားနည်းနေလေပြီ။ ထို့ကြောင့် သူက လေ့ကျင့်သည့်အခါ ယခင်ရလဒ် တစ်ဝက်အတွက် အားစိုက်ထုတ်မှု ဆယ်ဆမက လိုအပ်ပေသည်။
သူ၏ သေဆုံးမှုကို ကြောက်ရွံ့ပြီး သူက ကျောင်းဆောင်ဆီ ပြေးလာကာ မသေမျိုးအစောင့်အရှောက်ဆီ အကူအညီ လာတောင်းလေသည်။ သူက သူ့အဖေ၏ နောက်ဆုံးဆန္ဒကို ဖြည့်ဆည်းပေးဖို့အထိပါ တောင်းဆိုခဲ့၏။ ကံဆိုးစွာဖြင့် ဝမ်ဝေ့က တံခါးကို ဖွင့်မပေးခဲ့ပေ။ သိပ်မကြာခင် သူက ဖျားနာပြီး သေဆုံးသွားခဲ့၏။
