ကံကြမ္မာဖျက်ဆီးခြင်း ဧကရာဇ်၏ ခရီးလမ်း စာစဉ် (၄၅)
မူရင်းရေးသားသူ - lazySageDao
ဘာသာပြန်သူ - Fortuna(ကြည်ဖြူ) (ရိုးရာ)
အခန်း (၆၃၀) ကောင်းကင်လမ်းစဉ် စမ်းသပ်ချက်
အောင်းရှန်က သတိထားရမည်ဖြစ်သည့်အတွက် သတိကြီးသည့် အမျိုးသားတစ်ဦး ဖြစ်သည်။ ထို့ကြောင့် သူက တစ်နေရာတည်းတွင် စုပုံ၍ မပုံအောလိုပေ။ သူက တာအိုကို သက်သေပြဖို့ ကျရှုံးနိုင်ချေအမျိုးမျိုးအတွက် စီစဉ်ထားပြီး သူ့ကိုယ်သူ ထွက်လမ်းချန်ထား၏။
သူ့ပင်ကို သွေးမျိုးဆက်ကို ရှာဖွေပြီးသည့်နောက်တွင် အဖြေကို တွေ့ရှိခဲ့သည်။ ကောင်းကင်လမ်းစဉ် စမ်းသပ်ချက် ဖြစ်၏။ ပင်ကိုသက်ရှိများက ကြီးစဉ်ငယ်လိုက် သဘာဝရှိ၏။ သူတို့မွေးဖွားလာသည့်အဆင့်က သူတို့၏ အဆင့်အတန်းကို ဆုံးဖြတ်ပေးနိုင်သည်။ သူတော်စင်အဆင့် စွမ်းအားဖြင့် မွေးဖွားလာသည့် နဂါးတစ်ကောင်က လေဟာနယ်ဖြိုခွင်ခြင်းအဆင့်ဖြင့် မွေးဖွားလာသည့်သူထက် အဆင့်အတန်း ပိုမိုမြင့်မား၏။
သို့သော်လည်း သူတို့က ကျင့်ကြံကာ တိုးတက်နိုင်သေးသည်။ ထို့အပြင် ပင်ကိုသက်ရှိများက ရှေးဟောင်းစစ်ပွဲအတွင်း ဟော်သဲ့သက်ရှိများနှင့် ရင်ဆိုင်ကာ အသက်ရှင်သန်ဖို့အတွက် ဆင့်ကဲပြောင်းလဲလာကြသည်။ သူတို့အင်အားအတွက် အဓိကအကြောင်းအရင်းက အဆင့် ၉ ပင်ကိုသက်ရှိများကို မဟာဧကရာဇ်များနှင့် လက်ရည်တူဖြစ်သည့် အဆင့် ၁၀ ဝင်ရောက်နိုင်ခွင့်ပြုထားသည့် ကောင်းကင်လမ်းစဉ် စမ်းသပ်ချက် ဖြစ်၏။
စမ်းသပ်ချက်အပြီးတွင် အစစ်အမှန် ကောင်းကင်တာအိုက သူတို့၏ ပင်ကိုစည်းမျဉ်းများကို မဟာဧကရာဇ်၏ မဟာတာအိုအရင်းအမြစ်နှင့် ယှဉ်နိုင်အောင် ကောင်းချီးပေးလိမ့်မည်။ အဆင့် ၁၀ ပင်ကိုသက်ရှိများကို ယွမ်ထီလို့ ခေါ်ပြီး ကြယ်ခြောက်ပွင့်အဖြစ် ခွဲခြားထားသည်။ ကြယ်တစ်ပွင့်က ထာဝရအရှင်အဆင့်နှင့် ညီမျှပြီး ကြယ်နှစ်ပွင့်က တာအိုဘိုးဘေးအဆင့် ဖြစ်ကာ ကြယ်သုံးလုံးကမူ တတိယတန်းစား ဧကရာဇ်ဖြစ်ပြီး ကြယ်ခြောက်ပွင့်က ထာဝရဧကရာဇ်နှင့် ညီမျှ၏။
