🍂 هناك أمل 🍂
🍸 مصادفتك هي الحلم لواقعي وحقيقة لنبض قلبي 🍸
بارت103
عند جمال ملي قطع مع الحاج شاف فسليمان بحزن وأسى، كيشوف صاحبو لي كان ديما قوي اليوم تكسرو جناحو ماحيلتو للخدمة ومشاكلها ماحيلتو لمراتو لي بين الحياة والموت.
تقرب منو وتحنى لعندو شدو من كتفو زعزعو لا على وعسى إفيق من الصدمة لي دخل فيها .
جمال( بحنية): خويا سليمان دبا ماشي وقت الصدمة ، خصك توقف وتواجه مشاكلك كيف كانعرفك، يالاه أصاحبي توگد مراتك كتسناك .
سليمان ( هاديك الجملة الأخيرة لي فيقاتو شاف فيه بحزن وقال ): دارت كسيدة وأنا بعيد عليها ، تلقاها عيطات عليا وماسمعتهاش محتجاني ومالقاتنيش أشنو خصني ندير دابا تلفات بيا الدنيا أخويا تلفات بيا ( شاف قدامو بعيون لامعة) غاتكون تألمات وتقسحات بزاف، غاتكون بكات وهي أصلا بكاية ، خليتها بوحدها ، تعذبات بوحدها .
جمال( كيزعزعو وكيدوي بصرامة): بركة فيق أصاحبي ونوض تمشي عند مراتك هاد الهضرة مغاتنفع بوالو ، يالاه نوض تگعد نمشيو نلقاو الحل نمشيو من هنا يالاه.
نوضو جمال من تماك وداه لجردة متواجدة تماك جاب ليه قرعة الماء و بقا معاه كايحاول إخرجو من ديك الصدمة لي دخل فيها.
جمال( جبد تيلي): غانشوف داك البوليسي إلقا لينا شي حل باش نرجعو للمغرب.
سليمان ( كيخرج الهضرة بزز): زعمة غادي إلقا لينا شي حل ؟
جمال( شاف فيه ): غانشوف على الله ، بما أن نتا بريئ والأدلة كاينين فعلاش غايشدوك ، شوف صوني للدراري لي معاك باش إلى رجعنا إبقاو هما مقابلين هنا .
سليمان ( جبد تيلي): عندك الحق ( من بعد ما جاوبو) نبغيك تكون عندي دبا فينما كنتي مفهوم ، يالاه كنتسناك .
جمال: هاهو كيصوني ، شنو گال ليك ، جايين( حرك ليه سليمان راسو بالإيجاب).
من بعد ماكمل جمال الإتصال وجاو عندهوم دراري لي مع سليمان، كلفهوم أنهم إبقاو فالمگازة ديال سليمان مايفرقوهاش ، وهو وسليمان توجهو مرة أخرى للمخفر إلقاو حل للمشكل.
بعد 6 ساعات من الطلوع والهبوط وأخيرا خرجو ليه تصريح للسفر وأنه ماشي مذنب خصوصا بعد إعتراف المساعد ديالو والأدلة ماشي ضدو ولكن خدمتو فتركيا غادي توقف حاليا حتى تسد القضية عاد إستأنف عملو .
بعد إنتهاء الإجراءات قصدو المطار ديريكت أول طيارة ركبو فيها وهو متمني إلقا خبار زينة ومراتو على خير لكن تمشي الرياح بما لا تشتهي السفن.
وأخيرا وصلو للمغرب بعد خوروجهم من المطار ستاقلو سيارة جمال لي خلاوها تماك قبل .
سليمان ( مع الحاج فتيلي بصوت تعبان): السلام عليكم الحاج ، أشمن كنينيك فاش كاينة.
الحاج( أكثر منو): كنينيك ........ فاش كاينين أولدي ، وصلتي ياك .
سليمان ( كيحك عنقو من شدة التعب): أه وصلنا يالاه خرجنا من المطار ، مسافة الطريق غانكون عندكوم.
الحاج: الله إجيبك على خير أولدي .
من بعد ماقطع على الحاج شدو طريق الكنينيك وهو متأمل أنه إلقاها فصحة جيدة ماسولش الحاج على حالها كأنه خايف إدمر ليه داك الأمل و حتى الحاج مگال ليه والو خلاه حتى يوصل وعرف.
أنت تقرأ
هناك أمل 🍸مكتملة🍸
ChickLitقصة بالدارجة المغربية، تحمل من كل فن طرب : اليتم،الحب،الرومانسية،العائلة،الكراهية،الحسد،الحقد،معنى الصداقة،محبة الدين،الجانب الديني،الواقع المغربي. قصة يتيمة كبرات فداخل الميتم وملي وصل وقت خروجها منو غاتواجهوم بزاف ديال المصاعب فياترى غاتقدر تج...
