🍂 هناك أمل 🍂
🍸 مصادفتك هي الحلم لواقعي وحقيقة لنبض قلبي 🍸
بارت142
تقرب لعندها وگلس حداها فوق الفراش وبدا كيفيقها بالشوية وهي مكايناش هنا .
سليمان ( بشوية): حسناء ، حسناء فيقي بركة عليك ( كيحركها) يالاه فيقي بركة من النعاس ليل هذا ونتي باقة ناعسة يالاه ( مابغاتش تفيق وهو إبدا كيحركها مزيان) حسناء يالاه فيقي بركة من الخميرة ، يالاه حسناء.
حسناء ( بدات كتحرك فبلاصتها قالت بنبرة ناعسة): خليني نعس ، حرام عليك.
سليمان: كيفاش حرام عليا ، يالاه بركة نعستي نهار كامل يالاه فيقي .
حسناء ( حلات عويناتها بالزز وهي معصبة وقالت بعصبية): أوووووف حتى نعاس منعسوش براحتي أووووف.
سليمان ( شاف فيها بتغوبيشة هي لي كتنفخ): مالك دبا ، فيقتك باش تنوضي أولا صلاتك ماصليتيهاش ، ثانيا ليل هذا وغاتمرضي .
حسناء ( معصبة وهي كتخرج من الفراش): ماگلت ليك والو دبا أووووف .
سليمان ( تبع ليها عينيه كيشرح تحركاتها): مالك نتي هاد النهار معجبتينيش .
حسناء ( دارت لعندو وقالت بعصبية): مامالي والو ، واااه غي ندوي تگول ليا مالك .
سليمان ( ناض لعندها وقال بصرامة): أول حاجة يديك وصوتك ماتهزيهومش عليا ، ثاني حاجة گولي مالك عندك شي مشكل نفكوه ، معاجباك شي حاجة نقادو أما هاد الدخول والخروج فالهضرة معنديش معاه جيني نيشان.
حسناء( غادية للدوش ): مامالي والو .
هادشي لي گالت ودخلات للدوش خلاتو كيتحسبن عليها وكيفكر فهاد التغير لي بها مشا خرج للبالكو وهو كينعل الشيطان وكيستغفر الله ، أما هي بمجرد مادخلات للدوش حسات ثاني بديك الدوخة بقات مسندة على لافابو حتى دازتها عاد مشات قضات حاجتها وتوضات خرجات دورات عينيها فالبيت وبان ليها واقف فالبالكو بقات كتشوف فيه وهي كتفكر علاش تقلقات ودوات معاه بديك الطريقة تعجبات من راسها من بعد قصدات دريسينج حتى صلات اوقاتها عاد هبطات ديريكت للأسفل وخلاتو باقي فالبالكون ، بقا هو مدة تماك كيفكر وكيخمم فحالتها حتى تفكر نهار فاش ضربات كاميليا وخرجات من الدار ، داكشي علاش دخل ديريكت للغرفة كيقلب على دواها قلب البيت كامل مالقاهش وتوجه للكوافوز لي حدا راسها قلبو مافيه والو وقلب المجر لي فيه حتى هو والو عاد داز للباب التحتاني حلو وهو إلقا فيه الساشية كيف شراها ليها حلها وقلبو ولقا الدواء كيف جابو باقي مشربات منو ولو حبة .
دبا عاد فهم منين جاتها هاد العصبية والسهو والقلق أعصابو بداو كيطلعو وهو كيتفكر شحال من مرة كذبات عليه بلي شرباتو أسبوع على قدو وهي كتكذب عليه وهو تايقها بغا غي إعرف علاش حبسات دواها ، وداكشي لي كان هز ديك الساشية وتم هابط للأسفل كيقلب عليها وهو معصب وكشاكشو خارجين وهو كيعيط عليها .
أنت تقرأ
هناك أمل 🍸مكتملة🍸
ChickLitقصة بالدارجة المغربية، تحمل من كل فن طرب : اليتم،الحب،الرومانسية،العائلة،الكراهية،الحسد،الحقد،معنى الصداقة،محبة الدين،الجانب الديني،الواقع المغربي. قصة يتيمة كبرات فداخل الميتم وملي وصل وقت خروجها منو غاتواجهوم بزاف ديال المصاعب فياترى غاتقدر تج...
