🍂 هناك أمل 🍂
🍸 مصادفتك هي الحلم لواقعي وحقيقة لنبض قلبي 🍸
بارت147
خارجة من الدوش ببينوارها الأبيض وفوطة على شعرها المبلول ، حنيكاتها ملونين باللون الأحمر مزنگين بسباب الدوش كريشتها المنفوخة باين من البينوار حاطة عليها يدها ويدها الثانية شادة بها جنبها ، خارجة وهي كتنهج وكتصوط .
توجهات لدريسينج جبدات مستحضراتها وبدات كتدهن ليديها ورجليها ، ودهنات لكريشتها زيت اللوز باش إتحيدو الخطوط ومايبقاوش بعد الولادة ، مسالات حتى غفر ليها الله الذنوب مسكينة . عاد جبدات دوبياس فالأسود و بيجامة فالأخضر مغلوق سخونة مع بينوارها طويل عندو قب بودينات مع فولارها الأسود وتقيشرات فنفس اللون، لبسات حويجاتها وهي كتنهج وجمعات الدنيا وقصدات فراشها مسندة ترتاح شوية .
هاد الأشهر الأخيرة ولات كاتعيا بزاف وحتى الكريشة عندها كبيرة هي من النوع لي كيكرشو فالحمالة ، أما الوحم باقي كايلعب بها حدها الدار الخروج بوحدها مكاينش كتخرج مع سليمان ولا نزهة وليلى وبعض المرات كاتمشي مع الحاج لجنب البحر .
بنتها وجدات ليها كولشي بيتها القديم لي قدات ليها وزوقاتو على ذوقها ، عمراتو ليها بالألعاب والحوايج ، كل مرة واحد فيهوم جاب شي حاجة ماشي غي هي كلهم مشوقين وكايتقداو للبنيتة الحفيدة لولة ، وحسناء دايرين ليها كي الماء القليل يديها مكاتحطهومش فالماء لي بغات كاتجي حتى لعندها معيشينها أميرة زمانها فالدار .
جبدات تيلي صيفطات ميساج لسليمان كاتوصيه كيف ديما على شي حاجة مشهياها إيجيبها ليها معاه وهو مكان عليه غي إگول واخا ويجيبها وهاد المرة مشهية الشوارمة والفريت ، عاد دوزات لبسمة تجمع معاها ثاني تسنات لثواني حتى جاوباتها .
حسناء ( بإبتسامة): على سلامتنا ياختي ، وفين سدو عليك غبرتي عليا.
بسمة( بضحكة): إوا يالالة أنا دابا مزوجة إلى غبرت راني مع قرة عيني .
حسناء( ضحكات حتى تسدو عويناتها): لاواه لاواه مزال مدرتو العرس أش غاديري عندو .
بسمة( بطنز): إكويني ياختي بغيتي تكواي بوحدك ، وأصلا العرس قريب مابقا ليه والو ، أه عنداك تبلزي ليا ديك شنيولة فالعرس .
حسناء ( قتلاتها بالضحك حتى سالو دموعها): ونااااااااااري عليك ياختي على هضور فيك ، ( كدوز يدها على كرشتها) خلي عليك بنوتي أنا وقتما بغات تجي تجي ياك أبنتي أمممم جاوبي خالتو المسيميمة .
بقاو على داك الحال مجمعين مقشبين وضاحكين مع بعضياتهم حتى أذن المغرب عاد قطعات معاها وناضت للدريسينج جبدات عبايتها لبساتها وقصدات سجادة الصلاة ، صلات صلاتها وتبعاتها الباقيات عاد أية الكرسي والدعاء لي مولفة.
أنت تقرأ
هناك أمل 🍸مكتملة🍸
ChickLitقصة بالدارجة المغربية، تحمل من كل فن طرب : اليتم،الحب،الرومانسية،العائلة،الكراهية،الحسد،الحقد،معنى الصداقة،محبة الدين،الجانب الديني،الواقع المغربي. قصة يتيمة كبرات فداخل الميتم وملي وصل وقت خروجها منو غاتواجهوم بزاف ديال المصاعب فياترى غاتقدر تج...
