🍂 هناك أمل 🍂
🍸 مصادفتك هي الحلم لواقعي وحقيقة لنبض قلبي 🍸
بارت151
♠فلاش باك ♠
وسط سكون الليل كيتسمع صوت الماء والماعن فالكوزينة لي جاي منها شعاع الضوء وسط ضلام لي كايكتاسي المنزل ، كولشي ناعس ماهو منتصف الليل هذا ، الناس كاينعسو وكايشبعو نعاس فهاد الوقت .
إلا هي لي كاينة وسط ديك الكوزينة لابسة كسيوة سوداء راشية كلها ثقابي وزيف بالي على راسها مغطي شعرها الأسود وصندالة الميكا كبيرة عليها ، واقفة فوق كرسي خشبي باش توصل البوطاجي لي كان عالي عليها .
كتغسل المواعن لي كانو كثار فهاد الوقت من الليل ، بدياتها الصغار لي ولاو حمرين وطايبين بجافيل ، كاتسناها تستيفة ديال المواعن لي ثقال عليها وكلهم إيدام كل ماشافت فيهوم كايزيدو عويناتها يدمعو وبزز كتحبس شهقاتها الصغار مايخرجوش وهي خايفة ترجع مرت عمها وتلقاها مزال مسالات حيت نبهاتها إلا مكملاتهومش وسيقات الكوزينة غاتعطيها قتلة الكلاب و هي عيات من الضرب والعنف بغاتها غي شي نهار لي ترحمها فيه وداك النهار مابغا إيجي .
بقات تماك مدة طويلة وهي خدامة كملات دوك الماعن ودوزات التسييقة على الكوزينة وهي كتنهج وكلها عروگات ، عويناتها تنفخو بالبكاء ولاو حمرين وطايبين وقاتلها نعاس بزز كاتحلهم ماكملات حتى غفر ليها الله الذنوب .
عاد طفات الضوء وتوجهات لخارج المطبخ طلعات عويناتها مع الدروج وهي تفكر بيتها لي مولفة تنعس فيه دغيا عمرو عويناتها ثاني كأنهم كايستعدو إبداو شوط ثاني من البكاء ، جمعات فمها الصغيور وعضات على شفتها السفلية كتحبس الشهقة تخرج ، عاد قصدات الدروج لي كايدي للأسفل هبطات معاه وقلبها كيقفز بالخلعة بزز منها هابطة وهي كدور عويناتها ويديها كيترعدو مكاتحملش هاد البلاصة وكاتخاف فيها بزاف حيت مضلمة وجات فالأسفل ولكن بزز منها دبا ولات غرفتها هنا ولا نقدر نگول سجنها .
مرت عمها خرجاتها من بيتها ودخلات ليه بنتها هي وحسناء هبطاتها تنعس فلاكاب ، دخلات للغرفة ديالها لي فيها شرجم صغيور بعيد عليها ماتقدرش توصلو وحصيرة نصها مقطع وموسخة هي فراشها وغطاها ، نعسات فبلاصتها وتكورات فيها على وضعية الجنين معنقة رجيلاتها عندها وعاد سمحات لدميعاتها إلقاو حريتهم وهي كتفكر حياتها كيفاش كانت قبل شهر وكيف ولات دبا تفكرات واليديها وزادت فبكاءها ، جدران داك البيت لي كانو رفقاءها فإكتئابها وحزنها لي كتعيشو طفلة فعمر أربع سنوات .
حسناء ( ببكاء وشهقات كايحبسوها): ماما بابا ( سكتات شوية وكملات) توحستكم بزاف علاس مسيتو وخليتوني علاس ( كاتزيد فبكاءها ) خليتوني مع عمو وخالثو هما كيدلبوني بزاف ( بألم وحزن) كايسويوني بالقطبان مكايخليونيس ناكل ودبا فيا زوع ( ببكاء) علاس ماديتونيس معاكوم علاس ، علاس حتى أنا مانموتس .
أنت تقرأ
هناك أمل 🍸مكتملة🍸
ChickLitقصة بالدارجة المغربية، تحمل من كل فن طرب : اليتم،الحب،الرومانسية،العائلة،الكراهية،الحسد،الحقد،معنى الصداقة،محبة الدين،الجانب الديني،الواقع المغربي. قصة يتيمة كبرات فداخل الميتم وملي وصل وقت خروجها منو غاتواجهوم بزاف ديال المصاعب فياترى غاتقدر تج...
