🍂 هناك أمل 🍂
🍸 مصادفتك هي الحلم لواقعي وحقيقة لنبض قلبي 🍸
بارت125
داخلة للغرفة بإبتسامتها البشوشة وهي لابسة عباية فالگرونة جات مع فصالتها ومعاها فولار فالأسود ، كاتبان أصغر من عمرها ولما لا وهي مهلية فراسها ، تزادت إبتسامتها فور مالقات حسناء كتصلي فبقات فمكانها حتى كملات صلاتها عاد قربات عندها بإبتسامتها المعهودة.
عند حسناء لي كانت گالسة فوق سريرها وهي لابسة عباية الصلاة مع تقيشرات فالأبيض ، گالسة مقابلة مع القبلة متخشعة فصلاتها ، كتصلي وهي گالسة حيت مزال مكتقدر توقف بشكل كولي ولا تبقى وقفة لمدة طويلة .
ملي دخلات ليلى سمعات الباب وعرفات بلي دخل شي حد ولكن مانتبهاتش ومعطاتش للأمر أهمية فوقت الصلاة كتنسى كولشي ، داكشي علاش بقات حتى كملات صلاتها ودعات دعاءها عاد دارت لجهة الباب ولقات ليلى فتسللات إبتسامة مشرقة لوجهها البشوش .
حسناء ( بإبتسامة): خالتو ليلى توحشتك فين غبرتي عليا؟
ليلى( لي تقربات منها وعنقاتها لعندها بإبتسامة): الله إقبل أحبيبتي ، حتى أنا توحشتك ولكن راك عارفة البارح مقدرتش نجي ( ضرباتها بلطف لأرنبة أنفها) وراه الباب ليل كامل وحنا أبيل فيديو نسيتي.
حسناء ( ضاحكة): لا منسيتش ولكن بغيتك تجي عندي.
ليلى ( بضحكة شادة ليها حنيكاتها): يافرحي ياسعدي ببنتي كتوحشني وشكون بحالي( باستها فحنكها وقالت) جبت ليك معايا واحد المفاجئة متأكدة غاتعجب أممممم.
حسناء ( بتساؤل وحماس): أشنو هي عفاك عفاك .
ليلى( بإبتسامة): بغيتي تشوفيها ؟( حركات حسناء راسها إيجابا لعدة مرات فشافت ليلى لجهة الباب وقالت بصوت عالي بعض الشيء باش إسمعوها) دخلو .
فحسناء تبعات ليها نضرها جهة الباب فإذا بهم دخلو مجموعين فور مشافتهم بحركة لا إيرادية حطات يدها على فمها لي حلاتو من كثرة الصدمة وعيويناتها دغيا عمرو تاني بالدموع .
هما لي دخلو بإبتسامة وخجل مالي وجوههم ولكن فور ماشافو حسناء ، مشاو كيجريو لجهتها وطاحو عليها معنقينها عاد فاقت من صدمتها وبدات كاتبكي وكتشهق وهي معنقاهم وكتسمع لهضرتهوم .
البنت1:ختي حسناء توحشناك بزاااااااف .
البنت2: الله حتى توحشناك وخليتي بلاصتك .
البنت3:وصافي البنات بعدو غادي نخنقوها .
بعدو منها وگلسو حداها وبقا غي ديك البخوشة الصغيرة فيهم لي باقة معنقاها وكل وحدة منين كتدوي بحماس كيسولو فيها وعاودو وهي غي كتشوف فيهم مخلطين ليها الدموع مع الضحكة فرحانة بهم بزاف وتحشاتهم .
أنت تقرأ
هناك أمل 🍸مكتملة🍸
Chick-Litقصة بالدارجة المغربية، تحمل من كل فن طرب : اليتم،الحب،الرومانسية،العائلة،الكراهية،الحسد،الحقد،معنى الصداقة،محبة الدين،الجانب الديني،الواقع المغربي. قصة يتيمة كبرات فداخل الميتم وملي وصل وقت خروجها منو غاتواجهوم بزاف ديال المصاعب فياترى غاتقدر تج...
