🍂 هناك أمل 🍂
🍸 مصادفتك هي الحلم لواقعي وحقيقة لنبض قلبي 🍸
بارت134
سليمان ( كيدوز يدو على وجهها ): حسناء ، حسناء ، يالاه فيقي بركة عليك أبنتي فيقي .
حسناء ( لي بدات كتحرك فبلاصتها قالت بثوت نعسان): عفاك غي شوية باقي ، فيا النعاس.
سليمان ( جبدها حتى تقابل وجهها مع وجههو وبدا كيبوسها وكيفيقها): يالاه الله إرضي عليك أبنتي ، فيقي نمشيو نتغداو ، حتى الصلاة باقي ماصلينا يالاه بركة ، قرب المغرب فيقي.
حسناء ( حلات عينيها نص حلة ): واش وصل المغرب؟( حرك راسو بإيجاب) أي نعسنا بزاف .
سليمان ( باسها على فمها بوسة الغدايد وناض للدوش): يالاه ملي نعسنا بزاف نوضي من تم .
حسناء ( من بعد مادخل للدوش حطات يدها على فمها): أي غي كيدور كيبوس فيا حشومة( خرجات ليها الضحكة وقالت بهمس ) أشمن حشومة راه راجلي يالالة ويالالة وبصحتي يالاه .
هو لي توضى وخرج قاصد صلاتو حتى صلا لي فاتو عاد ناض ومشا بدل حوايجو بشوميز فالأسود مخلي الصدايف لولين محلولين وطاوي الكمام مع بوكسور أسود لتحت وفوقو سروال فصالة فنفس اللون مكحلها ثاني ، وهي لي يالاه خرجات من الدوش من بعد ماتوضات ولقاتو لابس شافت فيه بإستغراب ، توجه عندها وحتاها عليها بواحد البوسة بجق ليها دوك الشنايف .
سليمان ( بخفوت): سيري صلي وبدلي عليك نتغداو على برا صافي .
حسناء ( مدوخة بالبوسة وقالت بخفوت): واخا نصلي ونلبس .
داكشي لي كان صلات صلاتها وعاد قصدات حوايجها جبدات جلابة كريب بالراندة فالبنفسجي مفتوح مع فولارها فنفس اللون وبلغتها حتى هي معاهوم صاك صغير وخاتم زواجها لي مبقاش كيخطاها فيدها ، لبسات حوايجها عاد مشات عندو هو لي شافها وسطاتو ثاني شد فيدها وباسها عاد تمو خارجين ، هبطو للريسطو داخل الفندق تغداو فيه مزيان عاد خرجو مشاو لجهة البحر دارو فيها شوية فداك الجو البارد وغروب الشمس يا سلام ، دخلو لكافي فجنب البحر وشد هو قهيوتو كيف العادة قاسحة كيجغم منها وهي شدات گلاص شوكولا مخلط بالفريز .
بقاو حتى دارو مزيان ونشطو مع ريوسهم صلاو المغرب فالمسجد عاد قصدو بيتزيريا تشهات حسناء بيتزا ، تعشاو عاد رجعو للفندق طلعو للجناح ديالهم دخل سليمان دوش هو لول عاد دخلات هي ، شوية سمعاتو دق عليها الباب حلات ليه وعطاها عباءة فالأبيض مع فولارها .
سليمان ( قدهوم ليها وقال): لبسي هادو ودوزي نصليو بزوج صافي .
حسناء ( بإبتسامة وخجل): واخا نكمل ونخرج .
رجعات للدوش ، دوشات ونقات حالتها من العرق ودهنات لحمها بكريماتها حتى ولا لحمها كيزلق عاد لبسات دوبياس فالأحمر وفوقهم شوميز دونوي فالأبيض طويلة شوية ولكن محلولة من الجنب وكلها مشبكة لحمها كامل كايبان عاد دارت عليها بينوارها لي غطاها ولبسات رشات ريحتها وهزات الكحل البلدي كحلات به عويناتها كيف علماتها ليلى دير ليه جاها فن فعينيها ودوزات تدويزة خفيفة على فمها من العكر وعاد تبعاتو بگلوص الخوخ ريحتو زوينة عاد لبسات عليهوم ديك العباءة وقدات فولارها مع تقيشرات فالأبيض ، شافت راسها فالمراية عجبها راسها ولكن حشمات تخرج عندو هكا مقادة وفركسة وزيد عليها الشوميز لي لابسة ، بزز باش شجعات راسها وخرجات عندو هو لي كان لابس كندورة فالأبيض مزوقة بالأزرق ( حنا كنگولو الفوقية) ، تقربات لحداه وهي حشمانة ومتوترة ،
فرش صلايات وحدة مورا الأخرى وشد ليها فيدها قبلها هو الأول عاد قال ليها .
سليمان ( بخفوت ): دبا غانصليو العشاء والشفعة الوتر هما لولين صافي ( حركات راسها بإيجاب) مزيان الله إرضي عليك.
بداو الصلاة بقيادة سليمان صلا بها العشاء بتلاوة خاشعة حسات بالفرحة والسعادة الحقيقية ، أجمل حاجة هي أنك تشارك الصلاة مع لي بغا قلبك كتحس براسك ملكتي الدنيا وهذا حال حسناء.
من بعد سلم وكل واحد صلاة الشفع و الوتر بوحدو ، أقام الصلاة مرة ثانية وصلاو زوج ركعات شكر باش الله إبارك ليهوم فهاد الزواج ، سلم ودار الباقيات عاد دار لعندها هي ، تقرب لحداها أكثر وحط يدو على راسها وسد عينيه ، وبدا كيقرى أيات من الذكر الحكيم بصوت أجش وتلاوة خاشعة وحتى هي سدات معاه عويناتها وبقات كتسمع ليه وبدات الراحة والطمأنينة كتسلل لقلبها ، حتى كمل عاد بدا دعاء الزواج .
سليمان ( بصوت شجي): اللهم إني أسألك خيرها وخير ما جبلتها عليه، وأعوذ بك من شرها وشر ما جبلتها عليه،اللهم إني أسألك خيرها وخير ما جبلتها عليه، وأعوذ بك من شرها وشر ما جبلتها عليه،اللهم إني أسألك خيرها وخير ما جبلتها عليه، وأعوذ بك من شرها وشر ما جبلتها عليه.
اللهم بارك لي في أهلي وبارك لهم فيَّ ، اللهم اجمع بيننا ما جمعت بخير، وفرق بيننا إذا فرقت بخير.
اللهم جنبنا الشيطان وجنب الشيطان مارزقتنا ( عاودها مرات عديدة عاد فتح عينيه وشاف فحسناء ) اليوم وقدام الله كانعطيك العاهد بلي حتى حاجة متخصك معايا ، غانديرك بنتي ومرتي ، لي بغيتيها نجيبها حتى لبين إيديك ، عمري نعطيه ليك ، إن شاءالله غادي نكون ليك ونعم الزوج وكنتمنى الله مايحشمناش أحسناءي .
هي لي كانت كتشوف فيه وكتسمع لكلامو لي قايها فداخلها وعيون دامعة تقربات منو وعنقاتو وحطات راسها على صدرو الحنون لي ديما مدفيها .
حسناء ( بخفوت): وحتى أنا كانواعد نكون ليك نعم الزوجة الله إقدرني عليها .
دام العناق لمدة من الزمن عاد فصلو عناقهم لي مالي أحاسيس ، بدا سليمان كيحيد ليها فالفولار حتى حيدو و وقفها وحيد ليها العباية حتى هي وبان المخفي لي هبلو وسطاه تقرب منها وباسها على جبينها كأنه كيشكرها عاد تحنى وهزها بين إيديه غادي بيها للفراش حطها بالشوية عاد حيد حتى هو الكندورة وبان صدرو الفولاذي وطلع لحداها ، هي ناعسة مسرحة وهو فوقها ، كيدوز يدو على ملامحها لي مالياها الحشمة .
سليمان ( بخفوت) : منين غانبداك دبا أمممم ، ( تقرب لوذنها وقال) ماتخافيش ومتزيريش أنا عمري نأدي حسناءي ( باسها فودنها ) غي بشوية كولشي غايدوز .
ما إن كمل كلامو دخل معاها فقبلة كيف ديما كايبداها حنونة عاد كيتعمق فيها ، الجناح ماليه السكون إلا صوت قبلاتو وتنهيداتو لي كسروه وحسناء دوخها بديك البوسة ومشات معاه .
أنت تقرأ
هناك أمل 🍸مكتملة🍸
Chick-Litقصة بالدارجة المغربية، تحمل من كل فن طرب : اليتم،الحب،الرومانسية،العائلة،الكراهية،الحسد،الحقد،معنى الصداقة،محبة الدين،الجانب الديني،الواقع المغربي. قصة يتيمة كبرات فداخل الميتم وملي وصل وقت خروجها منو غاتواجهوم بزاف ديال المصاعب فياترى غاتقدر تج...
