🍂 هناك أمل 🍂
🍸 مصادفتك هي الحلم لواقعي وحقيقة لنبض قلبي 🍸
بارت140
أيام كدوز بحلوها ومرها وفات على ديك الليلة شهر تقريبا وهاهي حسناء كتوجد الفطور كيف ديما بمرافقة نزهة الصديقة والأم الحنونة ليها بعد ليلى، حسناء لي لابسة بيجامة سخونة فالبني عندها قب بودينات مع فولارها فالأسود ونزهة لابسة بيجامة طويلة فالاحمر سخونة عليها فواطة ، كل وحدة واس كادير حسناء كتقطع الكيك لي وجدات ونزهة كاتقاد أتاي.
حسناء( بوجه بشوش مع إبتسامة): مي نزهة خالتو ليلى مزال موجدات؟
نزهة( وهي كتقلب أتاي): يابنتي كاتشد العكس هي تابعاها الخدمة وجايا باقي كطيب وتوجد مكاتسمعش الهضرة .
حسناء( شافت فيها): عزيزة عليها الكوزينة .
نزهة( شافت فيها وقالت بضحكة): ومبانت ليها غي الكوزينة .
ليلى لي كانت لابسة أونصومبل فالأسود فوقهم كاب مع فولارها مقاد وهازة صاك متوسط مخطط بالأبيض.
ليلى( بإبتسامة): حصلتكوم شادين فيا النميمة محگلني خفافيت.
نزهة( بطنز): والخفة هي كاينة ( دارت لعندها) دوزي تفطري تقصدي خدمتكم أمولات الخفة.
ليلى( هزات طبسيل وغادة للصالة): هاهي غادة ياختي .
حسناء( كتسوف فيهوم وكضحك): واش نتوما المزاح كيتمشى ليكوم فالدم.
نزهة( هازة الصينية دأتاي ): المزاح غالي أبنتي وصعيب تلقايه فالسوق، تبعيني لايخليونا أومبان .
حسناء( بضحكة): واخا يالالة كلمتك هي لولة .
بداو كينقلو الفطور للصالة مونجي فاش كيفطرو، الحاج وميلود گالسين على الطبلة ونزهة وليلى وحسناء كيستفو ويقادو ،رجعات للكوزينة تجيب الكيك هو الأخير ملي رجعات لقاتو يالاه هابط فالدروج بديك المشية الخاترة ديالو وهو لابس شوميز فالرمادي عليها فيست سوداء مع سروال فصالة أسود مقاد شعرو وساعتو الجلدية على معصمو هاز تيلي وسوارت لوطو ، بمجرد الشوفة فيه تفكرات اللحضات الأولى ليها معاه فهاد الدار تفكرات فاش شد عليها الطباسل ملي كانو تقال عليها وهي تسلل إبتسامة مشرقة لملامحها الهادية .
عندو هو لي هابط وعينيه فالتيلي حتى شم ريحتها لي مهبلاه وهز راسو لقاها قدامو واقفة مبسمة ليه بحال شي وردة متفتحة وبين يديها طبسيل الكيك تقرب لعندها وهو عاطيهم بالضهر باسها فحنكها عاد فيقها من سهوتها.
سليمان ( هايم فيها): فين ساهية ؟
حسناء ( بخجل): مساهياش .
سليمان ( مضيق عينيه): أممم الله إجعلني نتيق( دوز يدو على خدها ) هبطي بكري .
حسناء( بإبتسامة): أه طار عليا النعاس وقلت نعاونهوم فالفطور ، وحتى نتا فقتي بكري.
أنت تقرأ
هناك أمل 🍸مكتملة🍸
ChickLitقصة بالدارجة المغربية، تحمل من كل فن طرب : اليتم،الحب،الرومانسية،العائلة،الكراهية،الحسد،الحقد،معنى الصداقة،محبة الدين،الجانب الديني،الواقع المغربي. قصة يتيمة كبرات فداخل الميتم وملي وصل وقت خروجها منو غاتواجهوم بزاف ديال المصاعب فياترى غاتقدر تج...
