🍂 هناك أمل 🍂
🍸 مصادفتك هي الحلم لواقعي وحقيقة لنبض قلبي 🍸
بارت122
على طول هاد الشهر لي داز دوزاتو حسناء فالترويض ، كادير الترويض كل نهار والطبيب ديالها مراقب حالتها الصحية ، وخصوصا ضربة الرأس ديما عليها المراقبة .
حسناء صابرة وعاضة فالصبر واخة كتعيى وكيضروها عضامها ومعندها صحة إلا أنها بمجرد ماكتشوف مجهود سليمان معاها و وقوفو معاها كتزيد تشجع وتحمل داك الآلم لي كتحس به.
أما هو فمعمرو خطاها ولا خلاها بوحدها الشهر كامل ديما معاها وفجنبها ، الترويض هو لي كيقوم ليها بالتمارين والحركات الخاصة أما الطبيبة المكلفة غي كتقدم ليه المساعدة فبعض التمارين الصعبة و كتقوم بتشجيعها.
أما العائلة السعيدة فهما كيجيو عندها كل نهار فالصباح وفالعشية كيزوروها وكيمشيو مكايبغوش إعيقو وإبقاو بزاف كايخليوهوم مع بعضياتهم بزوج الراس فالراس.
اليوم كباقي الأيام كانو من بعد حصة الترويض لي خدمو فيها حركات هاهما فالغرفة دبا ، حسناء لابسة بيجامة فالأزرق مع فولارها أبيض اللون ، گالسة فوق الفراش والعياء باين فوجهها سادة عويناتها ومستمتعة بلي كايديرو ليها سليمان.
هو لي كان لابس كيطمة كحلة مع سروال عسكري فالزيتي گالس موراها وخدام كيدير ليها مساج لضهرها وكتافها و عنقها بألة كهربائية خاصة للترويض سميتها بندقية التدليك العضلي Fitniss Gun ، بقا على ديك الحالة لمدة وجيزة عاد حبسها ودار ليها حركات رياضية ليديها ورجليها وهي عيانة باغة غاتنعس ولكن شكون خلاك مع سليمان كاين نضام العسكر.
حسناء ( بعياء): سليمان عييت عفاك بركة.
سليمان ( خدام كيدير حركات لرجلها ومركز فخدمتو): صافي قربنا صبري شوية ( شاف فيها ) واش عارفة راسك بوحاطية كثر من القياس.
حسناء ( بصدمة خرجات فيه عينيها): لا أنا ماشي بوحاطية بالعكس أنا صبارة كنصبر بزاف .
سليمان ( غادي معاها فالتيار وخدام على الحركات): أمممممم تيقتك داكشي علاش دوري دوري وتبكي حيت نتي صبارة وماشي بوحاطية ( عاود شاف فيها وقال بطنز) مراتي الله إرضي عليها عندها صبر سيدنا أيوب ( حرك إيديه فالهواء) كتصبر لدرجة تقيسها تبكي .
حسناء ( خسرات ملامحها) : حرام عليك والله غايجي با الحاج نگولها ليه.
سليمان ( كمل وناض واقف): أمممم فعلا غادي تگوليها ليه حيت هو لي كيقبل ليك هبالك وتبوحيطك ( شاف فيها وحط إيدو على صدرو) أستسمح نتي ماشي بوحاطية نتي صبارة .
حسناء ( بإبتسامة وكتقلي ليه السم): بصحتي وراحتي لقيت على من نتبوحط يالاه.
سليمان ضحكاتو بكلامها گلس حداها وجبدها لعندو كيهرها ويلعب معاها ، الغرفة ماليها قهقهات حسناء العالية وضحكاتو الرجولية.
سليمان ( ضاحك): دبا شنو كاديري كاتباني عليا ولا كاتقلي السم دوي الشنيولة( شدها من أرنبة انفها) الوليدة عندها الحق شنيولة إسم على مسمى.
حسناء ( مشا إقتلها بالضحك): وصافي بركة غاتقلتني وتوحل فيا.
سليمان ( دخلها فحضنو وعنقها عناق حار): الله إرضي على بنتي هادشي لي بغيت نشوفو فرحانة وضاحكة( طل عليها هي لي مخشية فيه وقرصها فحنكها) وأهم حاجة زاعمة عليا ونقصتي ديك الحشمة .
دام العناق لمدة من الزمن عناق حار كلو حب وحنان بينهوم هي مرتاحة فحضنو ومغمضة عويناتها وهو مزيرها معاه كون لقا إدخلها فعضامو ماسترددش وكبفرق قبل متفرقة على راسها .
وأخيرا فصلو العناق وعاونها حتى تقادات فبلاصتها وجاب ليها طبسيل عامر بالفواكه مقطعة طرفات صغار ، بقا كيوكلها منها وكيضحك معاها حتى شبعات مسح ليها بحال شي بيبي داير ليها كي الماء القليل.
سليمان ( واقف كيبقشش فالتيلي): واش جاية دبا ولا مزال؟
حسناء ( بتأكيد): گالت ليا دبا علاش كتسول؟
سليمان ( شاف فيها): خصني نمشي نطل على الخدمة ونصاوب شي وراق ، إلى كانت جاية زيان تبقى معاك حتى نرجع إلى مكانتش جاية نصوني على الوليدة تجي.
وهو إتدق الباب من طرفها هي من بعد ماسمعات صوتو أذن ليها بالدخول ، دخلات وهي حشمانة معرفاتش علاش كتحشم منو هو بالذات كتشوفو ديك القفوزية كاملة كامشي منها.
#يتبع
أنت تقرأ
هناك أمل 🍸مكتملة🍸
ChickLitقصة بالدارجة المغربية، تحمل من كل فن طرب : اليتم،الحب،الرومانسية،العائلة،الكراهية،الحسد،الحقد،معنى الصداقة،محبة الدين،الجانب الديني،الواقع المغربي. قصة يتيمة كبرات فداخل الميتم وملي وصل وقت خروجها منو غاتواجهوم بزاف ديال المصاعب فياترى غاتقدر تج...
