♡أعد لي روحي
♡بقلمي.. غزالي
☆الفصل الاول: انا انهار انا اتلاشى...
°بارت 1
"و كأن جميع خيبات العالم رميت في مساحة دافئة حدودها عينيك"
هدووء غريب جميل كيلف المكان .. اولى خيوط الصباح بانت و الشمس لي كتحاول ترسل اشعتها الذهبية الدافية مخبية ورا الغيوم الكثيفة ناصعة البياض ، الارض و اشجار الارز مكسوة بغطاء ثلجي سميك شوية .. منظر كأنو جنة فوق الارض .. كيتخلل داك الهدوء مرة مرة صوت القردة و هي كتنقز ولا صوت بعض صغار الريم كتجري هنا ولهيه ... فوحدة من الديور لي متصافين جنب بعضهم البعض ، خرجات فتاة فعمر الزهور ، يالاه قالت بسم الله فالدنيا و خطات اولى خطواتها فمواجهة الحياة .. عيون وااسعة عسلية مشفرين كأنها سرقات للغزال عيونو ، و سبحان من صورهم و تفنن فخلقهم .. مكبطة مزياان من البرد و ملوية عليها كاشكول مغطي وجهها من الصقيع و الجليد ، غادة كتزرب فاتجاه مدرستها باش توصل فالوقت .. ما ان خطوت اربع خطوات مبعدة على الباب سمعات اسمها كيتنده من وراها
...: زهرة .. زهرااا هاكي نسيتي المظل ديالك
زهرة:(شيرت من بعيد) ماكاين لا شتا لا ثلج اعمتييي
...:(غزرت فيها) شدييي المظل دييه معاك وكان طيح الشتا بلاتي ءءااا!!
زهرة:(رجعات كتلتخ فرجليها) وامكنحملللش نهزهااااا اعمتيييي
...: شدي وكان شدي تهزك عليا شي طيااارة ان شااالله طيرك للسويد ولا الدانماارك
زهرة:(ضحكات كتهزز كتافها بفرحة) ااامييين يخلليك ليا اعمتي الحنينة لالة ميرا
ضحكات العمة ميرا متبعة بنت خوها تا غبرات عليها عاد دخلات من البرد ، مشات زهرة فاتجاه الكوليج مع الدخلة مع الزلقة فالثلج جاات جالسة خلاتي شي يضحك شي جاي يعاون شي يتشفى و اكثر من ضحك عليها هو صاحبتها و الانتيم ياحسرة .. خلات الناس يعاونو و هي رااهاا لهيه كتشقلب بالضحك تا دمعو عينيها
زهرة:(شادة قزيبتها كتوحوح) تهجريييه ان شاء الله تا تولي سميتك من سعيدة لحزينة
سعيدة:(كتمسح دموعها) الله ... فشلت بالضحك نااريي و عل الصبااح
زهرة: واصبااح زيين هادااا باين النهاار من صباااحو .. زيدي زيدي ندخلو وكان
سعيدة: وجدتي الفرض المنزلي ديال الماط
زهرة: وجدتوو النقالة غي زيدي ندخلو و نعطيك تنقلي .. غي قوليلي بلا بيا اش كنتي غاديري
سعيدة: نخرج نحطب بااينة .. زيدي و نتي على زوج حروف فضحتينا يعطيك فضيحة
زهرة: يعطيهالك نتي نييت .. اححح ترمتي تكلاصات نمشي نسخنهااا
طرطقات سعيدة بالضحك فحين زهرة طلقات رجليها للقسم دخلات و وقفات قدام فورنو ديال الحطب ، عطاتو بالظهر مكوزة ترمتها شوية كتحس بالسخونية بدات طلع معاها عاد بدات ترخى و تسييح و البنات حداها يسخنو يديهم فحين سعيدة رااهاا طيرات ليها الكارطابل و جبدات الفرض المنزلي تنقلو ... ما ان دخلات الاستاذة بداو يتجاراو مل واحد شد بلاصتو و تقنتت زهرة حدا سعيدة لووور ديال القسم
سعيدة: بلاتي نمشييو
زهرة:(لوزت المسكة ففمها) ممم راني خليت مسج لأمين غايتسنانا مع الحداش غي نخرجو نطلعو معاه لفاس
سعيدة: انا غانخلليك و نولي مانقدرش نبقى .. سعداتك نتي ماكان لي يقولك لا مين دخلتي لا فين خرجتي كيتي يانا
زهرة:(تنهدت) غييي راكي تقولي و صافي .. تبعي تبعي حسن ماطير مورانا هاد التجالة
أنت تقرأ
أعد لي روحي
Romanceأخيرا عزيزاتي القارئات كتاب المكتاب و تقدر لهاد القصة تشوف الضوء و تكتمل... ♡ أعـــــد لـــــــي روحــــــي بــقلــمي: غـــزلان مـــرزوقــــي ♡𝖒𝖎𝖘𝖘 𝖌𝖍𝖆𝖟𝖆𝖑𝖎 °°كـــــلــــماتـــــــــــي°° كالنهار المشرق *هي* .. و *...
