أعد لي روحي

بارت 62

♡أعد لي روحي
♡غزالي
☆الفصل الرابع: نبضات رعب
☆الجزء 62

تنهدات اللا عيشة كتشوف لزهر هاد البنت .. سميتها زهرة و الزهر لا يمت لها بصلة ، وكان تشرب ماء الزهر الما يفووت و الزهر يبقى واحل فالحلق .. ولايني هادي هي حكمة الله تعالى ، كووولها و باش بلاه الله .. و الجزاء لأكثر صبراا و أكثر حمدا على ما كتب الله ، هادي هي الدنيا و تا واحد مالقاها كيف بغاها .. بقاو صفية و عيشة غي بيناتهم واحد التنافر و لي كتغسل المواعن غي حاضياهم و تسول باغا تعرف اش كاين و ربي كبير ، رجحو الأمر للكلاوي قالولها عاطيها البرد و دازو عليها يامات سودة داكشي لاش خايفيين عليها .. قربات صفية هازة بانيو فيه ماء دافيي و الملح و زايدة فيه سكنجبير و الابزار الاسود مكثرااهم و عطاتهم لزهرة خشات فيه رجليها .. فحين عيشة جابت شالها الغلييض لواتولها على ظهرها و كرشها و خلاوها مكمشة فداك القنت كتسنط لحريقها و لايني اللسان فكل الحالات و كيفما بغات تكون خاصها تهضر .. ضروري تهضر و ربي كبيير

زهرة: صفية اش هادا لي دايرة ليا فالبانيوو!

صفية: غي سكنجبير و الابزار يسخنوك شوية .. سكتي و نتي غي تريكلامي

زهرة: اختيي قالت ليك خالتي تجيبيلي غي باش نكمد رجليا .. نتي جبتيليا هنا نشرملهم

عيشة:(تغددت) هاناري و نشدها نشرملها نييت .. تركني و سكتيي

زهرة: وكان غي زدتي تا القرفة يرجع هاد الماا معطر بحالي كتعطري القهوة

رحمة:(طرطقت بالضحك) ياخواتاتي على هاد البنت شحال حلووة و قشابتها واسعة

شافت فيها زهرة بابتسامة عذبة تا تسدو عويناتها العسليات و طلعو خدودها الحميمرين بحال التوتة .. اما دوك النميشات لي متناثرين فوق نيفها و وجنتيها بحال تراب الجنة ، جمالها جمال اطلسي حد التهلكة .. زوينة و زايدة تزياان بروحها المرحة و قلبها الزويين .. طلعات تنهيدة من جدر قلبها كتقطع فالقلب و رجعات ضحكات سنيناتها مستفين بحال اللؤلؤ

زهرة: وكان ما القشابة واسعة اخالتي وكان القلب طرطق و راني تحت التراب هادا شحال

عيشة:(خنزرت فيها) الله يستررر ياربي هاد البنت على فالات عندهاا

زهرة: ويتي ويتي خالتي كتخااافي عليااا

رحمة: ههههه غا خليها عليك اللا عيشة .. شحال عندك ازينة البنات

زهرة: و شحال تعطيني اخالتي

رحمة: ايلا ماخفت نكذب نعطيك 18

زهرة:(ضحكات و مدات ليها يدها) اري يدك لهنا (مداتها ليها و ضربات عليها) جبتيها لاااصقة هههه

طرطقات بالضحك تا كرشها ضرتها تبعوها كولشي الا عيشة لي دارت يدها فوق راسها

عيشة: اربي لاما سكتوها عليا حسن مانلصقها مع حيييط