♡أعد لي روحي
♡غزالي
☆الفصل الخامس: هدنة
☆الجزء 71
خرجات عيشة من الرياض مخلية عقلها مع زهيرو و خايفاها لا تهور و دير شي حاجة .. واخا محلفاها و عارفاها ماغاتحنتش بالوعد ولايني المصايب هي كتهرب منهم و هوما كيتبعوها ، وصلات لدار السبوع و ضارو بيها البنات كيسولو غي بعينيهم .. هي بدورها طمناتهم بعينيها و جلسات تكمل شغالها و كطلب الله دغيا الوقت يدوز باش يرجعو فحالهم للدار ، تسربى العشى للرجال و تفرق المجمع .. الدار بقاو فيها غي مواليها و اقرب الاقربين ، المواعن تغسلو تجمعو و المرامط تحكو رجعو بحال المراية .. الساعة كانت قريبة للطناش ديال الليل ، خصوصي مع فصل الشتاء الناس مكتسهرش بزاف برا الدار .. كانت كتلبس جلابتها و البنات كيجمعو فالماطريال تا خرجات مولات الدار هازة زوج صيكان عطاتهم للا عيشة و زوج خرين لرحمة
...: اللا عيشة الله يرحم الواليدين ، ماحشمتيناش و كبرتي بيا الله يكبر بيك .. طيابك بنين و الدجاج تباارك الله الطباسل رجعوهم ملحوسين
عيشة:(بابتسامة عذبة) بارك الله فيك اختي .. لهلا يحاشمنا ، هادا هو الربح عندي الضياف يخرجو شبعانين و موالين الفرح يبقاو على خاطرهم و هانيين
...: هزيتي براسي و براس ولدي قدام البراني الله يغلبك على عديانك ، اوا الحاصول خليت ليك العشى لبنيتك لوخرى الله يحفظها و يحجبها و يعمي عين الشيطان عليها
عيشة: اااامين لهلا يخطيك .. اوا الحاصول الله يلاقينا فساعة خير من هادي ، خليت ليكم الراحة
...: توصلي بالسلامة و تباتو فراحة الله اللا عيشة
ضحكات سلمت عليها بالتعناق و مولات الدار بكثرة الفرحة ديال السبوع لي داز لحفيدها حسن منو ماكان لا فطياب ولا فتاويل التقديم شدت راس عيشة باستو .. بقاتهم بخير و خرجو كان الدري لي وصلهم بالهوندة رجع ليهم يرجعهم ، هزو المرامط و المجمر الكبير و ركبو مستفات مهلوكات بالعيى .. وصلو للرياض دخلو الماطريال خلاوه غي فالحوش عند الباب فحين عيشة تحاسبات مع الدري فرحاتو كيف فرحات و دخلات بنخوتها كيف العادة هازة الصيكان تا قفزتها زهرة واقفة دايرة يديها عند جنابها غضبانة زعما و لبنات موراها كيحكو يديهم من واحد زوج قرصات..
زهرة: تعطلتووو .. فين هو عشااياا !!!
عيشة: بسم الله الرحمان الرحيم .. مزال مانعستي!! موالفة يكون شي شقى دغيا دوخيي بحال ديك الذبانة لي سايطين عليها فليطوكس ، دبا مالكي مبلكة عينيك كي موكة
زهرة: شبعت نعاس فالعشية (ذبلت عويناتها) و جاني جووع
عيشة: مسييكيينة .. جاها الجوووع ، و دوك الذرعاان لاش عندك!! ولا اللسان ماضي و الذرااع كاضي ءءااا
زهرة:(تنفضت فبلاصتها كتهرنن) اوا حرام عليك ا خالتيي .. هادي هي يرضي على بنتي و ماتشقيش راسك و رتااحي دباا راكي مريضة تقلبتي عليا ياااك
عيشة:(تهززت بالضحك) شوو للفشووش كي دايريين هه دانينو
طامو: انااا لييي مرييضة اما هادي عندها لقاااط فدوك اليديين ماشي صبااع ... احح على قرصة
عيشة: غي جنون الوحم هادوك .. زيدو زيدو تعشاو و سكتو ، الناس ناعسة
زهرة: تا لدبا عاد تفكرتي الناس ا خالتي
عيشة: ااادييك قندييشاا
تكونت زهيرو خاشية راسها بين كتافها و البنات كيبدلو عليهم و يضحكو ، ضارو بالطبلة بعدما سخنو العشى و زهرة شافت اللوز ريوكها سالو عليه عزات عليهم تا خلاوه ليها غي راسها .. تعشاو و ختمو بالديسير ، جمعو الطبلة تغسلو المواعن و تفرش الفراش .. و ككل ليلة كل وحدة شادة بلاصتها ساقرة و القنديل مضوي عليهم البيت فتيلتو كتميل مرة يمين مرة شمال
عيشة: غدا وجدو راسكم نمشيو للصويرة ، نفوجو شوية
طامو: عندمن نمشيو اخالتي
عيشة:(تنهدت) كاينة دار ولدي تما مانمشي تا لعند واحد نمشي لدارو
صفية:(هزت راسها) و شحال نبقاو تما!!
عيشة: شحال ما كتاب .. تا تهدى النفوس و نرجعو (خرجت تنهيدة عميقة) مهما يبان بنادم هادئ و مكالمي ، الا انو لداخل كاين تسونامي
صفية:(فهمتها و تنهدت تا هي) حسن نيت ا خالتي ، لهلا يخطيك علينا
عيشة: نعسو دبا .. صباح خاصنا نفيقو شوية بكري ، تباتو فراحة الله
تقلبات للحيط كطيب فنعاسها ، فحين زهيرو متبعة القنديل ساااهية معااه و صفية كتنهد و احداث النهار كيدوزو قدام عينيها و الحكرة ديال الصباح و الفرونسي لي مافهماتش باقا كتحرق فقلبها .. اما طامو ماشافت ماتشوفات ، مرتاحة فدماغها دغيا داها النعاس و غفات
أنت تقرأ
أعد لي روحي
Romanceأخيرا عزيزاتي القارئات كتاب المكتاب و تقدر لهاد القصة تشوف الضوء و تكتمل... ♡ أعـــــد لـــــــي روحــــــي بــقلــمي: غـــزلان مـــرزوقــــي ♡𝖒𝖎𝖘𝖘 𝖌𝖍𝖆𝖟𝖆𝖑𝖎 °°كـــــلــــماتـــــــــــي°° كالنهار المشرق *هي* .. و *...
