أعد لي روحي

بارت 47

♡أعد لي روحي
♡غزالي
☆الفصل الثالث: مقطوعة من شجرة
☆الجزء 47

رمشات عينيها عدة ترميشات و تبعاتها بالمياكي كاتمايل و تخطي خطيوات صغار تابعاها بالزربة كانت سبقاتها

زهرة: بلاااتي اخالتي تسناي نسولك

عيشة:(شافت فيها بحنية) هانا ا زينة البنات

زهرة: واش كتعرفي شي داار باغيين خدامة

عيشة: صبري شي شويش على خبزتك و غاتعرفي .. و نتي باغا فيساع فيساع

زهرة:(تنهدات بعياء) رجليا طابو ملي صبح الصباح و انا من دار لداار

عيشة: الناااس راها قلبات على الخدمة بالشهر و الشهراين و مالقاتها بمياااات كشيفة و كشيفة ، نتي غي هاد الصباح و هانتي لقيتيها خاصكيي تحمدي الله لي مابقيتيش مجلوقة فالزناقي .. توسدي الارض و تغطاي السما

زهرة:(تنهدت بألم) حمدالله على كل حال

عيشة:(كيتمشاو بالمهل و بدات تسل ليها لسانها) اش جاب زينة الشلحات لرحبة الادارسة!! و اشمن هم رمااك للزنقة!!

زهرة:(نزلت راسها) حكايتي حكاية طويلة اخالتي

عيشة: واخا بزة و بريهيشة ولايني شاربة عقلك و حافظة صواريك .. بعدا فياختك نفعاتك تخبي اللاج ديابك شوية

زهرة:(بتساؤل) كي درتي عرفتي ماعنديش سبعطاااش

عيشة: راسي شاااب ا زينة الشلحات و دييت شححال و جبت شحااال فالزمان .. و عينين ربعطاش ماشي هوما عينين سبعطااش

زهرة: يالاه عندي تلطااش

عيشة: و مزينها بحة عندك ا زينة الشلحاات .. باينة صوتك غزااال ينوض الميت من قبرو

زهرة:(بابتسامة باهتة) الصوت غزاال و الزين كااين .. اوا و الزهر لي عليه الاساس فيناهو!!

عيشة: الزهر فالله .. و رجانا فالله .. و ان شااء الله يحن علينا مولانااا و يبدل حاالنا لأحسن حاال (تنهدت) هضرتك حليلوة و كلامك موزون .. زيدي وكان زيدي ، نتي خاصني معاك صينية و كاس نتاع اتاي بعقلوو .. ولا نخليوها سهرة على الشمعة و القنديل

زهرة:(تنهدات و بتاسمت) ليي بان لييك ا خالتي

دخلو بين ازقة فاس الضيقة و بيبان الرياضات قدهم قدااش .. مكتسمع غي اللكنة الفاسية الحررة بديك النغمة تقول زززااني غي نسمع ليها ، دخلو مع واحد لباب .. من برا تقول اش هاد الخربة و فين عايشين هاد الناس!! اما فااش دخلات، حلات فمها قرب يوصل للأرض .. رياااض و شمنك يا ريااض ، الزليج بلدي يشقشق فالحيووط و الارض .. و الجبص كيي داااير منقوش فالسقف ، اما واحد سيدي ثريات غي فالباب بهروها .. و واحد لالة مولاتي خصة فوسط الدار ، تقول نفرش تما و نبقى جالسة غي حدااها .. السراجم كي داايرين و الزاج باللواان و الغرس مع جناب البيبان و الجلسة فالوسعة بواااحد سيدي كتاان .. غي بالدخلة لداك الرياض تحس بالراااااحة و الهدوووء النفسي ، و اصوات الطيور المغردة من الكناري و الحسون مالية المكان .. تا من الببغاء حاطاتو عندها .. هادشي غي لي شافتو براا ، اما البيوت لداخل يعلم الله كي دايرين .. ديزاين تقلييدي مية فالمية ، ندهات بصوتها على سمية بنت "زينب" تا جاتها خدامة لابسة قفطاانها المزركش و مشمرة على دراعها و عاكسة راسها العكسة ديال الغداايد .. وقفات كطلع و تهبط فزهرة و حولت نظرها لعيشة

زينب: نعام ا لاعيشة

عيشة: عافا بنيتي دخلي هاد التقضية تعاونو عليها راني جبت لي ناقص .. وجدتولي الدجاج

زينب: كولشي موجود .. لاعيشة حنا بلاتي نمشييو علاما قالت ليا لاشافية

عيشة: صافي دغيا سخيتو بينا

زينب: اوا دا هو الجهد .. يبانلي جبتي معاك ضيف الله ا لاعيشة (شافت فزهرة مبتاسمة ليها) مرحبا بيك اختيي

زهرة:(غي كدور فعينيها) ترحب بيك الجنة و نعايمها اختي

عيشة: زهرة ولات وحدة منا و فينا .. زيدو مانبقاوش فالباب زيدو