♡أعد لي روحي
♡غزالي
☆الفصل الثالث: مقطوعة من شجرة
☆الجزء 49
التلفزة مشعولة على الدوزيم كيتفرجو لدراغون بول ، و الشوفاج مطلوق يدفيهم من البرد .. البراد كل شوية يخوي فالكااس ، و ريحة الحرشة و البيض بالسمن فاايحة فداك البيت .. حطت كاسها و فيدها اللوز كتغززو فحين زهرة طايحة عمية فداك البيض جوع الدنيا و الدين كان فيها ، شبعات مسحت يديها و ناضت تجمع الطبلة تا وقفتها عيشة
عيشة: غي خليهم بلاتي و نجمعوهم
زهرة: ماعليش اخالتي دغيا ندوز عليهم و نجي .. راه الظلام طاح بحراا نديرو شي عشيوة و نجلسو مركنين فبلايصنا
عيشة: دويت معاك ا زينة الشلحات .. الميعنات ماغاديش يهربو
نحنحات مسلمة امرها و جلست مكمشة تا هي و مرة مرة تغزز شوية مكسرات .. اش غادير دبا مع عيشة!! واش غاتكون خدامتها ولا شنو!! سمعت تنحنيحة من عندها شافت فيها و تلفتات لعندها ، كانت شادة التسابيح و تاهي متبعة فالتلفزة
عيشة: بغيتي تقولي شي حاجة!!
زهرة: خالتي دبا واش نبقى نخدم عندك ولا شنو
عيشة: بحال داك الشي ا مولات البحة الغزالة
زهرة:(غرقتها بكثرة مكتشكر فيها) و شنو غانخدم
عيشة:(تنهدت) انا طيابة ابنتي .. و حلوانية .. الشي ديال الحلوة و الكعك و تا من المسمن و الخبز كتجيني كموند نطيبو و ندفعوه لماليه .. و نتي غاتعاونيني
زهرة: الطياب كاع اخالتي!! كطيبي فالعراسات!!
عيشة: عراسات .. سبوعات .. ختانات .. و تا الجنازات .. ماتخلعي ما دهشي ماتخافي ، غانعلمك كولشي و بقاي تعاونيني
زهرة:(بإحباط) وكان تسعفيني عطيني غي الشقى و غسيل المواعن اخالتي
عيشة: مااعندك صحة للشقى .. الشقى عندو ماليه غي خليك نتي غي فالساهل
زهرة: هادشي جاك سااهل .. نااري ياخالتي
عيشة:(ضحكت بتقالة) ماصعيبة غيير البدية (شافت فالسرجم) يالاه نوضي وجديلنا شي حسوة نسخنو بيها مصارنا ايلا كتعرفي .. مكتعرفيش تركني
زهرة: لا لا كنعرف .. انا نوض نديرها و نغسل المواعن
عيشة: يالاه نوضي .. و على حسوتنا غاتعاودي ليا كاع ماطرا و جراا
زهرة:(بتاسمت بذبوول) و تقول واش تميكي ا خالتي
عيشة: خاصك تخوي باش ترتاحي .. ماحدك ماخويتيش و نتي كطلعي فديك التنهيدة لي كتقطع فالقلب تا طرطقيه شي نهار
زهرة: ماكرهتوش وكان طرطق و تهنييت اخالتي والله
ناضت كتجمع الطبلة بحيوية مسحتها و دخلات الكوزينة تشهاااي تشقاي فيها .. تبعاتها لقاتها كتوجد فالخضرة قلبت عليها جبداتها و بدات دور بجنابها
زهرة: خالتي عندك دجاج ولا لحم ولا كفتة
عيشة: لي حب خاطرك موجود
زهرة: بغيت الكفتة
عيشة: راهي فالثلاجة لتحت .. يالاه ورينا حدااكتك و بنة يديك
زهرة: غانديرلك وااحد التشيشة تاكلي عليها صبيعات يديك دبا ذوقي و تشوفي اخالتي
أنت تقرأ
أعد لي روحي
Romanceأخيرا عزيزاتي القارئات كتاب المكتاب و تقدر لهاد القصة تشوف الضوء و تكتمل... ♡ أعـــــد لـــــــي روحــــــي بــقلــمي: غـــزلان مـــرزوقــــي ♡𝖒𝖎𝖘𝖘 𝖌𝖍𝖆𝖟𝖆𝖑𝖎 °°كـــــلــــماتـــــــــــي°° كالنهار المشرق *هي* .. و *...
