أعد لي روحي

بارت 36

♡أعد لي روحي
♡غزالي
☆الفصل الثاني: في ديسمبر تنتهي الأحلام
☆الجزء 36

دار تلفون فوذنو و بعد شوية على فاطمة ، بعد رنات قليلة بقى يهضر و فاطمة مراقبة ملامح وجهو لي كتغير كل شوية .. تنهدات و رجعات كتشوف فزهرة و أسيم ، و صوتها واصل فين يااا فين .. تنهدات تا رجع حداها محند شافت فيه و زادت تكمشت فشالها

محند: غايتصرف باه

فاطمة: و عنداك يديرو شي حاجة لديك المخلوقة

محند: لا لا هي ماعندها دخل .. قالي غايتصرف مع سي اسيم

فاطمة: الله يخرج الطرح على خير و صافي

محند: زيدي دخلي نقولك شكاين زيدي

دخل من البرد و تبعاتو و الشتا بدات تنقط و طيح فلطف جميل .. ابتاسمت و هزت راسها لفووق مسرحة يديها باش تقيس نقيطات الشتا .. تبع ديك اللوحة ببطئ .. من وجومها لإبتسامتها المضيئة ، كيتمعن فملامحها اللطيفة .. بحاال نقيطة ديال الشوكولا البيضاء الحلوة و تحطات على قلبوو ، تنهد و كل شوية كيسول راسو .. كيفاش هاد الكتلة الخفيفة من القطن الناعم حبيتها!! كيفاش دخلات لقلبي!! و كيفاش تصرفاتي تحولو تدرييجيا معاها ، و تبعوهم مشاعري!! واش حب هادا ولا مجرد اعجاب!! ولا مجرد نزوة عابرة فقط!! واش ممكن غانحل عيني الصباح و مانردش ليها البال!! ماندير ليها تا اعتبار!! رغم انني وقح و مكنسواش .. ماغنزلش لمستوى جد منحط و نتخلى على صبية انا سبابها فعذابها ، فبعدها على عائلتها و حرمانها منهم و الاهم فقدانها لشرفها .. مد يدو ليها شافت فيها شحااال و هي بقات تشووف شحاااال فالأخير عطاتو يدها الصغيورة شدها مزير و جرها معاه بالشوية

اسيم: اجي تشربي دواك

زهرة: و عمتي!

اسيم: انا عند وعدي

دوزت لسانها على شفايفها كتنهد بارتياح .. ماعارفاش كيفاش و لكن اي حاجة نطق بيها كتيقها ، دخلو لدااخل و طلعو نيشان للجناح لي شهد الليلة الجهنمية لي جمعات بيناتهم .. جبد تلفونو فتات عليه النمرة ديال الفيكس لي حافظاها عن ظهر قلب ، غي شد الخط حطو فوذنها و ناض داير يديه فجيابو كيشوف فالسرجم .. و هي قلبها كيطبل عند وذنيها بالفرحة و الخلعة ، الأحاسيس كولهم تخالطو عليها و شداتها الترعييدة .. تنهدت كتسنى الجةاب و كتسمع رنة الاتصال تا تهز الخط....

زهرة: الوو عمتيي

احمد:(شاف فلاباري و رجعها لوذنو مخلوع) العمى ان شاء الله كيفاااش نتي معيطة

غي جاها صوتو من ورا السماعة تغرغرو عينيها بالدموع .. حسات بموس حااامي كيدوز على قلبها ، صوتها تنغنغ بالبكى و طلعت شهقة مكتومة ماباغاش تبين ضعفها

زهرة: عطيني نهضر مع عمتيي الشماتة .. ماتخافش فعلتك ماغانقولهاش ليها باش مانطرطقش ليها شي عرق بالفقصة ديالك

احمد: ههه مسكيينة واخا تدوي ماغاتيقكش .. علاش معيطة!! كيفاش لاغتيست خلالك تلفون تهضري بيه!!

زهرة: ماااسوووقكش .. بغيت عمتي كلمها ليا غي نهنيها عليا

احمد: عمتك ماكاينااش

زهرة: كذاااب .. نتا واحد الكذااب مامنكش زوج السلكووط

احمد: ياكما تزللت عليك وانا مافخباريش

زهرة:(كتغزز سنيها) وكان بقيت معاك ماشي بعيد ديرها

احمد:(تنهد) اوا دووماج قمرت بيك و عطيتك للاغتيست فعوض الفلوس .. اما انا نذوق شهدك النحلة

زهرة: الله ياخذ فيك الحق الحماار .. الله يااااخذ فيييك الحااااق

غوتات تا خرجت بلحوحتها الشيء لي خلى اسيم مستغرب لهيجانها لي جا فجأة .. كانت هادئة تا ثارت بحال البركان ، قطعات فوجهو كتبكي الدم بدال الدمووع و هو عنقها عندو كيهديها و وااالو واش هي بغات تهدى او تهدن
******************
#توضيحات
اولا القصة احداثها ف 2003 و كي نقول 2003 يعني راه عقدين دازو لي تزاد تزاد و لي مات مات مشاو زوج اجيال .. و دااك الجيل مااشي هو ديال دبا و التفكير ديال هادا شحال ماااشي هو ديال دبا فهمتوني ياك .. اييه يا الزمن الجمييل قراو و استمتعو
ثانيا: القصة طويلة ماشي قصيرة و السنوات غايبداو يدوزو اسيم و زهرة غايبداو يكبرو لذلك هادشي علاااش مابغيتش نحط تصاورهم من دبا
ثاالثا: القصة ماكاتباهاش كاملة يعني البنات لي قرااو قبل داك الشوية ماتبقاوش تحرقو على المتتبعات الاحداث خليونا زوينين الله يرضي عليكم هادشي كي واالو مقارنة مع اللي جااي