أعد لي روحي

98

♡أعد لي روحي
♡غزالي
☆الفصل السادس: قدر ام تدبير!
☆الجزء 98

وصلو للرياض ضاحكاات فرحاانات و نااشطاات .. حيدو ديك الطااقة السلبية كولها و جااو بروح جديدة ، دخلو بدلو عليهم و قادت اللا عيشة صينية نتاع اتاي حطات معاها داكشي لي جابو و ضارو على الطبلة من غير زهرة لي بقات غابرة ..

عيشة: زهرااااا .. واااا زهراااااااوو

زهرة: اناااا جااااياااااااوو

عيشة: شووو لبنت الحرااام راها تعايبني

زهرة:(دخلات) اووبس مانعاااودش

ذبلات فيها عينيها و جلسات ناشطة و صوتها شوية مبحبح حيت عطاتو لافورص و بقات غي مواال قد السخط مور مواال قد ساعتين ديال المااط .. جبداات من صدرها ديك الغرامة لي غرمو عليها العيالات و لاحتها فيد عيشة

زهرة: شديييش اخالتي هادي

عيشة: شهااادااا .. تي هادي كولهاا غرامة!!

زهرة: الشيخة حلفااات تا ناخذ رزقي كاامل مكموول

صفية: اللهم بااارك .. با با با بااا خدمة يوووميين خذيتيها فساعتااين...

طامو: لاا نييشااان الشيخة فيييها الفلووووس

عيشة:(بدات تحسب) دبا شحال هنااا

زهرة: 1900 درهمم .. قرفية تنطح ختها

عيشة: نخبيهاالك لدوااير الزماان (خشاتها فصدرها)

زهرة: تي اخالتي بغييت نشريي شي حوااايج

عيشة: تشرييي النبغغغ تكمشي و اجي تعلفي لا تعلفي و سهرينااا..

زهرة:(دلات شنافتها) بغييت غييي ليي بوووط عااافاااك

عيشة: الملاااوي .. علفي شويكيكة لوز و شويكيكة كركااع يعاونووك

زهرة: هاهي تعلف (لاحت بيسطاشة ففمها) دبا خالتي الباسبور على ما كنعرف صعييب باش نطلعو ماشي ساهلة غي جي و نطلع الباسبور من دايتي لراسي

عيشة: فييه فاش راني نخمم .. بصح غدا نهضر مع يوسف هو يقولي اش ندير فحالتك نتي

صفية: دبا ضرووري خاص داك عقد الازدياد و لاكارط ديال الوصي ياك

عيشة: داااكشي نييت .. حيت البهلة عاد برهوشة

زهرة: اوا لي يشوفني كيعطيني سبعطاش اخالتي مكنهبطش عليها

عيشة: مابقاتش فالشوفة بقاات فالوراق (تجبدات) احح اربي رجليا وجعوني .. غدا يصبح الصباح و يفتح الفتاح الله يفتحها فوجهونا و يسهل علينا ماصعب ياربي

زهرة: امييين

صفية: غدا نمشي معاك لدار ديك الشيخة اخالتي

عيشة: ان شااء الله نييت تونسينيي .. (شيرت بيدها للتلفزة) ادييك هويعة بدلي عليا هاد الخناشش ديال الرسوم و فلة و ديري شي حاجة مقاادة

زهرة: تعرفوو ولاا بدا واحد المسلسل مكسيكي واااعررر

تنهدات اللا عيشة كتحرك راسها بلا حول من هاد البنت و تبعوها فهبالها كيتفرجو فالمسلسلات سوا مكسيكية سوا مصرية و فالليل ختموها بمسلسل بريزون برييك كانو كيديروه فالدوزيم ، كيبقاو حايرات واش يتفرجو لوست ولا بريزون فالأخير ختارو بريزون يتفرجولو و سمحو فلوست لي مافهمو راسو من رجلييه .. عايشين مع الاحداث مكمشات مرتاحات من نهار طوييل ديال الخدمة .. تعشاو جمعو الطبلة و رجعو لبلايصهم تاني مكمشاات تا ماعرفو كيفاش غفات بيهم عينهم تا ناضت اللا عيشة غطات لي تعراات طفات التلفزة و رجعت تا هي لبلاصتها كتستغفر تا داتها عينها و هي هاكاك ..

🙃🙃🙃🙃🙃🙃🙃
سلاااام .. ايييه يااا ليااااام .. يام كانت دوزيم دير بريزون بريك و الاولى كدير لوست و بزوج بيهم كانو يبداو مور الاخبار فالليل و انا كنت كنتكبر عليهم ... هييييححح و شحال ندمت لي ماتبعتهمش فداك الوقت