♡أعد لي روحي
♡غزالي
☆الفصل السادس: قدر ام تدبير!
☆الجزء 85
و كيف جاو مشااو .. شدات اللا عيشة طاكسي كورصة تا لفاس و حطها قدام باب الرياض و نزلو كيهبطو الصيكان .. دخلو و هوما كيحسو بالحنييين و الاشتياق، كيحسو بالانتماء لهاد الرياض و شحال ما بعدو مرجوعهم ليه .. بداو يخملو الدعوة و يسيقو الاغلبية غي صفية و طامو زهرة جراو عليها لفوق ترتاح، اما اللا عيشة بقات بجلابتها جلست شوية و خرجات
عيشة: شوية و نجيي .. انشوف اللا شافية تجي تشوف زهرة
زهرة: انا مزياااااااانة غي بلاما تجي
عيشة:(بقات ضور بجنابها بحالا كاتقلب على شي حاجة) اجي اجي هزي وذنك راكي نسيتيها هنا
زهرة:(جات داخلة) حرام عليك ا خالتي ديما قاصفاني
عيشة: زيدي تركني لهيه .. تا نجي و عندي معاكم هضرة
خلاتهم وحدة تشوف فوحدة ماعارفين اش غاتقول ليهم كاع و صفية ملامحها باقيين محافظين على داك الحزن .. فسروه بأنها ماسخاتش من هاد الايام ديال الراحة و لكن السبب غيير ، خرجات كدور بين ازقة فاس و دروبها تا وصلات لدار اللا شافية دقات و دخلات ، استقبلتها البنت بترحاب كبيير خلاتها جالسة فوسط الدار و خرجات اللا شافية من البيت كضحك ترحب بيها و تعاود
شافية: مرحبا مرحبااا و نهار كبيير هادا ياختيي .. زارتنا البركة
عيشة: يحفظك ا خييتيي .. كي دايرة مع الصحيحة!
شافية: هاحنا حمدالله .. كي دايرة نتي و كي بقات ديك الزغبية عندك
عيشة:(تنهدت) حمدالله .. مرة دايرة عقلها مرة تبقى طيير (جابت البنت اتاي و طباسل الفاكية و الحلوة) ديتها للصويرة غي باش تبدل الجو و ترتااح ، صدقات ليا البنت مجذووبة فينما شافت كناوة تبعهم و تبقى تجذب تا تسخف
شافية:(جبدت حنكها بصبعها) اويلي ياكما مرياحة!!
عيشة:(جغمت من كاس اتاي) الهبال هاداك ماشي لريااح ..مامرياحة ما مسكونة لقات راحتها فالجذبة خليتها تجدب تا تعيى واش انا مانعرفش كي داير لرياح ، بغيتك غي تمشي معايا تقلبيها و تشوفي داك التيلاد فكرشها .. واالو راسها قسح من الرخام
شافية:(هززت راسها) اوا ماعليش ماعليش .. البنت عاد صغيرة راك عارفة ، واخا قراناتها فالجبل مادين يدهم للحنة و مهيئين لهادشي ولايني هي جاها كولشي على غفلة
عيشة: يهديك الله اللا شافية البنت باقة بززة و كاع لي يزوج بناتو و هوما مزال شابعين لعب خاصو الحبس ، قاطع يدو من الرحمة مسيفطها تكرفس و هي مزال ماشبعات تا تنقاز فالتراب
شافية: اوا الله يهديهم .. كاع تزوجنا صغارات اللا عيشة
عيشة: كل زمان و زمانو اخييتي .. مهم جيتك على حاجة خرى
شافية: الله يسمعنا خيير .. هانا (رمات لوزة ففمها) اتيني بما عندك..
عيشة: بغيت نزوج زهرة
شافية:(هزت حجبانها فيها) جاوها شي خطاب ولا!!
عيشة: لي كيشوفها معايا كيبغيها و خطبوها مني ما عشرة ما عشرين .. ولايني مابغيتهاش تبقى هنا، بغيتها تمشي للخارييج و جيت نتشاور معاك ، راه النعاس حرم من عيني
شافية: ولاش مابغيتيش هنا!!
عيشة: و شكوون غايقبل بوحدة حاملة غي قولي ليا
شافية: هااادي عندك
أنت تقرأ
أعد لي روحي
Romanceأخيرا عزيزاتي القارئات كتاب المكتاب و تقدر لهاد القصة تشوف الضوء و تكتمل... ♡ أعـــــد لـــــــي روحــــــي بــقلــمي: غـــزلان مـــرزوقــــي ♡𝖒𝖎𝖘𝖘 𝖌𝖍𝖆𝖟𝖆𝖑𝖎 °°كـــــلــــماتـــــــــــي°° كالنهار المشرق *هي* .. و *...
