أعد لي روحي

Part 69

♡أعد لي روحي
♡غزالي
☆الفصل الرابع: نبضات رعب
☆الجزء 69

دخلات للمستعجلات كدور عينيها و تسول تا نعتولها فين غي وقفات على راسها طاحت عليها بتعنيقة و زهرة بحال داك العطشان وسط الصحرا ولقى الواحة.. تنهدات براحة و دموعها دارو سررر  هبطو مسرسبين مع حناكها لي رجعو مزنكيين بكثرة الخلعة و الخوف و البكى

عيشة: صافي هانا معاك .. ماتبكييش

زهرة: قلبي غايسكت ا خالتي .. واللهيلا قريب يسكت

عيشة: شوووت .. غانلقاو حل ، عاودات ليا كولشي صفية

زهرة: وكان شدني يذ بحني فبلاصتي

عيشة: ماحنا على فالك ، غي صدفة و صافي و عمرها تعاود .. رتاحيتي شوية!! كتحسسي بشي حاجة

زهرة:(حركات راسها بلا) مكنحس بواالو

تنهدات عيشة كتهزز راسها و سارطة شنافتها .. مصطانعة القوة و واقفة جبل مايهزو ريح باش ماتخلعش زهرة، و هي قلبها كينبض برعب شديد .. زهرة عندها عزييزة و مقطرلها من عينيها ، ماشي بزاف باش تعرفات عليها و لكن دايرة بحال النقيطة ديال العسل تقطرات على قلبها.. كانت معنقاها عندها ، بعدات وجهها شوية كدوز يدها على شعرها و بقات تشوف مع جنابها

عيشة: اش قالك الطبيب

زهرة: خاصهم يديرولي التلفزة باش يشوفو البيبي شحال عندو (قلبها نبض بعنف) خايفة اخالتيي

عيشة: تا انا خايفة .. و لايني ضروري تشوفك الطبيبة نتاع النسا

زهرة:(حركت راسها بلا) غانمو ت غي بالخلعة ا خالتي .. هالعار لاما عفيني مابغيتش ندوز

عيشة:(خنزرت فيها) لي فكرشك رااه ولدك ا زهرة .. واش ساخي عليك!! من التنقيزة للطيحة و دبا السخفة .. راكي مستهترة بلا قياس

زهرة:(بعدات و ضورت وجهها) من عندي غي يموت .. وكان ماحلفتينيش كون رميت راسي من اعلى سطح كاين هنا .. ماكرهتوش يتزاد ميت

عيشة: الله يهديك و ماتقصحييش داك الراس

زهرة:(نفاعلت بلاما تحس) هااديينيي .. بغيت نمشيو

عيشة:(بتاسمت باستهزاء و هزت حجبانها) شفتي ماحدك كتمنايه يموت و هو لاصق فيك ، نهار تشبتي بيه نهار يمشي و يخليك (شافت فالسيروم) انا نشوف شي حد يحايد ليك هاد العجب..

شافت واحد الفرملية طلباتها تحايد ليها الشوكة و داكشي لي دارت حيت السيروم تسالا .. بقات عيش  تزنزن باش يمشيو لجهة الولادة تشوفها شي جينيكولوغ ولكن زهرة راسها قسح منو ماكاين .. الحجر و يتهرس و هي راسها لا ، تسلتات هاربة تابعاها عيشة مسلمة امرها لله تا من التحاليل سمحو فيهم .. بكثرة خوفها يعرفوها حاملة و هي قاصر و عازبة ، ايلا قالولها فين باه باش تجاوبهم!!