أعد لي روحي

بارت 59

♡أعد لي روحي
♡غزالي
☆الفصل الثالث: مقطووعة من شجرة
☆الجزء 59

دوزو ليلتهم فالضحك و التقشااب و زهرة غي لقات ديك العقدة مع زادت فيها اللا عيشة العسل الحرررة بقات غي دور و تاكل .. غنية بالفيتامينات و المعادن و مع اول حمل ليها و مزال صغيرة مابغاتهاش دهور صحتها، مع معروف انو الجنين باش يكتاامل النمو ديالو كياكل مع ماماه و فاش مايلقاش حاجتو الكافية كياخذ الكالسيوم من عظامها و سنانها .. شدات كل وحدة بلاصتها مكمشات و زهيرو ربي حن عليها و همد الحريق ماضارش بيها من فاش ناضت ، تكمشاات و عيشة عند راسها كيف العادة و كيف ولفاتها كتفلي شعرها و تحك فراسها تا كترخى و ترتااح عاد كتحبس

طامو: وكان غيي تديوني معاكم غذاا

عيشة: رحمة غاتجيب تا هي زوج بنات .. داكشي لاش مابغيتش نكثر انا

طامو: اوا لا هاكا ماعليش مرة خرى

زهرة: سيري فبلاصتي

عيشة: اوا يالحادكة داك الدجاج شكون يطيبو

زهرة: اخالتي نخااف

عيشة: شهرين على قدها و انا نعلم فييك .. شهرييين و نتي تعاونيني فالتشرميل و الطياب و داك النهار طيبتي و جاا زوين دبا مال مك كتمهبلي

زهرة: اوا صاف اخالتي صاف انطيبو و كيفما جا هو هاداك

صفية:(دايرة يدها على عينيها) يدك بنيينة ا زهييرو كاع ماتخافي

عيشة: اوا نعسو نعسو وكان .. طامو طفي داك القندييل حداك ابنتي

تنهدات طامو طفات القندييل و سرحاات كل وحدة فعالم احلامها على امل يصبح صبااح زويين و يجيب ليهم معاه خبارات زوينة و ساعات كتفرح .. كل ما تحطي راسك على الوسادة تفائلي خير و ديما قولي غداا غايكون حسن من اليووم ، خلي النية زوينة و غاتلقاي كلشي زوين قداامك .. صبح الصبااح و صبحو الطيوور كيغردو و الخصة كيشرشر منها الماا فريتم واحد عجييب ، ناضو البنات فنشااط كيطويو الفراش و زهرة مزالها مكرشخة بحال مقطوعة الرااس .. نعاسها تقااااال و كاع ديك الحركة ماحسات بيها والا فيقاتها ، دخلتت عليهم عيشة بقفطانها كالعادة عاكسة راسها لور بشد حياتي و مشمرة على ذراعها ملصقاهم فالشمار و محزمة بحزام مجدوول فالصقلي و لابسة شربيل عالي شوية تا هو فالصقلي .. صبحات على البنات و شافت فزهرة هازة حجبانها و قربات مادة ليها يدها كتهززها و الدمالج كيتهززو معاها

عيشة: زهييرو .. والوااه يابنيتي ماشي ديالك هادي ، زهييرووو

دوزت يدها على راسها تا بدات ترمش فيها عاقدة حجبانها شافت فيها و رجعت سدت عينيها كتهضر مسهسهة

زهرة: ماقادراش نوض ا خالتي .. النفس مقطوعة فياا

عيشة:(عزات عليها) بداك الوحم يالزغبية (تنهدت) باش كتحسي!!

زهرة: ذاتي مرخيية و ماقادراش نتحرك .. فيا السخفة

عيشة: صفية جيبيلها ديك الطاس ديال العقدة ديالها جيبي .. باينة الطانسيوو طاحلها

طامو: صفارت مسكينة

عيشة: ربي معاها و خلاص .. زهيرو .. هاكي كولي شوية باش توكضي ، طامو سيري جيبيلها شوية جبن يطلعلها الطانسيو باش تقدر تحرك سيري

و داكشي لي كان ، عاونوها تكعدات غسلات وجهها و فمها و رجعت لبلاصتها رجليها خاويين ماقادرينش يهزوها ، كلات زوج معلقات من العقدة و شوية جبن و رجعت لبلاصتها سدت عينيها .. الارض حاسة بيها كتميل ميلان و وذنيها كيصفروو ، بقات هاكاك شوية تا حساات براسها بدات تبت و مابقاتش ذاتها مرخية .. حلات عويناتها كترمشهم و بدات تكسل لقاتهم حاطين الطبلة و كيفطروو..

زهرة:(هزت حجبانها) نتوما كي درتو ليها كي درتو هزيتو و حطيتوو

طامو: وكان هزيناك نتيي ياختي والله ماتحسي راك غرقتي ماشي غي نعستي