أعد لي روحي

بارت 25

♡أعد لي روحي
♡غزالي
☆الفصل الأول: انا انهار انا اتلاشى
☆الجزء 25

طلع بخطواتو المبهرجة كل مرة تلقاه فشكل .. مرة رزيييين و حكيم الحكماء .. مرة هو الطوب فالهوبالا و السايكوباطيين ، دخل للدوش كيدوش و يدندن سالا الدوش ديالو و خرج ببينوارو كيدور و ينشف شعرو .. بنيتو عادية كأي شاب فمقتبل العمر ، ماضعيف ماعامر مامفورمي .. تلاح فالسرير كيشوف فالسقف ، و الله ينجيك من واحد قاري علم النفس .. ماشي قاري ديك القراية نتاع والو لاعبها خاااتر كوم كوا راني قاري علم النفس و كنفهم و كذا و كذااا .. لاا لي قاري علم النفس كيعرف كيفاش يقرااك و يقرى شخصيتك بالبيان .. موراها كيعرف كيفاش يلعبك على صباع يديه بحال الكراكيز ، يقدر يلوحك لساابع ارض و يرجع يطلعك لسابع سما .. يلعب ليك على النفسية ديالك حتى بلا هواك تشوفي فيه الملجأ و الهلاك فآن واحد ، لبس ملابس عادية كاجوال و هبط مع الدرووج ينقز بتلاتة و بربعة ماعاقو بيه تا كان زدح الباب ، هز باه راسو كيشووف و رجع يشووف فالتلفزة .. عارفو اش كيدير و اش كيرون و مخليه غادي فهبالو .. بصح نهار يقولو تحرك غايمشيه كيف بغى هو ماغايخليهش على هواه ... ديمارا غادي لفاس مكمش فجاكيط سخووونة من البرد ، طاحت فبالو واش فاقت زعما ولا مزالها ناعسة !! تنهد و مرة مرة كتزورو فمخيلتو شفايف المارشميلو و ديك الشامة لي طابعاهم ، اما عيون العسل هاديك حكاية اخرى .. تنهد و افكارو مضاربة ، اش هادشي ولا يجييه لبالو!! زير على الفولون و زاد كسيرا داخل لفاس كيدور بين ازقتها و شوارعها و الناس غادية و كتزرب باش كلها و يدخل لدارو ، السما بقالها شوية و تظلاام .. و بعيد شوية على صخب المدينة ، فهدوء المستشفى و اروقتو .. جالس داير رجل على رجل و لاخر جالس حداه محرج ، داير يديه على ركابيه و كيغزز سنيه .. عينيه حووومر بكثرة الاعصاب و اللقوة لاجمة لسانو من لي سمع ..

احمد: شووف اسي بلحسن .. ختك مريضة و مهدوودة على وجهها ماتغوتش قدامها

بلحسن: مرمداات وجهي فالتراااب .. مرمداااااتووو و ماخلاتلي فيين نهز الراااس نلقاااهاا نشرب من دمها و مايبردلي جووف

احمد: بالشوية ماتغوتش راحنا فالسبييطااار .. انا عيطت لييك باش نلقاااو الحل ماشي تزيد تكفس ليا على حالة ميرا .. هانتا ندخلو نتا برد و برد الخاطر لختك انا مزااوك ، و راه واعدتك غانقلبو عليها و نلقاوها فينما كاانت

بلحسن:(كيهزز راسو) اححح على بنت الحرام اححح .. غي كية مها و زادتني هي كية ، سارقة ختي و هااربة .. هاااربة بنت الحرام اش كان ناقصهاا اااش

احمد: برد برد اسي بلحسن .. يالاه ندخلو

طبطب على ظهر و ناض سابقو بديك الكرش فحين سي بلحسن ناض بكسوتو السخوونة ، توني سخووون مع بروتكال قداش شاد عليه البرد و جلابة ديال الصوف من الفوق مع طربوش سخيخن .. وجهو فيه التجاعيد ، وكان جاو يهضرو كل تكميشة عندو فوجهو معاها حكاية .. دخلو عليها كانت مجبدة مهدووودة بالبكى غي شافت خوها سلمات على خوها بالتعناق و تحنات على يدو تبوسها .. تنهدات و قابلت الفيروزيتين ديالها مع عينيه

ميرا: سمحلي اخويا سمحليي .. سمحلييي فرطت فالأمانة ديالك اخويا فراااطت

بلحسن:(كيتنهد بقالو شوية و يبكي) غانلقاوها اختي غانلقاااوها غي تهدني باش ترجعي صحتك (بتوعد فنفسو) نهار نلقاها نذبحهاا

ميرا: كي غانديير نشوف فييك .. غفلت ليلة وحدة البنت طاارت

احمد: يهديك الله ا ميرا .. واخا كون كنتي تماا كانت غاتهرب راها كانت عواالة غي هزات الذهب و صداات

ميرا: نتااا سكتتت الشلاااهبي

خنزرات فيه وكان صابت السم تسوطو فيه .. اما هو قلب عينيه كينحنح خلاو بلحسن غي كيشوف بعويناتو و ساكت ...