♡أعد لي روحي
♡غزالي
☆الفصل الخامس: هدنة
☆الجزء 72
صبح صباح جديد .. صباح مشمس و دافئ على غير العادة بعد ليلة ماطرة بأمطار غزيرة .. قطرات الشتا مزال عالقة فأوراق الاشجار و فالزهور ، زقزقة العصافير المرحة كتسمع من كل دار و من كل رياض .. و الجو مبهج كيخليك تحس بالراحة رغما عنك ، غي باستنشاق كمية قليلة من الهوا ترتاح و قلبك يتفاجى .. فرياض اللا عيشة ، كان الهدووء سيد المكان .. مزال الثمنية ديال الصباح ، الكل مزال ناعس حيت سهرو لوقت معطل الا اللا عيشة حيت عقلها تبرمج على الفياق بكري ،ريحة الفطور فايحة فالريااض .. بيض بلدي مقلي فالزبدة البلدية ، و حريشات صغار ديال الزرع .. و اتاي مشحرر مشبشب ، فطور طبيعي يفتح النفس و يعطي الجهد .. فيقات البنات هوما لوالا و تبالات بزهرة هي تفيقها منا و لوخرى تقلب ليها الجهة لوخرى من لهيه ، مافاقت تا شيباتها
عيشة: واش ماباغاش تمشي (غزرت فيها) نوضي تكعدي و فالطريق نعسيي
زهرة: عاافاك اخالتي عافاك غي شوية
صفية:(طلات عليهم) الوحم جاها غي على النعاس
عيشة:(تنهدت دايرة يد على خدها و اليد لوخرى على جنبها حارت ليها معاها) داكشي لي بان ليا .. جمعو البيت و دوزو تفطرو ، خليها تبقى هنا يضربوها الحيوط..
زهرة: حراام عليكم غي شوية و نووض هاااء
رجعت تقلبت تكمل نعاسها و داكشي لي كان غفااات تا رجعو يفيقوها بالزعااف ، ناضت كتأفف فطرات و جمعات حويجات قلال فالصاك.. اصلا داكشي ماعندها ، لبسو ملابس عاادية مع لي بوط على حساب الشتا و خرجو فاتجاه المحطة .. و باش مايتكرفسوش خدات اللا عيشة طاكسي كورصة تا للدار لي فالصويرة .. موكادور ، مدينة الرياح .. مدينة فيستيفال كناوة الموسيقى الروحية .. مدينة الساحل ، ملي دخلو للمدينة و هي معلقة عينيها على الشوارع . الزناقي .. الديور ،مدينة جديدة كتكتاشفها بعيون لامعة و الريح كيضرب فوجهها و يلعب بشعرها ، دخلات قدر كبيير من الهواء مع نيوفها و زفراتو من فمها .. كانها كتجدد طاقتها و كتقول ماعليش ، كولشي غايدوز كيف داز لي قبلو .. وقفو قدام باب الدار نزلو و كيكتاشفو المكان بعينيهم تا جات عيشة كتجبد السوارت .. حلات الباب سمات الله و دخلات برجلها ليمنية كيف كدير فكل بلاصة و فكل دار ، دخلو وراها البنات كيكتاشفوها كانت دار مصلوحة و زويينة .. صباغتها المخلطة بين البيج و الغوز كتبعث الدفئ فالنفوس ، كانت غي سفلي و فوقو سطح .. و لكن كبيرة ، صالون كبيير مفتووح و كوزينة قدها قد السخط بالرخام ، ربعة البيوت خرين و زوج حمامات .. كولشي مفرش و كولشي مغطي بإيزارات بيضين و فوقهم الجلد كبير ديال النوامس الكبار مغطيهم من لفوق باش مادخلش الغبرة ، جامعين فقط الطابيات شي لاخر كولشي باقي هاكاك ..
زهرة:(بعيون لامعة) ديالمن هاد الدار اخالتي..
صفية: دار ولدها البشير لي فألمانيا
زهرة: ناري غزااالة
طامو:(كدور تا هي عينيها) ااه بزااف .. خاصنا نسيقو هادشي و نحايدو الغطاوات
عيشة:(كتحل الريدويات) كولشي ساهل ماكاينش الخدمة بزاف .. يالاه نتعاونو باش دغيا نساليو يالاه
تعاونو كل وحدة اش كدير و زهرة عاطيينها غي الساهلة و فينما كان الما مبعدينها عليه خايفينها لا طييح ، تنقات الداار تشمساات و تهواات و كل وحدة فين شدات قنت جلسات كترتاح
عيشة: انا نمشي نجيب التقضية
زهرة: خاص وحدة فينا تمشي معاك اخالتي
طامو: نتي غي رتاحي عارفينك كمارتك كمارة النحس نتي هاربة من المصايب و هوما تابعينك
زهرة:(شافت فيها مجبدة شنايفها مغددة) ايلا ماسكتيش غاتجيك اكبر موصيبة غاتشوفيها فحياتك تشتف عليك شتيف الموانط
عيشة:(قاطعاتهم) صااافيي .. بديتو تانيي ، بغيتو ماتمشيو تا تشوهوني مع الجيران (زفت على طامو بزيف) زيدي نتي معايا .. زيدي تحركي يا زريعة الكتان يا سليطة اللسان .. الناس عندهم كيقطر العسل و نتي عندك كيقطر القطراان
أنت تقرأ
أعد لي روحي
Romanceأخيرا عزيزاتي القارئات كتاب المكتاب و تقدر لهاد القصة تشوف الضوء و تكتمل... ♡ أعـــــد لـــــــي روحــــــي بــقلــمي: غـــزلان مـــرزوقــــي ♡𝖒𝖎𝖘𝖘 𝖌𝖍𝖆𝖟𝖆𝖑𝖎 °°كـــــلــــماتـــــــــــي°° كالنهار المشرق *هي* .. و *...
