أعد لي روحي

Part 76

♡أعد لي روحي
♡غزالي
☆الفصل الخامس: هدنة
☆الجزء 76

...: السي الساويرس زيد مرحبا

وقفات مصمكة من الكنية لي سمعات .. ديك الجملة وكضااتها و بقات تقول فين انا! بقاو عيشة و صفية غي يشوفو زيرت على يديهم و زادو خرجو هاربة من داك الجو لي خنقها و قطع فيها النفس .. اما السي عيسى تبع العين لصفية مخيخ لي دخلات فيه و ماقالتش ليه تا سمحلي ، فالأخير قلب وجهو و زاد داخل يحضر للحضرة الكناوية .. تهز عيسى و تحط عيسى اخر ، كيجذب و يحضر متنغم بالموسيقى و الطبيل .. عيسى منو عدااد ، و الحضرة مكتعرف لا كبير لا صغير .. لا غني لا فقير ، لي تخشى فهاد العالم جامي يحلم يخرج منو .. فينما كان شي موسم ولا شي حضرة تلقاه مخشي فيها ، خصووصاا خصوووصا موسم مولاي ابراهيم لي يستحيل يراطيوه محبي الملوك باش يجددو معاهم العهد و يخدموهم باش يوصلو للي بغاو .. عيسى واحد من الالاف ديال رجال الاعمال لي عندهم حجرة ثقيييلة فالبلاد ، قااري و واعي و تلقاه متبع هاد الاهواء .. تلقاهم دكاترة ، محاميين .. سياسيين .. رياضيين .. فنانيين .. رجاال دولة دماغهم عامر و فاش كيوصل الموسم يتهز بنادم و يتحط اخر تلقاهم هوما اللوالا و السباقين للموسم بلا الذ.بيحات او القرا.بين لي كيسيفطوهم .. و فلووس صحيييحة كيحطوهم ، ليلة الجذبة او ليلة الحضرة كتكون عندها طقوس خاصة .. خطينا من المواسم لي كيحضر ليهم خاصة الخاصة و غير شكون و شكون ،  يقام فهاد الليالي ديال الموسم الصاخبة ليالي الزار بالمغرب ليال الس..حر و الد جل و الفنتازيا .. كيقومو السحرة والعياذ بالله كل عام من تجديد العهود بينهم وبين خدامهم السفليين حسب وقت فلكي معين ودقيق واغلب هذه الاوقات تكون اما بالمولد النبوي الشريف او النصف من شعبان وكتقام على شرف الملوك السبعة بالمغرب الميامين و الملكة السوداء عائشة .. الباشا حمو .. سيدي موسى .. لالة مليكة .. لالة ميرة .. شمهروش .. و البوهالي ، كتكون طقوس و بخور و ذبا..ئح و اتواب خاصة لكل ملك .. ولا تكتمل هاد الطقوس الا بحضور فرق موسيقية مختصة في الجذب او الزار ومنها كناوة .. جيلالة .. حمادشة .. اما الليالي العادية كتقام على شرف واحد فيهم فقط ، كتكون الذ..بيحة و الطقووس الخاصة كذلك ولكن بسيطة نوعا ما، و عكس الموسم لي كيحضرو ليه غير خاصة الخاصة ، ليلة الحضرة كتم باحترام دقييق لطبائع الجن و المزاج ديالو و كذلك احتراام شديد للحضور و المدعووين و اعطائهم حقهم فالاحتفال و الترحيب (معلومات من عمي كوكل و يوتوب) .. و هادشي علاش دخلات زهرة بلا تا شي مشكل تابعينها البنات و اللا عيشة ..دخلو للدار كان الليل طااح و الكزز ديال البررد ، لحمهم بافي مشوك من المناظر و الموسيقى ديال كناوة .. اما زهرة مرفوعة ماعارفة كاع كيفاش طرالها تا ترفعات و تسلباات ، البنات شكو فيها مرياحة .. و اللا عيشة رجحات بأنو موسيقى كناوة اصلا روحانية و حيت زهرة صغيرة و مضيومة ترفعات و ماحسات تا بدات تجذب .. مجموعين فالصالون و السكااات سيد الموقف كيدخل الرعب فبنادم

زهرة: مالكم ساكتين

ضورت عينيها عليهم كيبرييو و مزينكة و الشفايف حمرين بحال الكرز .. عضت شنافتها غاطسة راسها بين كتافها فاش رمقوها كولهم بنظرة وحدة ، عارفة راسها دايراها قد طرمتها و زايدة كتسول مالهم ساكتين

عيشة: عا تي غا قولي ليا وجهك هاداك ولا قفااك ءءااا

زهرة:(رمشت فيها ببراءة) انا مادرت والو

عيشة: الجنون لي دارو يااك

طامو:(دفلات فحوايجها) بسم الله الرحمان الرحيييم

زهرة:(شافت فيها) تي غاا سكتيي الجنون والله و يشوفوك يحاسبهم وحدة منهم

طامو:(هزت صبعها كتشير) خاااالتييي..

عيشة:(قاطعتهم) يخلييكم بالخلااا بزوووج .. سهروونا الليل هادااا الناس ناعسة .. نوضو عليااا وجدوو العشى ينوض عليكم جنااابكم قولو امين

زهرة: ماحنا على فالك اخالتي

عيشة:(هدت عليها) شوفي فيا اعينين موكة .. باراكة غا الفقصة لي فقصتيني قبييلة .. تهزي حسن مانوضلك و نتي مافيك عمرر تهززييي

تنهدت قالبة شفايفها و ناضت كتزدح رجليها مع الارض تابعاها طامو تا هي غضبانة زعماا.. تبعاتهم صفية بعينيها تا غبرو و شافت فاللا عيشة

عيشة:(كتغوت على طامو) اوا ضربي تما برجلييك تا نوض نجيك نشتف على بنتيي

صفية: خالتي هادشي ماشي عادي .. تقولي ماشي هادي هي زهرة ديال قبيلة ، عنداك تكون بصح مرياحة

عيشة:(حركت راسها بلا) مامرياحة والو .. عادي البنت مضيومة و فرغت ضيمها فالجذبة ماتعمرييش راسك بالخوى الخاوي

صفية: على الله اخالتي .. على الله

عيشة: وكان كانت مرياحة و مسكونة فاش يتطلق القرآن ماتحملوش .. واش لي كتسمع القرآن عادي مسكونة هادي!

صفية: اللاااا

عيشة:(غزرت فيها) اوا تهزي علياا من هنا تبعييهم
*******
ليلة النصف من شعبان قرباات 🙃🙃🙃 شكون لي قريبة لمولاي ابراهيم ولا الشيخ الكامل تصور لينا داكشي 🙊🙊🙊🙊🙊
البنات ماتنساوش طاكيو صحاباتكم شوية ترويج و اشهارات للقصة مشكورين عميرات