♡أعد لي روحي
♡غزالي
☆الفصل الخامس: هدنة
☆الجزء 78
امطار خفيفة كطيح مرافقة للثلوج لي كتبرق تحت اضواء اعمدة الشارع .. حركة المرور كثيرة بحكم انو الليل و الكل راجع لدارو يتكمش فيها ، بلا المارة كيتمشاو بالزربة مخبيين تحت المظلات من صقيع الثلج .. قليل لي تلقاه يتمشى بمهلو سوى ايلا كانو كوبل كيتمعشقو فداك الجو الرومنسي او شي واحد وحييد عايش وحدتو وسط الثلج ، امام واحد من الكازينوهات الراقية فلوكسمبورغ وقفات سيارة مرسيديس ملاسيكية مجبدة فالاسود كيتحلو بيبانها بالمقلوب .. نزل الشيفور هاز مظلة و حل الباب اللوراني ، خرج رجلو تا بان سباطو الاسود اللامع و نزل بكل نخوة و شموخ و نظرات حادة ثااقبة ، قاد قبعتو على راسو لي مكيستغناش عليها بحركتو الشهيرة .. منزل راسو لتحت شادها بيديه مدرقة عينيه ، قاد المونطو ديالو الاسود بيد وحدة و زاد داخل للكازينو ، استوقفاتو فالباب فاتنة خذات من عندو المونطو علقاتو و زاد داخل موراه الكارد لحمايتو و فنفس الوقت حاضيه .. وقف فالباب الدخلاني داير يديه فجيايو كيشوف غي من تحت رموشو و كيميز المكان كي داير و اللي جا على قبلو واش كاين هنا ولا لا .. زاد بخطوات وااثقة ، و لي شافو مكيعطيهش انو فبداية العشرينات من عمرو بسبب ثقتو فنفسو الكبيييرة و الكاريزما لي خلات هاالة كبيرة محييطة بيه .. رفع قنت شفايفو بابتسامة ماواصلاش لعينيه و مشى لواحد الطبلة جلس عليها خاصة بلعبة البوكر .. الطابي كان بالغوج ، و الموزع كيوزع الاوراق و اللاعبين كيحطو الرهانات ديالهم بمبالغ خيالية .. دار رجل على رجل كيتبع الجولة كي غاتسالي باش يدخل للجولة لي وراها ، جات وحدة كتمايل بلباس جد فاضح و مكيااج ثقيل و عطر مثيير .. مايكذبش هي فعلا جميلة ولكن جمالها باهت ، عينيه الفضية تعودو على واحد الجمال من نوع اخر لي يستحيل يلقاه فشي بلاصة ، استوقفها الكارد وقف حيط بينها و بينو ماخلاهاش دوز ليه و تا هي دغيا فهمت راسها و قلبت الطريق .. موسيقى الجاز مطلووقة كتنغم الواحد ، النوادل كيدورو بالصواني و الليكات فيديهم و لي بغى شي كاس كيمدو ليه .. قهقهات النساء العالية كل مرة تسمع من طبلة ، اما ضحك الرجال اثناء فوز شي واحد كيتسمع منين يا منين .. شير للكارد ديالو بزوج صباع هبط لعندو وشوش ليه فوذنيه حدو هزز ليه راسو و مشى .. رجع مع واحد من المكلفين بالكازينو جايب ليه البطاقات و الاقراص باش يلعب و يراهن .. كان المسكين مصدووم بالمبلغ لي صرفو تا قرب يطيح فمو للأرض بالصدمة ، طلع قنت شنايفو بابتسامة استهزاء .. المسكين ماعارفش غايكشط كاع لي فالطبلة و يخرج بفلوسو مدوووبلة .. تسالات الجولة بربح واحد فيهم و بدات جولة ثانية .. كل واحد حط المبلغ علاياش قاد ، و قبل مايتفرقو الوراق حبسهم لاغتيست و جبد كارطونة من جيبو الدخلاني دلافيست
أسيم: بغيت نلعبو بوراقي (شاف فاللاعبين) عندكم شي اشكال!!
...: ماكان تا مشكل الكتكوت .. ماشي مزال صغير على لعب الكبار
أسيم:(تكى براحة على كرسيه) نوغمالمون نتا لي كبرتي على لعب الصغار
حل فيه عينيه بالع ريقو من القصف مالقى باش يجاوب .. تسمعات قهقهة صغيرة من اللي جالسة جنبو فوق التكاية ديال الكرسي و شافت فأسيم بعدما عضت على شنافتها الملونة بأحمر شفاه د.موي قاتم و نطقت بلكنة فرنسية كتعااوج فهضرتها
...: واقيلة الكتكوت جاي يلعب و ماعارفش نوع اللعبة و قوانينها
ميل راسو بابتسامة مستفزة رامقها بنظرات رصاصية و شار للموزع باش يبدا يفرق الكارطة .. وسع ابتسامتو و طلع حاجبو فيها
أسيم:جاي نلعب و عارف اش كنلعب و كنعرف نلعب تا بحال اللعب ديالك القطيطة (غمزها)
...:(بلعت ريقها) كيفاش مافهمتش!
أسيم:(غمزها) مع الوقت غاتفهمي ا مدام
أنت تقرأ
أعد لي روحي
Romanceأخيرا عزيزاتي القارئات كتاب المكتاب و تقدر لهاد القصة تشوف الضوء و تكتمل... ♡ أعـــــد لـــــــي روحــــــي بــقلــمي: غـــزلان مـــرزوقــــي ♡𝖒𝖎𝖘𝖘 𝖌𝖍𝖆𝖟𝖆𝖑𝖎 °°كـــــلــــماتـــــــــــي°° كالنهار المشرق *هي* .. و *...
