♡أعد لي روحي
♡غزالي
☆الفصل الخامس: هدنة
☆الجزء 75
عياو يعيطو .. عياو يلغاو و هي لا بغات تكلم ، فوذنيها غي صوت كناوة .. القراقب و الكنبري و الطبل ، بلا الاغنية ديالهم لي رفعااتها و سلبااتها .. كناوة معروف عليها كتسلب ، و بنادم ايلا كان مضيوم تبكيه بلا هواه .. كتخلي اللحم يشوك و الكلمات كتلامس القلب ، هوما غاديين و هي تابعااهم و اللا عيشة و البنات تابعينها و كيغوتو باش توقف من ديك الزربة لي كتزرب .. كانو ضايرين على بلاطو فيه ماء الزهر و الشمع و زلافة دياال الحنة .. كيطبلو و يدورو عليه ، و الناس معاهم واقفين و كيتهززو .. تهز داك البلاطو دخلو بيه للدار مكملين على طبيلهم و تبعوهم الناس داخلين ، و تبعاتهم تا زهرة دخلات مرفووعة و ماحاساش بلي ضاير بيها .. غي شافتها عيشة دخلات معاهم شدت على راسها كترعد بالخلعة و الأعصاب و ضربت ففخادها
عيشة: اويلي بنت الحرام دخلت معاهم
صفية:(تزاد معاها الزايد) يالاه نخرجوها
عيشة: زييدوو و قراو القرآن فخاطركم قبل مادخلو ياالااه
دخلوو فور ماوصلو للعتبة و خلو ففمهم فلي طاري تماا .. عيالات و رجاال كيجذبو ، و البخور مطلوق بكمية كثيرة تا الدخان عمر المكان و مابقاش بنادم يشوف لي حداه ، كاين لي كيجذب و يضرب راسو بالجنو.ي بلاما يتجر.ح .. و كاين لي كيشطح و هاز الشمع كيقطرو على لحمو بلاما يتحر.ق ، بقاو يدورو عينيهم مخلوعين داخلين فاللا عيشة مكمشات و عيشة شاداهم مزيرة عليهم كيقلبو على زهرة تا جاو عينيهم عليها .. واقفة وسط كناوة كتجذب براسها و شعرها كيمشي و يجي بتناغم جد كبير مع الاغنية و الطبيل..
الله الله ا بابا ميمون
أبا و با اش كان سبابي من غير صحابي
الله الله ابابا ميمون
انا انا انا
انا الكناوي بوتارزة
الله الله ابابا ميمون
والكناوي السالبني
هاهو جا بابا ميمون
الله الله ا بابا ميمون
قلتي الكحل رانا لبستو
قلتي الجاوي رانا طلقتو
الله الله ا بابا ميموون
مشاو لعندها و اللا عيشة جراتها باش تخرجها ولايني زهرة ولاو فيها عشرة ، غي هي كتجرها و زهرة كتدفعها و كتولي تجذب و تحضر
اه كويتيني دبا نبرى
راني كناوي ديال الحضرة
الله الله ابابا ميمون
وابا وابا واباا
واش باني ميمون
الله الله ا بابا ميمون
مالي يا ربي مالي
مالي من دون الناس
الله الله ابابا ميمون
ياواحد بايت فملكو هاني
ياك انا بايت عساس
الله الله ا بابا ميمون
الغناوي مشى للسودان
جاب خادم غناويا
الله الله ا بابا ميمون
بغيت حقي في عدياني
حتى نشوفو بعينيا
الله الله ا بابا ميمون
السالبني
بابا ميمون
الكاويني
بابا ميمون
بدا الايقاع يرتافع و الريتم يطلع و الجذبة تجهاد .. زهرة ماعارفة كاع اش كدير و البنات مخلوعات فيها اما اللا عيشة قلبها مشى و جا عليها .. غوتااات غوتة لربي لي خلقها كتجذب بكاع جهدها مع اخر ضربة فالطبل و ضربة فالقراقب مع الطيحة جات كااو مغيبة ، ضارو بيها مخلوعين فحين الحضور كلها و اش كيقول و كناوة بداو اغنية جديدة و مبعدين عليهم شوية
...: ديرولها مازهر شوية و تفيق
...: المسكينة صغيرة و مرياحة
...: الله يفاجي من عندوو
...: الله معاك و معاها الشريفة و الله يفرج
عيشة عقلها مرفوع مع زهرة كاع ماسامعاهم اش كيقولو .. و صفية مجلسة عندها زهرة فحين طامو قلبات على الما كترشها بيه تا بدات تنين و توكض شوية بشوية
عيشة: زهرة .. زهرة كتسمعيني !! زهرة شوفي فياا
لسانها تقاااال و عينيها كترمشهم بالشوية و صدرها كيطلع و يهبط .. نهجت كتحاول توكض و طامو جابت تاني ماء الزهر كتفزك ليها يديها كتحكو فالمعصم و كدير شوية فعنقها
صفية: زهرة .. كتسمعيني .. عارفاني شكون!!
زهرة:(بلسان تقيل) ببغيي..ت لماا
عيشة:(كتشربها) بنااقص من هاد الخرجة و بناقص من الصويرة كاملة .. زهرة قادة تنوضي!!
زهرة:(حلت عينيها فيها مضهشرة و فشلانة) ءءاا .. ااه نقدر
تنهدت وقفو بزوج و وقفوها معاهم كاع فشلانة و مرخخيية بلا قياس .. تنهدو البنات و عيشة قلبها وجعها عليها ، شادينها مخرجينها بالمهل من وسط الناس تا ضربت صفية فواحد خنزرت فيه و كملات طريقها مخلياه متبع ليها نظرات رصاصية ، كان سابقو واحد السيد فاش شافو ماكينش حداه رجع لعندو كيشير بيدو
...: سي عيسى واش كاين شي مشكل .. زيد تفضل من هنا اسيدي...
أنت تقرأ
أعد لي روحي
Romanceأخيرا عزيزاتي القارئات كتاب المكتاب و تقدر لهاد القصة تشوف الضوء و تكتمل... ♡ أعـــــد لـــــــي روحــــــي بــقلــمي: غـــزلان مـــرزوقــــي ♡𝖒𝖎𝖘𝖘 𝖌𝖍𝖆𝖟𝖆𝖑𝖎 °°كـــــلــــماتـــــــــــي°° كالنهار المشرق *هي* .. و *...
