♡أعد لي روحي
♡غزالي
☆الفصل الثالث: مقطوعة من شجرة
☆الجزء 50
خرجت من الكوزينة خلاتها تخدم براحتها ، فحين هي طحنات بصلة و مطيشة مع الربيع و دارتهم فطنجرة مع العطرية و الثوم و الزيت و شوية زيت العود و كويرات ديال الكفتة .. دارت القدر ديالها ديال الما و مشات للمواعن تغسل كملاتهم ستفات كولشي و رجعات لديك الطنجرة كان كولشي طاب تقريبا و رمات معاهم التشيشة بعد ما غسلااتها .. بقات تحركها كل مرة شوية تا طابت و نسمتها بشوية زعتر و هزات الطنجرة مع الزلايف للبيت .. كانت الشتا خفافت تستحلى التمشية فيها ، حطت كولشي فالطبلة زادت جرتها عند عيشة و تكمشت فكاشتها كتسخن يديداتها من البرد فحين اللا عيشة كتخوي التشيشة فالزلايف
عيشة: الريحة هي رويييييحة نيييت
زهرة:(عينيها لمعو) اوا ذوقي ا خالتي بعداا و ردي عليا الخبااار
عيشة: يا بسم الله
هزت معلقة برداتها شوية و خذاتها لفمها .. حركت راسها بتأني و زادت معلقة ثانية و زهرة عينيها معلقين فيها .. شافتها ماقالت كاع والو ، جرات تا هي زلافتها كتاكل و عيشة كتشوف فيها مرة مرة
عيشة: البنة كاااينة الله يعطييك الصحة
زهرة:(ضحكات) ههه شفتيي قلت ليك غاتاكلي عليها صبيعات يديييك
عيشة: مانكذبوش نااكل عليها صبيعات يديا و لايني قويتي شوية الربيع .. نقصي شوية على القدر لي كاديري و ردي عليا الخباار
زهرة: صافي واخا .. المرة الجااية ماتعااودش
تنهدت مبتاسمة و رجعت تكمل ماكلتها و التلفزة مزال كدندن و جبادة مع الاخباار .. تنهدات اللا عيشة بعد مدة و نطقات
عيشة: ايوا ا زينة الشلحات
زهرة:(ابتاسمت بأسى) هانا ا خالتي
عيشة: بغيتي اتاي صحراوا ولا اتاي سواسا!
زهرة: اتاي سواسا هو لي يليق لينا فهاد البرد
عيشة: هي لادرتيلنا شي بريريد دبا
زهرة:(ضحكات) سولتيني قلت كاع خالتي غاتنوض و ديرلنا كاس اتاي نتنغمو بييه
عيشة: ماحشمتييشاااي ءءااا
زهرة: صاف الالة هانا غانوض ندييرو اصلا تستاهلي .. الجلسة معاك كتفاجي و وجهك اخالتي منور و لي شافك يرتاح خاطروو و يتهنى قلبو
عيشة: لهلا يحاشمنا ابنيتي .. مادام القلب بيض و الخاطر صافي الوجه ديما يبقى منور و القلوب ليك ترتاح ، نوصيك وصاية ازينة الشلحات .. ماتحسديش ابنتيي شي واحد على شي نعمة عطاها ليه الله ، نوضي ديريلنا براد اتاي و اجي كاين شلااا مايتحكى (تنهدت) الله يكملك بعقلك .. سبحان الخالق لي رسمك .. و سبحااان من عطاك هاد تاسيع الخاطر كولو
زهرة: و كان خاطري ضيق ا خالتي ، وكان راني طرطقت من اول موصيبة (هزات الزلايف) هانا جاية
مشات و عيشة متبعاها بعينيها كتنهد تا خرجت من البيت
عيشة: مكتاب على دوك العينين يبكيو و داك الوجه يذبل .. ولايني غايجي نهار لي غاتشرقي فيه من جدييد و نجمتك ضوي سمااك (تنهدت كتهزز راسها) تلااطااش العاام و عقلها عقل تلاتيين عاام ، الله يبارك ..
أنت تقرأ
أعد لي روحي
Romantikأخيرا عزيزاتي القارئات كتاب المكتاب و تقدر لهاد القصة تشوف الضوء و تكتمل... ♡ أعـــــد لـــــــي روحــــــي بــقلــمي: غـــزلان مـــرزوقــــي ♡𝖒𝖎𝖘𝖘 𝖌𝖍𝖆𝖟𝖆𝖑𝖎 °°كـــــلــــماتـــــــــــي°° كالنهار المشرق *هي* .. و *...
