أعد لي روحي

بارت 52

♡أعد لي روحي
♡غزالي
☆الفصل الثالث: مقطوعة من شجرة
☆الجزء 52

اشعة الشمس كتختارق قطع الغيوم و ترسل دفئها للكون .. قطرات الندى متكونة على اوارق الشجر و الوروود ، كتلتاصق قطرة مع قطرة تا تكون قطرة ماء كبيرة كتنساب بهدووء مخلية ورقة الشجرة موراها و كطيح فالنافورة مخلفة وراءها صوت جميل .. العصافير كترفرف بجناحها مخلية اعشاشها و تغرد بصوت كيطرب الآذان و مكسر داك الهدوء لي كاين فداك الرياض .. قطرات المااء و تغريد العصافير ، و سمفونية جمييلة اخرى من صنع الطبيعة .. تكسلات فبلاصتها كتجبد مخرجة يدها من تحت الغطى و تقلبت للجنب الآخر تا تعرات شوية من ظهرها .. كانت كتصلي شافت حركتها خلال الضوء الخفيف لي تسلل عبر النافذة ، كملات تسابيحها و ناضت جرت الغطى على ظهرها خلاتها تكمل نعاسها كان مزال الحال شوية بكري .. و نزلات لتحت بالمهل عليها ، مرا و قاادة رغم كبر سنها الا انها محافظة على صحتها و عامرة ، دخلات للكوزينة كتوجد الفطور.. تا كتسمع الدقان حلات الباب و رجعت تكمل شغالها تاا نزلات زهرة ببيجامتها البنووتية و شعرها مجموع سفنجة منفووشة ، مزيينكة و العوينات معسلين و الشفايف منفوخين بحال مارشميلو .. دخلات للكوزينة كطل بعويناتها كتشمشم و دور بجناب عيشة

زهرة: صبااح الخيير خالتيي .. شهاد الرويحة الزوينة!! شكاديري عطيني نذووق

عيشة: كحزي لهيه و نتي لي ضاربك ضاربك على كرشك

زهرة: واعافاك ا خالتي غي شوية .. الزميطة هادي يااك .. ناري ريحة كتحمق

عيشة:(هزت فيها حاجب) واش تعاونيني ولا جالسة تشهاي عليا هناا

زهرة: هاهي غاتعاونك صاف صاف غي ماتبداايش بالموال على الصبااح (سمعت التقرقيب) شكون جاا!!

عيشة: جاو بنات ختي من البلاد ..

زهرة: ااااه لي مشينا عندهم دااك النهار .. غايجلسو بصفة داائمة هنا يااك ا خالتي

عيشة: اوا لا هداهم الله

زهرة: ييااااس

نقزت فرحانة و هزات الصينية غادة بيها للبيت .. دخلات لقاتهم بدلو حوايجهم و سلمات عليهم بالتعنااق تبوس و تعاوود ، كتجيها القنطة غي بوحدها فداك سيدي رياض كتهزو كامل و تحطو و كيبقى الوقت باااقي كتبغي تاكل راسها بالملل .. واخا مرة مرة كتخرج مع عيشة للخدمة فهاد الشهرين لي بقات معاها فيها ولايني كتقنط بلا قياس فاش مكتخرجش و تبقى النهار و ماطال و هي مقابلة التلفزة و الحيوط .. خصوصا كانت معمرة وقتها بالقراية و الرقص و الغنى ، اما دبا مابقى والو من الشي ليي كاان .. دبا جاب ليها الله لي يونسها و ينسيها فوحدتها ، اما تا الكآبة و الحزن لي كانت عايشة فيهم خرجاتها منهم اللاعيشة بلهلا يطريه ليها .. شهريين دازت فاش جات لفاس ، ما ت لي ما ت و تزاد لي تزاد .. الحياة كتستمر و الايام كتوالى .. الليل و النهار فتعاقب مستمر و كذلك بنادم كينقص من عمرو و كيزيد فالعبر الدرووس التجاارب و تا المشاكل و الحلول ديالها ... تجمعو على طبلة الفطور و الرياض كثرو فيه اصوات الضحك و البهجة ، تنهدات اللا عيشة رجعت لور و شافت فالبنات

عيشة: يالاه الحادكات كل وحدة لشغالها

صفية:(البنت الكبيرة) هانا ا خالتي نتي امري و حنا نفذوو

طامو:(البنت الصغيرة) ايلا عيى هاد الكتف كااين الكتف لاخر

عيشة: الله يرضي عليكم كاملاات .. نتوما جمعو الدار و  غانخرج انا و زهرة نتقداو لي خاص

زهرة: نمشي معاك اخالتي لهاد المناسبة!!

عيشة: ضروري .. غاتمشي نتي و صفية و طامو غاتبقى

صفية: اشمن مناسبة!! سبوع ولا ختانة ! و امتاا!

زهرة: ختاانة الحبيبة .. و كاينة غدا

عيشة: يالاه يالاه تحركو و نقصو عليا من تقرقيب الناب .. طيري لبسي جلابتك و لحقي عليا يالاه

طارت زهرة بخفة هزات معاها لي هزاتو وصلاتو للكوزينة و طلعات لفوق للبيت لي عطاتها عيشة .. لبسات جلابتها كانت شراتها من فلوس الخدمة لي خدمات معاها و بدات دور بحالتها .. تنهدت كضفر شعرها متوسط الطول ضفيرة ، رجعاتو لور و خصلات قصيرة نازلين مع الجناب كيطايرو بوحدهم رطبيين .. رطبات شفايفها بمرطب شفاه و نزلات كدردك بديك البانتوفة و نقزات تلاتة الدرجات لخرين لقات اللا عيشة عند وجهها بجلابتها تا هي ، ما حسات تا نزلات عليها بدقة للظهر مغددة

عيشة: كنقوول ليماااك ماتنقزييش شي نهار تهرسي فيك شي عظم و نتي عظيماتك دايرين بحاال القصبة ريح قوية تهرسهم

زهرة:(كتحك ظهرها مفشكلة) حرااام عليك ا خاالتي

عيشة: وييييلة .. تا تجيبيها فصحتك عاد تركنيي .. تحركي قدامي يالاه

نفخت حنااكها زعما غضبانة و زادت تمشى بطفولية و ترمش بدوك العوينات تقول باغيا ترفرف بشفارها .. خرجوو من الرياض غاديين بين ازقة المدينة القديمة بهدووء و تاويل ، هالبراهش كيلعبو هنا و لهييه .. ها العيالات مجمعين فهاد القنت شادين النميمة .. ها الحاج بسلهامو جالس عند الباب كيسبح و حاضي الغادي و الجااي .. الحاصول كلها و يلغيي بلغااه ، وصلو للسويقة كيتقدااو لي خاص و الزلالة على الجهد كيتزللو على زهرة و عيشة غي تخزر فيهم و ساكتة

تعاليييق بالييييز 💔