أعد لي روحي

بارت 56

♡أعد لي روحي
♡غزالي
☆الفصل الثالث: مقطوعة من شجرة
☆الجزء 56

جبدات عندها مصحف صغيور حطت ليها يدها فوقو و نحنحت

عيشة: حلفتك باللي خلقني و خلقك و حلفتك بهاد المصحف الكرييم ماديريش شي حاجة لي تآذي هاد التيلاد

زهرة:(حركت راسها) مابغيتوش اخالتي .. انا مزاوكة عاونيني نحايدو

عيشة: استغفر الله العظيييم .. واش انا نهضر هاك و نتي تهضري هاك!!

زهرة:(شهقت كتقطع بالبكى) كي ندييير اخالتي كييي ندييير وانا ماسلكت تا براسي كيي نديير نسلك وانا بولد ولا بنت فحجري!!!

عيشة: زهيرو .. هضرت معاك بالعقل دبا ابنيتي ، و حلفتك بالله ماديريش شي حاجة لي تآذيه و تآذيك ، لي خلقك و لي خلقو فييك حنيين عليكم و رحيم بيكم ، راه كولشي مكتب عند سيدي ربي شكون نتي باش توقفي قدام القضاء لي مكتبو ليك و قدرو

زهرة: الله يصبرني اخالتي .. الله يصبرني و الله يهديني (دارت يدها على كرشها) هو ماعندو ذنب و تا انا واش عندي شي ذنب لي يوقع ليا هادشي كاامل!!

عيشة:(طبطبت عليها) هادا غي ابتلاء ابنتي و اختبار من عند الله .. كلها و باش بلاه و كلها و الامتحاان ديالو ، صبري و دبا يفرج ربي ، غييي صبري و مولانا غايحن غايحن

زهرة: و نعم بالله ..

مسحت دمعة كانت نازلة و دوزت يدها على شعرها نزلاتو .. مخها ماقادرش يستوعب كمية هاد الاحدااث لي وقعو ليها زادت كملتها و جملتها بالحمل .. صحييح كاين بنات قدها مزوجين فديورهم و حاملات بالحمل ديالهم الاول ، لكن هوما متهيأيين و عارفين شكاين ماشي بحالها جاها كولشي على غفلة .. تنهدات كل مرة تمسح دمعة و تكمشت فبلاصتها حاسة بالزدييح فذاتها ، كل عظمة كتقول لختها انا مزاوكة ماتكايش علياا .. دخلو البنات عليهم مدخلين طاجين كيبقبق.. باقي سخووون و ريحتو ياا سلام ، شافت فيهم بنص عين و رجعت تقلبت مكمشة فبلاصتها كطل عليهم غي بعويناتها من تحت الكاشة .. شافت فيها صفية قردت عندها و كطل عليها

صفية: ضوري عليا عويناتك تما بحال موكاا .. نوضي تغدااي

زهرة: مافيااش

صفية: نوضي باراكة من الفشووش

زهرة:(هزت كتافها) لااء مابغييتيش

صفية: ياكما غييلفك!!

زهرة:(حركت راسها) مافخاطرييش و صافي

صفية:(دارت يدها على راسها) اوا هااهي غاطلع ليا القردة للسطح .. تحركي تعتقي و نتي من فطورك ماكليتي راه العااصر غايوذن .. نووضي

زهرة: ينوضو علييك جنااابك ان شاء الله بعدييينييي

طاموو:(قفزاتها) لااااا تدعييييش يعطييك الشتا و البرد لاتدعيييش دعوة الحاملة مقبووولة

زهرة: وكان ماحلفاتنيش خالتي وكااان دعيييت بحاجة اخرى

شافت فيها عيشة بنص عين كتقاد فالطبلة تاهي، نحنحت كطلمط فمها و تهزز فراسها

عيشة: اوا تكعدي تعتقي شوية ولا غانجي نرفس بنتيي يالاه .. مالها اخر الدنياا!! شي بنات وقع ليهم مااااكثر و صبرو و تحملووو و نتي باركة عليا هنا كتغبنيي بحالا راه اخر العااالاام ، تحركي كولي و رخييها فيد الله وكان كنتي مع باك فالجبل نحلف ليك يا بنيتي يا زهيرو وكان راكي عند راجلك ضربي تمارة و كرشك لفمك ..