أعد لي روحي

بارت 58

♡أعد لي روحي
♡غزالي
☆الفصل الثالث: مقطوعة من شجرة
☆الجزء 58

اللا عيشة .. لالة عيشة او خالتي عيشة ، كل واحد و كيفاش كيعيط ليها ، احسن طيابة فييك يافاس ، مرى حقااانية و نتاااع الزماان .. و لي وقف فبابها ماتردو ماتخيبو ، تكون عندها خبزة تقسمها مع المحتاج .. و لي شافتها بنت النااس و مشردة و مكرفسة كتحل ليها باباها تا كيحن عليها الله .. اللا عيشة ام لخمسة الوليدات ، تلاتة كلاهم البحر تشواات و تكوات عليهم .. و زوج سلكو و نفذو بجلدهم شي لألمانيا شي لفرنسا ، يالاه حن عليهم الله تا هوما و قادو وريقاتهم .. مغربنا الحبيب قرى تا تعيى و فالآخر يا اما تبقى شومور طول حياتك يا إما تقلب على راسك تبريكولي فحوايج اخرى .. و كيختالف البريكولاج كاين لي كيمشي للصعيب و يتعلم شي صنعة كاين لي كيتبع الساهل و يبقى يكريسي فعباد الله .. و فاس بيهم باش عامرة خصووصا الاحيااء الشعبية ، بنادم يدور بالسيف..ف و ماااكانش لي يقولو كحز لهييه .. من غير اللا عيشة لي شحال من مرة كدفع جبهة و تفك شحال من مدابزة و مدابزة .. غي ربي كيشوف من جهتها اما هي يدوز فيها شي س يف ولا شي جنو ية ، الاغلبية ديال الدراري دالحومة كيحشمو منها و يحدرو الراس .. ياااما صرفاات فيهم خير و يااما ستراتهم فرياضها و وكلاتهم و شرباتهم تا كدووز الازمة ديالهم ... وقفات قدام واحد من العطارة ديال الحومة و مدات ليه صاك ديال القش بحال قفة صغيرة و كتشوف فاللوز و القاوقاو

عيشة: السوسي لاباس

السوسي: من الحامدين الشاكرين اللا عيشة .. خاصنا غا المرى

عيشة:(ميقت فيه) ممم نييت خاصك غي المرى نييت تجمع شوية من داك الزهو ديالك و التشيطيين (تنهداات) ولااايني لي فيه شي بلية كااع ماتحاايد و عمر الشطاح ماينسى هزة الكتف

السوسي:(تهزز بالضحك) والوااه لوااه اللا عيشة .. شتو حب الخاطر

عيشة: ديرش كيلو كيلو من الحاجة .. هاااه و دير شي حاجة زييينة ماتعطينيشاااي المدود و الغامل

السوسي: حااااشة اللا عيشة واش نخسر ليك الخاطر .. ندير كيف العادة

عيشة: لا هاد المرة بغيت ندير العقدة .. ارا كيلو كركاع .. كيلو قاوقاو كيلو لوز كيلو زنجلان و دير كيلو تمر و نص زبيب

السوسي: نطحنهم ليك هنا!!

عيشة: مادا بييك اولييديي

دار داكشي لي بغااات و طحنهم فطحانة كبيرة تا تخلط داكشي و تعلك و بقا مهرمش كيبان غي الفتات ماتعرف دا من داك ، دارهم ليها فداك الصااك خلصاتو و رجعات فحالها كتمشى بالمهل و السلام منين ما دازت تسمعها ...دخلات للرياض لقات زهرة فوسط المراح يديها عامرين بالتشرمولة كتشرمل فالدجااج و صدى صوتها كيتردد فالأنحاء بموال طوييل امازيغي كيشوك اللحم و يبوورشو بديك البحة و داك طول النفس لي عندها .. و البنات كيدورو كل وحدة منين تحط ليها حاجة و هي اليد خداامة و الفم كيغني
☆تتمة