♡أعد لي روحي
♡غزالي
☆الفصل الثالث: مقطوعة من شجرة
☆الجزء 46
هادا شحال .. البنت اينفوا توصل عشر سنوات كتبدى تهيئ باش تكون مرى ديال الدار خصووصا البناات لي كيكونو فالعروبية و الجبل ؛ تعيى تهضر هاديك هي العقلية ديالهم و جامي تبدل .. كتلقى بنت ديال طناش العام مزوجة و حاملة و هازة اسرة على قدها ، كتشقى الشقى على حقو و طريقو .. كانو بنات داك الزمان صبااراات و العقل عندهم كبيير و واعي .. كيفكرو لبعيد و كيضربو ميات حساب و حساب باش تسير دار على قدها ماشي ساهلة ، و تا لي ماتزوجاتش فداك السن كتكون هي هازة دارهم بلا الحطيب لي كتحطب بلا السقية لي خاصها تسقي الما و تمشي تجيبو منين يا منين .. كيحسو براسهم كباار مسؤولين و واعيين .. كذلك الحال بالنسبة لزهرة ، كلما جا الصيف و طلعات للجبل عند باها و جدااتها و عمااتها ، كيهيئوها نفسيا للشي لي جايها فالطريق .. الزواج تابعك تابعك طولتي ولا قصرتي ، يعني التبرهيش و اللعب رمييه ورا ظهرك .. كبري عقلك و تعلمي لي ينفعك ، هاكا تربات زهرة ، تربات على الصبر و تفكر لبعييد .. واخا وقع ليها ماا وقع دبا خاصها تهز راسها و تهرس الحجر بسنيها باش تبقى عايشة عيشة كريمة .. مابغاتش الساهلة وكان بغات الساهلة تخلي امين يدير فيها مابغى .. و لكن غلطات غلط واحد ماغاتماداش فيه واخا تعرف تخدم زبالة المهم تعيش بعرق كتافها .. تا من فياختها نفعااتها و لي يشوفها مايحكرش عليها و يقول غي برهوشة .. تنهدات كتشوف فحالتها بعدما كملات فطورها خلصات و خرجات ، شدت الطريق للجوطية شرات كسوة و جاكيط لبساتهم و الشي لاخر خشاتو فالشكارة هزاتو معاها و هنا بدات الرحلة .. دقات باب بباب كاتسول شكون خاصو خدامة و لي دازت عليها كتسولها و الحانوت لي بانلها كتدخل ليه و المخبزة لي شافتها كطير ليها داخلة فرحانة ، سؤال واحد باغيين شي خدامة و الجواب وااحد كذلك .. لا ماخاصيناش ، واش كتعرفو شي دار بغاو شي خداامة!!!! لا ماعارفينش اختي الله يسر .. عيات و تهدات بالضوران ، و تا النعاس لي مانعساتش مزيان دار فيها مابغى .. تمشات فالسويقة كتسول تماا ايلا شي واحد عارف شي دار باغيين خدامة و والو ، قربات عند وحدة مولات المسمن و الحرشة .. حالة كراج كطيب فيه و كتبيع جا فالسويقة نييت و معاها زوج بنات كيعاونوها ، جلسات على كرسي طلبات ليها الما عطاتها شربات و نطقت
زهرة: خاالتي مكتعرفيش شي وحدة بغات خدامة
شافت فيها وحدة مرى بيضة و زينة و عاامرة .. يديها مطبزات كيشقشقو بالبيوضة مزينينهم دمالج ديال الذهب و دايرة حجابها عادي ، هزات عليها الكاس عطاتو لمولات المسمن و نطقات
...: شكون باغي يخدم نتي ولا واحد اخر
زهرة: انا اخالتي
...:(طلعاتها و هبطاتها) باينة فيك ماشي بنت البلاد
زهرة: انا شلحة من عين اللوح .. و رماوني هنا رجال البلاد
...: شحال عندك من عام
زهرة: عندي سبعطاش
...: وجهك ماااشي ديال سبعطاش
شافت فيها زهرة كترمش و عضت شنافتها كتنهد .. شافت فمولات المسمن خلصاتها و نطقاات
...: اوا تبقااي على خيير .. و ماتنسااايش غدا الكمووند ديال الخبز ماتحشمينيش
...: كوني هااانية ا لاعيشة مع الطناش ديال النهار يوصلك و بالزيادة
لاعيشة: لهلا يخطيك .. اوا تبقااي بخير (شافت فزهرة) اش سماك الله ا بنتي
زهرة:(هزت راسها فيها) سميتي زهرة
عيشة: اوا تبعيني ا لا زهييرو و هزي هاد التقضية ياالاه
زهرة:(تحلو عينيها) كيفاش اخالتيي
عيشة: ياك كتقلبي على خدمة .. اوا تبعيني و سكتي الله يرضي على بنتي .. عندااكي تنسااي المياكي و تخلينا بلاش يالاه طلقي رجلييك
أنت تقرأ
أعد لي روحي
Romanceأخيرا عزيزاتي القارئات كتاب المكتاب و تقدر لهاد القصة تشوف الضوء و تكتمل... ♡ أعـــــد لـــــــي روحــــــي بــقلــمي: غـــزلان مـــرزوقــــي ♡𝖒𝖎𝖘𝖘 𝖌𝖍𝖆𝖟𝖆𝖑𝖎 °°كـــــلــــماتـــــــــــي°° كالنهار المشرق *هي* .. و *...
