أعد لي روحي

87

♡أعد لي روحي
♡غزالي
☆الفصل السادس: قدر ام تدبير!
☆الجزء 87

البنات بقاو غي يشوفو حزنانين لأمرها ، و زهرة كتبكي و تشهق كتحس بروحها كتقطع لأشلاء صغييرة .. بقات عليها تهدنها تا سكتات مسحات ليها دموعها و باست جبهتها و رجعت عنقتها لعل و عسى تحس بشوي دالراحة

عيشة: غي قولي ليا ا زينة الشلحات واش انا قاطعة يدي من الرحمة تا نسيفطك تكرفسي!! غي قولي ليا واش نقدر نديرها!!!

زهرة:(حركت راسها بلا) واخا هاكاك ا خالتي .. الزواج صعيب (طلعت شهقة من القلب) انا لي حاضرة شنو كان يدوز على ماما تا هربات

عيشة:(تنهدت) الله يلعن الشيطان يا هاد الهبيلة .. سمعي ليا لهضرتي خليني نكمل و لي بان ليك نديروه

حركت راسها بعدت كتمسح دموعها و عيشة غي كتنهد .. جمعات يديها و شافت فيها

عيشة: ايلا قلت ليك ماخطبوكش مني غانكون نكذب ، و لكن كولشي هنا ففاس .. و انا بغيتك تبعدي من فاس فهاد الفترة ، و ماكرهتش ليك الخارج ابنتي

زهرة: نحرك اخالتي لاش بينا هاد الزواج كاع

عيشة: واش ساخية عليك حياتك!! انا مااانسيفطكش للموت بيدي و نتي عاد بززة

زهرة: و شنو هو الحل

عيشة: غانهضر مع واحد فولادي نزوجك ليه ..

زهرة:(غوتت بالصدمة) لااا اخالتي مانقدرش .. و ايلا مابغاونيش !! و ايلا كانت عندهم شي وحدة فحياتهم!! ندخل بيناتهن شيطان انا!!

عيشة:(شافت فيها بنص عين) تاعت لي يمرمقها معاك تا ماتبقاي تفرقي بين خضر و صفر .. غايكون زواج بيض ديري وراقك و كلها الله يسهل عليك .. مهم تكوني فبلاد بعيدة و بلاد الحق و الفلووس

زهرة: و نتي اخالتي .. انا مانقدرش نمشي و نخليك ، مانعرفش كيفاش نتصرف و مانعرفش نعيش بلا بيك والله

عيشة:(قربت تندب) زهرة راك العرق لي بقى فمخي خدام غاتسووطيه ليا .. غاتموتي بوحدك!! راه ولدي غايكون معاك و يوقف معاك تا توقفي على رجليك .. و غي تمشي غانلحقك بفيزا تكوني قربتي تولدي نبقى معاك نعاونك فيه تا تشدي راسك و نرجع

زهرة:(دمعو عينيها تاني) والله ماعرفت اخالتي ماساخياش بيكم والله..

تنهدات رجعت عنقتها لعندها كطبطب على ظهرها و كتشوف فالبنات لي ساكتات و لسانهم ملجوم

عيشة: اوا يكون خيير .. يكوون خير و ماعرفنا منا لغذا كاع اش غايوقع

تنهدت و ناضت خلاتهم كل وحدة فين ساهية و هي مشات طل على العشى فين وصل .. تحط العشى تعشااو و شدو بلايصهم كل وحدة ساهية فضو القنديل تا داهم النعاس ، غي صبح الصباح و فطرو خلات اللا عيشة البنات يتناقشو بيناتهم موضوع زواج زهرة و صفية ايدتها و عرفاات انو اللا عيشة كتفكر لبعيد و كتفكر لمصلاحتهم قبل مصلاحتها .. خرجات فاتجاه التيليبوتيك صرفات صرف شحاال و دخلات كدوز نمرة ولدها لي ففرنسا .. حيت هي لي شوية ساهلة و قانونها ماشي مستعصي بحال المانيا .. الرنة اللولة ، الثانية .. تا للرابعة عاد جاوب صوت نشييط للغاية و ضاحك

...: بااينة هادي غي الواليدة

عيشة: و شكون غايصونيلك من غيري من المغرب المسخووط .. تدويي داير شي وحدة بلا خباري

...: ههه الله يهدييك الالة العيالات .. عندي غيير نتي الله يخلييك ليا و يطول فعمرك

عيشة: امييين الحبيب ديالي اميين (كتلوح الصرف و الفيكس كيسرط) بغيت نهضر معاك فموضوع مهم ا يوسف .. حل وذنيك مزيان

يوسف: الله يسمعنا خير الواليدة

عيشة: غي الخير ان شاء الله

بدات فالهضرة كيسمع ليها بكل جوارحو و هي كتلوح فالصرف و تشرح .. تنهد مالقى باش يجاوب و بعد مدة من النقااش حطات لاباراي دالفيكس و خرجات من ديك البييتة فين كيهضرو...