أعد لي روحي

بارت 20

♡أعد لي روحي
♡غزالي
☆الفصل الاول: انا انهار انا اتلاشى
☆الجزء 20

صبح الصباح و شميسة بااردة كطل من ورا الغيوم .. كانت كتسناه هو يجيبها ساعة خلاها تجي وحيدة المرض و الجوع و زادها تكرفيس الطاكسيات ، حلات الباب دخلات كان السهييير و الدعوة سااقلة .. تنهدت لاحت السوارت على الطبلة و مشات للصالون جلسات و كتخمم ، ساهية فقنت واحد و مخها كيبيع و يشري .. سمعات حس خطوات بان ليها هو يالاه جاي كيتفوه بالتوني ديالو و الشاشية فوق راسو طالعة من جهة و نازلة من جهة .. تفوه حال فمو كيحك فمؤخر راسو و تكى على الحيط بكتفو كيمضغ، هاد الشي كامل تبعاتو دايرة يدها على حنكها و كتقول الله يلعن النهار لي قبلت عليك فيه

احمد: جيتي

ميرا:(عوجت فمها) لا مزال .. عييت نتسنى فيك مالك ماجيتي

احمد: نعست معطل مع شي وراق و مافقتش فالوقت .. اش قالك الطبيب

ميرا: من هنا ليومين نفتح (تنهدت بمرارة) زهرة ماعرفتش كيفاش غانقولهالها .. فينها بعدا

احمد:(نحنح) تكون مزال ناعسة .. وجديلنا بعدا شي فطور ناكلو شدق و نطركو خدمتنا وجديي

ساطت بعصبية و ناضت مسلمة امرها لله .. عيانة مرييضة ماعندها جهد فوجهها صفرة مافيهاش نقطة ديال الدم و زايدها بهم الفطور .. ياك موالف كيفطر برا عمرو حاشاه ليها و فطر لداخل اش جاه عليه اليوم! بدات توجد و هو مخو يبيع و يشري فالمكيدة كيبرم موسطاجو و يفكر .. خدم داكشي مزياان و ماغاتعييقش باينة ، تحطات الصينية نتاع اتاي و تحط معاه فطور بلدي بالخليع من داكشي .. سخنات الخبز ، و حطات كولشي على الطبلة و جلسات كتشوف فالدروج

ميرا: بغيت نوض زهرة و لايني غيير فطر تا تكمل و نوض عندها

احمد: كولي كولي تا نتي .. خاصك شي حاجة!! شي دوا شي فلووس

ميرا:(بدون تردد) اودي خاصنا شلااا حوايج

احمد: غانعطيك و لي خصاتك نوجدها غي براي لينا الالة

حلت عينيها مذهولة من الشي لي كتسمع .. دا احمد ولا كذبات ، حركت راسها بلا حول و تعتقات شوية بداك الفطور لي وجدات ، خلات الطبلة هاكاك و طلعات تفيق زهرة بالحلة ديال الباب بالاوتة مين مالقاتهاش .. عيطات لأحمد طلع يجري و بدا يتساائل تحلف عليه مافراسو مايتعاود

احمد: مالك اش كاااين !!

ميرا: زهراا فيينهااا!!

احمد: كيفاش فيينها يااك كانت نااعسة خليتها فالليل هناا

ميرا: الله ياربي و على كبدتي و كي غانديييير .. فين مشات الزغبية على الصبااح فيين

ضربت ففخادها غاتسخف ليه بالخلعة و بدات تقلب ، بانو ليها اغلب حوايجها ماكاينينش عقدت حجبانها و هبطات خارجة كانت مزال بالجلابة ، مشات عند سعيدة علماتها بلي جلسو صحة سلام و رجعات للدار قبل المغرب .. كتسول احمد و تعاود كيقولها كي جيت نعس كانت عاد فايقة كدوور ، تلفت و دااخت بيها الارض .. فين مشيتي ا زهرة و فين رديتي الراس .. جلسات فالدروج كتعدد و احمد عند راسها غادي جاي

احمد: ماكايناش عند سعيدة فين غبراات ! بنت الحراام لقات الغفلة و هي تسييب

ميرا:(باندفااع) نتااا سد فمكككك .. ماكاينش شي ولد الحرام قدككك

احمد:(شاف فيها) ياااك .. زيديني كنستاااهل

ميرا: الله ياربي و اش غانقوول لخوياا .. و ياربي يا زهرة ياكما خرجتي للحانوت و وقعات ليك شي حاجة (شافت فيه) نوض معايا للبوليس

احمد: تي البوليس اش غايديرو لينا

ميرا: وااااش بعقلك ولا شنوووو .. واش البنت غااابرة و نبقى سااكتة .  نووض معايا نمشيوو عندهم يقلبو عليهاا نتا عندك المعارف تماا

خرجات فيه عينيها كتغوت فحين هو غي كيتفتف و تالفة ليه المشية

احمد:(ساط بعنف) يالاه نوضيي .. اجي فين دايرة ذهبك بعدا!!

ميرا: ااش باغي تقوول

احمد: البنت هرباات و ايلا عارفة فين ذهبك فضييحة ..