أعد لي روحي

بارت 35

♡أعد لي روحي
♡غزالي
☆الفصل الثاني: في ديسمبر تنتهي الأحلام
☆الجزء 35

حدو هزز راسو و خرجات هي كتنهد مألمة و محسرة لحال زهرة .. حراام البنت بحال الوريدة يضيعها ، جلس جنبها دوز يدو على خدها تا هزت عينيها فيه و رجعت حطتهم

اسيم: باش كتحسي!! مزيانة

زهرة:(تبسمت بأسى) و باش غانحس مثلا .. روحي مشات .. شرفي ضاع ، انا توسخت .. كيفاش بغيتني نحس

اسيم:(بجدية) واعدتك و ماغانخلفش بوعدي ليك ..

زهرة: غانشوفو هاد الوعد ديالك

قلبت عينيها .. دموعها رافضين يهبطو و قلبها كينزف الدم ، اش هاد الحالة لي وصلات ليها!! حسات بذراعو لتف حول كتافها و جرها لعندو معنقها .. سدت عينيها مزيراهم حاطة راسها على صدرو و هزت يدها زيرات على تريكوه .. كأنها تقولو بقيتي ليا نتا الأمل وخا نتا هو اليأس .. ماتخذلنيش ، نتا هو النور واخا نتا هو الظلام .. ماتخلينيش فديك العتمة ، طبطب على ظهرها كيحاول يهدنها و سنيه مزيرهم كيغززهم و يحكهم مع بعضياتهم .. كره راسو و كره المنظر لي وقع ليه ، تدق الباب ناضت مبعدة عليه كتمسح عينيها و دخلات الخدامة هازة بلاطو قداش ، جلسات على رجليها خوات ليهم اتاي بالنسبة لزهرة و قهيوة لأسيم ..هزات داك كاس اتاي سخوون ، جغمات منو جغمة و بالها رجع لبعيد .. لذكرياتها ، لضحكتها ، لإشراقها .. كانت دايرة بحال الشميسة و غربات .. بحال القمر و اختفى .. بحال العصفورة و تحبسات .. بحال الثلج البيض الصافي و توسخ بالغيس ، تنهدات و تنهد لتنهيدتها ، هو الحزن لي غطى ملامحها المبتهجة ، هو الليل لي طغى على نهارها .. هو الاسود لي كحل ايامها .. هو القفص لي حبسها .. هو الدنس لي وسخها ، لكن رغم هادشي كامل كأنها راضية بيه و هو راغب بيها .. ايلا كان هو السم فراه هي الترياق ديالو ، و ايلا كان العلة .. فهي البلسم ديالو ، مشى لبالو نهار شافها كتغني .. وجهها ضاااحك و صوتها الرنان كيتردد فالأجواء ، كانت روحها مرحة ، و هو قيدها .. فطرو و مشى جاب ليها شاشية و جاكيط مع بوط ديال الميكة بنوتي و مستيلي مقطن من داخل .. حطهم ليها و جبد هو البروتكال ديالو لبسو و جلس حداها..

اسيم: نوضي نخرجو

زهرة: (هربت عينيها) مافياش

اسيم: نوضي تشمي شوية ديال الهوا .. لي جاي اصعب

زهرة: كيفااش!!

اسيم: خاصك توجدي راسك باش تلاقاي بعائلة الساويرس بصفتك مرات ولدهم البكر اسيم الساويرس

رمشت فيه عينيها مخلووعة .. هادا غايجيب ليها نهايتها مافيهاش شك ، كيفاش الزواج و بيمن !! بأسيم ولد عائلة الساويرس .. عائلة لي قرات عليها مقال واحد فالجورنال .. داك المقال دار ضجة لدرجة مالين الكيوسكات تباعو ليهم داك العدد ديال داك النهار بشكل رهييب .. امبراطور الخمور بالمغرب ، عائلة خاااااانزة فلووس املاكهم لا تعد ولا تحصى .. حتى من الحسن الثانى الله يرحمو وهبهم هكتاارات من اراضي العنب و زاادو كرااد فاقتصاد البلاد ، دارت ليها طننن فراسها !! اسيم الساويرس هو الولد البكر لي مشى للخارج دار دراسة الأعمال و خذا الاجازة فسنوات قليلة و قريب ياخذ الماستر .. رمشت عينيها مخلوعة ، بصفة عامة كيخلعوها الاغنياء و لي عندهم العااقة .. فماا بالك بعائلة الساويرس ، تنهدات كتلبس و خرج مكمشين فجواكطهم .. وقفها تحت شجرة الشيء لي خلاها تعلي راسها باش تشوفو مزيان و نطق

اسيم: ليلة البارح خليها بيناتنا بلاما توصلهم تايجي وقتها

زهرة: و ايلا قالولك علاش باغي تزوجها و هي صغيرة!!

اسيم:(تحنى عندها بهدوء و دار نصف ابتسامة) نقولهم خفت يخطفوها منيي

هربت عينيها كترمش بالزربة و كملو المشية ديالهم و مشيتها بااينة مفرووعة حردها المسخوط .. مشى لبالها لعمتها ، نحنحت و نطقات

زهرة: خمسيام وانا غابرة على الداار .. بغيت نهضر مع عمتيي

اسيم: بلاتي نعطيك تهضري معاها

زهرة:(فرحة اجتاحت صدرها) بصح

اسيم:(جاوبها بعفوية كيحلف) والله .. غاندخلو و نعطيك تهضري

رجعو يتمشاو داير يد ورا ضهرو ملبسها قفازة من الجلد و اليد لوخرى طالقها مع جنبو .. ملامحها استبشرو شوية و تمنات من كل قلبها مايرجعش فهضرتو .. تنهدات و قاطع سهوتها بصوتو

اسيم: ماتسمعيناش شي اغنية من صوتك

زهرة: كتفهم الشلحة

اسيم:(حرك راسو بالنفي) واخا تسبيني بيها مانفهمكش

تنهدت و طلقت مواال قدو قداش بديك البحة الخطيرة ديالها .. موال تردد و صدح بين الجبال ، موال حزيين تلمسو فصوتها .. كتمشى و تغني بلحن شجي و هو تابعها و ساااهي مع غناها الحزيين ، كانو مراقبينهم من بعيد واقفين فالشرفة .. داير يديه ورا ظهرو كيحرك راسو بلا و هي مفكووعة غاطرطق

فاطمة: زايد و يلعب بدماغها .. البنت حالتها تشفي العدا باينة من عينيها كترجف بالخوف منو

محند: و هادشي غي وصيتو عليهاا

فاطمة: دبا شغاادير

تنهد جبد داك تلفون كيبرك على النوامر

محند: لي خاصو يدار .. كل نهار نقولو غايدير عقلو و هو تمادى و تعدى على البنت .. خاص واليديه يدخلو دبا ..

التتمة غداا .. جاري الصدمات 💔💔💔 تصبحو على خير كبيداات .. تعاليقكم تعاليقكم و شي تعاليق فشلوووني .. كولشي على جا يدوق صدق لاحس الطبسيل 😂😂 اندخلها فالقائمة عندي هادي