♡أعد لي روحي
♡غزالي
☆الفصل الرابع: نبضات رعب
☆الجزء 67
بقات واقفة مصمرة كتشوف فالهوندة جايا ليها ماقدرات تزيد ماقدرات ترجع .. ماحسات غي بيد جراتها و الشهقة طلعت من صدرها بحال داك الغريق لي تنتاشل من وسط الما و تعتقات روحو فآخر لحظة ، هزااتها من كتافها كتعاير و هي مصمكة .. كتسمع غي الطنين فوذنيها تا حاجة خرى مكتسمعها ، كتشوف فالناس غادية جاية و شي وحدين كيشوفو فيها و كيهضرو و شي وحدين كيهززو يديهم ، بلا مول الهوندة لي واقف شوية بعيد و مزالو كيحيح عليها .. هززاتها هاد المرة بالجهد تا كانو غايطيحو و شافت فيها
زهرة: هاااا!!!!
صفية: واش حمقة ولا خرج ليك العقل!!! قاطعة الطريق بلاما تشوفي ؟ باغا تقتلي راسك ءءاااا!! سخااات عليك حياتك و سخا عليك عمرك!! خسارة فيك
زهرة:(ضارت موراها طافجة بحالا فااقت) بابا .. شفت باابااا عندااك يشوفني و يلقاني يقتلني و يشرب من دمي ا صفية (ركبها الرعب بدات ترعد) يالاه نهربو قبل مايخرج من داك الحانوت
صفية: نعاام!!
ماحسات براسها غي لقاتها جارة يدها و هاربين مبعدين ديك البلاصة ، كيدخلو بين الزناقي و الدروبة الضيقين ، هازين جلاليبهم و كيزربو فالمشية .. تسلت الشال من على راسها و بان شعرها اسود كسواد الليل الزغبة عند ختها بحال الحرير كيلعب بيه الريح ،قلبها كينبض برعب و الدوخة بدات تدي فيها و تجيب كتحس بالطنين زايد و كيقوى تا كاع ماحسات براسهت امتا جات مردوخة للأرض مغيبة .. شافتها صفية هاكاك ضربت وجهها غي ضربة و تحنات كتغوت و تفيقها
صفية: زهراا .. زهرة فيقي هاالعااار انا مزااوكة لاماتفيقي ياختي .. عاونوونيييي عاافاااكم عااااونووونييي
طلقات حلقها كتغوت و تبكي و خصلات من شعرها المذهب خرجو من الفولار رطبين تا تلصقو مع حناكها و جبهتها .. ضارو بيها الناس كل واحد و كيلغي بلغااه تا جات لومبيلونص عيطولها شي وجوه دالخير واخا ماجات تا عقل صفية كان غايخرج من بلاصتو ، هزوها نيشان للسبيطار دخلوها للمستعجلات و صفية بحال ديك الدجاجة لي كتبيض بيضة هنا و بيضة لهيه .. غادية جايا تا هي تسلت ليها الفولاغ و الظفيرة طويييلة خارجة من تحتو كيفما تحركات تحرك معاها ، عاضة على كم الجلابة و عينيها الخضرين كيبرييو بالدموع و حمارو رجعو بحال جغمة ديال الد.م .. ماتهنات تا شافت شي فراملية ضارو بيها و معاهم الطبيب
...: مال هادي شنو عندها!
...: عاد جابوها ماعرفناش دكتور
...: ماكاينش شي اكومبانيو معاها!
...: يمكن هاديك البنت .. اااختي ااختييي
ضارت شافت فيه كترعد و قربات لعندو رجليها ماهازينهاش تالفة و ماعارفة مادير .. كتخطاهم اللا عيشة كيبقاو بحال لي مقطوعين ليهم الريوس
صفية: انا اخويا
...: اه نتي .. زيدي اختي
شافت مع جنابها زايدة خايفة و حشمانة و كل واحد فين مليوح ها اللي فالارض ها اللي فالبياسات ها اللي فالكراسا ، لي هاز شوية الدق و كيسربي الناس هوما السطاجيير سواءاا كانو اطباء او ممرضين .. اما البيغسونيل كل واحد و فين راه مخشي
...:شنو عندها .. دابزت مع شي واحد!
صفية: اللااا .. هو كانت تخلعات كانت غاضهسها هوندة . غي حنا تمشينا شوية بالزربة و هي تسخف و طيح
...: مكاتعاني تا من شي مرض
صفية: لا لا .. (بدات دور فعينيها) غي هي راها حاملة
سرطت شنافتها خايفة و نادمة لي نطقات غي شافت الطبيب كيهزز راسو و يكتب نهجات شوية
...: بون ديرولها سيروم صالي يقاد ليها الطونسيو و هاد الان اف اس تا هو مع الكغوباج ، عطيو لافاكتيووغ لختها تخلص فلاكيس باش يمشيو ليزاناليز للابو
صفية: هااا !! (شافت فالفرملي حالة عينيها) اش قال اخويا
أنت تقرأ
أعد لي روحي
Romanceأخيرا عزيزاتي القارئات كتاب المكتاب و تقدر لهاد القصة تشوف الضوء و تكتمل... ♡ أعـــــد لـــــــي روحــــــي بــقلــمي: غـــزلان مـــرزوقــــي ♡𝖒𝖎𝖘𝖘 𝖌𝖍𝖆𝖟𝖆𝖑𝖎 °°كـــــلــــماتـــــــــــي°° كالنهار المشرق *هي* .. و *...
