أعد لي روحي

بارت 57

♡أعد لي روحي
♡غزالي
☆الفصل الثالث: مقطوعة من شجرة
☆الجزء 57

سهاات و مشى بالها لبعييد .. فعلا وكان ماوقع ليها تا حاجة من هادشي وكان باها و عماتها رماوها لأول شارف جا فالطرييق زوجوها ليه و غصبوها فطفولتها .. زواج القاصرات ظاهرة جد جد معروفة خصوصا فجبال الاطلس ،البنت اينفوا تبلغ كيكونو دهزووها و زوجوها و راها فدار راجلها هازة عائلة قدها قدااش .. الحكرة و الظلم و تمارة و ديما العروسة الصغيرة تاكل الدق و تا من الراجل ما يدافع عليها مايجي معاها كيخليها منها للصهد راسها ، تنهدااات كتكمد هاد الكية فصدرها تاني كيف لي سبقوها و هاد الحمل باش ما كان غاتكملو.. تولد ولدها ولا بنتها و تماك لكل حاادث حدييث ، تنهدات كتفكر حياتها و قرايتها و موهبتها لي تا حاجة مابقات من هادو .. فعلا هي ففاس و لكن ماتقدرش تقرب للمعهد تخاف باها لا يجي يسول و يلقاها تما و تماااك فضيحتها فضييحة ، نوضوها تغدات معاهم و السيف على رقبتها ماخلاوهاش تنفنف ولا تقول لا .. اصلا بلاما تحس لقات راسها دخلات طول و عرض فداك الطاجين غي كملات تكات على الوسادة كتنهج

زهرة: الله يعطيك الصحة ا طامو يدييك بناان اختيي

طامو: بالصحة العمييرة ايلا تشهيتي شي حاجة انا هنااا

زهرة:(دمعو عينيها) لهلا يخطيييك

عيشة:(قربت عندها عنقتها) اوا لاتبكييش الله يرضي علييك .. لي حب خاطرك قوليه ليا نقادوه و لي ماكانت حاضرة نحضروها ، وحمك غادوزيييه فأحسن حااال بحالا ماماك لي قايمة بيك

زهرة: لهلا يخطييك عليا اخالتيي .. خيرك ماعرفتش كيفاش نردو ليك ولو غي بشوية

عيشة: الخير لي ديري فيا هو نشوفك مزيانة نتي و هاد الناموسة  لي عندك هنا (طبطبت على كرشها) و ان شاااء الله تلقاي شي ولد الناس لي يهزك بييك بولدك و يعييشك فالنعييم

زهرة:(ضحكت باستهزاء) ايلا الراجل ماعندي مانديير بيه اخالتي .. باراكة عليا غيير نتي و خلاااص حبييني و نحبك

عيشة: و علاه اختيي قالولك عندي باش نكوييك .. (دفعتها بالشوية) انا ماغانبوسك ماغانعس معااك قالتلها حبييني و نحبك .. تحبك بقرة قولي اميين ، الالة ايلا جاك لي يستااهلك و يعيشك مرتاحة اش تبقااي ديري عندي هناا!! طبكي عليا لداارك اختييي (كتهضر و تشاالي) لا نتي لا هاد خيااتي لي كيدارور مع جنابي بحال ريا و سكيينة

صفية: ياااك ا خاالتيي

عيشة: الخلااا .. (لبست جلابتها) غانمشي نجيب شي حوايج و نجيي .. بدااو تشرملو الدجااج ، زهييرو نوبتك

زهرة:(خرجت عينيها مخلوعة) اوييلي ياخالتيييي اويلي ياويلييي و زعما انا مريييضاااا

عيشة:(غزرت فيها) وييل الشيطاااان و ولادو عشرة .. ماالك غادوزي الضميااطي!! غاتشرملي غا طنااش دجاجة ماشي خمسيين و نتي جااالسة ، تحركي ولا نجي نشرمل بنتيي

زهرة:(تغبنت فخاطرها و بدات تبركم) ماعرفناك خالتي عيشة و لا ساقازو الشمكاار.. عندك زووج وجووه كل مرة وجه

عيشة:(سمعتها) اييوا لاماسكتييش غانجي نوري لبنتيي الوجه التاالت .. لي هو ديال مراات البوو

زهرة: اعووذ بالله من الشيطاان الرجييم

***********
عشرة الاجزاء هاااهوماا .. اوا تفاعلو الله يرضي على بناتي و خليو ارائكم و تعاليقكم تا ندوز عليهم نقراهم و نجادوغيهم .. زهرة حاملة مسيكينة 🥺 تصبحو على خييير 💜💜