أعد لي روحي

بارت 2

♡أعد لي روحي
♡غزالي
☆الفصل الأول: انا انهار انا اتلاشى...
°بارت 2

دازو عليهم ساعات القراية كأنها ساعات فالجحيم ، غي سمعو الجرس ناضو يتجاراو شي جمعوه شي كمشوه و خرجو بحال النحل طايرين بالفرحة .. كاع و زهرة شوية قرايجية اجي تشوف لسعيدة لي عوالة غي عليها مافيها لي يدير شي مجهود مسيكينة .. خرجو و قلبو الضورة على الكوليج ، بانت ليهم مرسيديس كلاسيكية مركونة جنب الحيط و مشاو بالزربة مشادات بحال قشبال و زروال شافو هاك شافو هاك وطلعوو لور

...: صبااح التييتييز .. صباااح الزبدة و العسل ، صبااح عوينات الغزااال

زهرة:(بقات ترمش بعينيها) ياااع على حموضة تا ديماري و سهرنا

سعيدة: امين العنااب .. كاع ماجايا معاك تقرا فالاخوين غي سير شوفلك  اخويا شي كروسة و بيعلك العنب مع راسك

...: مرة خرى حمبوك تجيبني معاك نتفاهم مع ملتك .. مكنعرفكش انا اخويا طيحتي بيا يعطيك غبارة

سعيدة:(طرطقت بالضحك) ندير كعى 

ندير: الناس عندهم صحاب انا عندي مهبول .. فينما شاف شي شابة ريوكه يطيحو عليها ختفوو يخليها مااركة

هزز امين راسو كيتهزز بالضحك و ديمارا لوطوتو خرجو من افران و شدو طريق فاس ، الطريق كلها و هوما شد ليا نقطع ليك خصوصا فاش يجبد التلفون يعيط لشي وحدة و يبدا عليها فالمعسل .. وصلو لفاس و وقفو حدا وحدة من لي كافي يفطرو لول عاد كل واحد يمشي لغراضوو .. شدو بلايصهم و زهرة بدات تحيد الكاشكول حيت فاس كوميم على افران مافيهاش الكزز ديال البرد بحالها ..

امين:(مخاطب سعيدة) نتي ترجعي معايا

سعيدة:(شافت فساعتها) ضروري مانقدرش نبقى الدار يحيحو عليا

ندير: دخلي معانا للمعهد

زهرة: القبايلي عندو الحق .. دخلي معانا للمعهد و قوليلهم كنمشيو فطاكسي بيضا و نرجعو بزووج ماغايقولو والو

سعيدة:(عوجت فمها) نتي عندك الفلوس اختي حنا لاا غي كنتفتفو و صافي

زهرة:(لمطت فمها) بحاالاا منعرف شحال غاتخلصي فالشهر

سعيدة: اوهوو .. خليني غاا نسلت معاك هاكا مرة مرة ، نتي بعدا و عندك الصوت لي تسرحيه نتي و داك القبايلي .. ايلا شطييح راك تحنتي بنادم انا شنو ندير!! نسخن البندير و نلعب بيه احيدوس

ضحكو كيضربو يديهم مع بعضياتهم على هضرة سعيدة عطاتهم الملخص المفيد مازادوش الهضرة .. تحط الفطور فطرو و شدو الطريق غي على رجليهم حيت معهد الموسيقى و الرقص كان قريب ليهم بلاما ياخذو اللوطو و منها نيت يضربو ضويرة و يشمو الهوا نقي .. ضاربين الدنيا بركلة و صداقة عمييقة كتجمع بيناتهم.. كل واحد هاز معزة خاصة للاخر خصووصا ندير لي جا مغرب مبعد على اهلو و ناسو ، مالقى غي البنات و امين لي نساوه فغربتو و داروه واحد منهم .. اصلو جزائري و جا للمغرب بالضبط لإفران باش يكمل قرايتو فجامعة الأخوين ، و امين اصلو نيت من فاس و لكن تقريبا عايش فإفران على حساب قرايتو .. اما البنات اصلهم من تماك شلحات اطلسيات حرات حتى النخااع..