أعد لي روحي

بارت 23

♡أعد لي روحي
♡غزالي
☆الفصل الأول: انا انهار انا اتلاشى
☆الجزء 23

دمعتها على خدها ، واقفة عند السرجم لايحة على كتافها غطى خفيف و ترشح بنيفها المسدود .. عينيها ولاو زوج كركاعات بالمرض و كثرة البكى ، شفايفها تشققو و تدماو و نيفها حمااار و الخدود تزنكو تا من دوك النميشات الخفاف تخباو تحت ديك الحمورية .. راسها كيزدح بحالا كيزدحو فيه المارطويات ، متبعاتو كيفاش كيلعب و يجري فوق الفرس ديالو تحت الثلج الرقيق والا عبالو .. مهاني و قلبو هاني ، علاش غايهز ليها الهم .. هي مجرد عبدة عندو فقط ، تنهدات و رجعت لبلاصتها تخشات و عنقت البويوط مزال سخونة تبعث فيها الدفئ و ماتبقاش مكنززة .. تمنات وكان بقات غي ناعسة و مافيقاتهاش ديك البولة ، تكمشت مزيان سدات عينيها بغات تنعس باش يهدن الوجع لي فقلبها و روحها .. اما تا الوجع لي فجسدها ماعطاتلوش اهمية ، استرخات تا غفات بيها عينها و قفزت على الحلة ديال الباب .. معنت الشوفة فيه و هربت نظرها لجهة اخرى مخلياتو مركز عليها

اسيم: نوضي تفطري

زهرة:(بصوت خاافت و عينيها لتحت) مافياش

اسيم:(نحنح كيحك نيفو) بلا بهلان نوضي تفطري و خليني زوين معاك .. خاصك تشربي الدواا باش تصحي

زهرة:(شافت فيه) ماكاينش الدوا لي كيقت ل

اسيم:(هز حجبانو) واقيلة هضرنا ولا لا

زهرة:(تنهدت بعنف) بغيت نعس

اسيم:(بابتسامة جانبية غامضة) و ماخفتيش نديرلك شي حاجة فاش تكوني ناعسة!!

هز حجبانو مع ديك الابتسامة خلاوها تخلع و ترجع لور عاضة على شنافتها بقالها شوية و تغوت على حر جهدها .. قلبها بدا يضرب بالجهد حسااتو غايسكت و العرق بارد هابط مع ظهرها ، راسها بدا يفتل فتيل و الارض كدور بيها .. داير ليها العذاب النفسي الشديد و دخلها الشك تا كرهت النعاس و مابغاتش تنعس .. قرب ليها و هي زادت كتزحت و تبعد عليه غي شدها من يدها قفزت

اسيم: وكان بغيت ندير شي حاجة وكان درتهاا .. اجي تفطري

عجيب الامر ديال هاد خينا .. بكلمة يفزعها و بكلمة اخرى يهدنها ، زفرت بلاما تهضر و جرها للطبلة جلسها بزز و وقف عند راسها

اسيم: فطري بلا غنان و شربي دواك

زهرة: حراام عليك علاش كدير ليا بحال هاكا (شهقت بالبكى) واش ماعندكش خواتات!!

اسيم:(ببرود) عندييي

زهرة: و ماكاتخافش يطيحو فنفس الموقف لي راني فيه اناا ءااا

معن فيها النظر و صوتها المخنوق المغنغ و ديك البحة لي كتعجبووو فاش كتهضر مابقاتش .. ركز فعينين الغزال و نطق ببروود

اسيم: خواتاتي عندهم الرجال لي يفديوهم برواحهم .. ماشي الشمايت لي كيفضلو الفلوس عليهم ..