♡أعد لي روحي
♡غزالي
☆الفصل الرابع: نبضات رعب
☆الجزء 68
شاف فيه الطبيب كيتنهد و شي فرمليات من بعيد غي كيوشوشو و يفرنسو خلاو البعض من الفرمليات لوخرين يخنزرو فيهم باش يجمعو راسهم .. ربي خلق و فرق ، ايلا نتي تعطاتك فرصة تقراي و تكوني متعلمة و مثقفة راه كاين لي الظروف ماسمحااتش ليها ، تعلمات زوج حروف بالعربية و تكونت لور .. راه كاين لي حلمها فقط هو القراية ، تقرى فقط و تعلم و تثقف و توعى و فاش تكون فشي مجمع ماتحشمش من راسها و تقول انا ماقارياش .. تا هي تفهم الفرونسي ، تا هي فاش تمشي عند شي طبيب تجاريه فالحوار و تعرفو اش كيقول .. تنهدات عينيها مدمعين مزالها كتكمش فكمام الجلابة ماعارفة ما تقدم والا توخر حشماانة و قلبها كيتقطع بهاد الخيبة و هاد الموقف لي تحطات فيه ، ابتاسم ليها داك الدكتور مطمنها بعينيه و طبطب على كتافها بلطف شديد كيهدنها
...: ماتخافيش .. غايعلقو ليها سيروم باش يتقاد ليها الطونسيون و تقدر تفيق .. راه بسبب الحمل و تا الخلعة طاح ليها الطونسيون ، طلبت ليها شي تحاليل بساط هاهوما ، غادي تمشي للإستقبال تخلصي باش نقدرو نديروهم و ندفعوهم للمختبر (كيهضر و كتهزز راسها) موراها فاش تفيق غانعطيك واحد الورقة و تديها للجهة ديال الولادة باش تشوفها الطبيبة
عضت شنافتها كتهزز راسها و عينيها يدورو هنا و لهيه كترمش بالزربة و مع زعيعرة دغيا بانت فيها التزنيكة ، تنهدات داايخة ماعارفة اش دير و نطقات
صفية: واخا .. انا نخلص باش ديرولها التحاليل ، و غانمشي نجيب ماما باش توقف معاها
...:(حرك راسو) وا عليه .. هاكي هاهي الفاتورة خلصي و جيبيها للفرملية باش تمشي مع ورقة التحاليل و الد.م..
هززات راسها بالزربة شادة ديك الفاكتيوغ كتشوف فيها و تالفة ، نعتو ليها في تخلص و مشات بالجري جبداات الفلوس من صدرها خلصات واحد لاصوم قليلة شوية و رجعات بالجري جهة المستعجلات عطاتهم لا فاكتيوغ باش تسيفط للمختبر مع العينات .. ضارت كتشوف فيها لقاتها عاد غايبة و علقات عينيها فواحد الفرملي تابعاه بحال ظلو
صفية: خويا واش ماغاتفيقش .. مالها .. فوقاش تفييق قوليا عافاك
...: راه الطونسيون طاح ليها بزاف و تا الحمل لاعب عليها تا هو ، غي تهناي غاتفيق تفيق كاع ماتخافي
تنهدات كتحرك راسها بآه وصاتو عليها قربات تبوس ليه يديه و خرجات بالجري شدات طاكسي على سعدها و وعدها رجعات عند اللا عيشة .. لقاتها وجهها مخطووف و باين عليها هم التفكير و غي ساهية غي شافتها بحالا شافت الرحمة و قربات لعندها كطلع و تهبط فحالتها
عيشة: شوااقع!!! مال حالتك بحال هاكا ءءاا!!
صفية: خالتي بلاما تخلعي (بدات تفتف و تكمش فكمام الجلابة) راه راه راه
عيشة: راه راه و الغوت وراه ماالنا قولي شكاااين شعندك!!
صفية:(طلقاتها بالزربة) زهرة شافت باها و هربنا و بعدنا عليه و لكن طاحت سخفات و ديتها للسبيطاار
عيشة:(ضربت فخادها) اوييلييي
ضربة وحدة مع غوتة وحدة مع شهقة وحدة و هزت يديها فوق راسها.. قلبها غايسكت بالخلعة و دماغها ماقادرش يتقبل زهرة مجبدة فالسبيطار ، تنهدات صفية كانو جالسين فالطاكسي .. خلات غذاها فالنص حمدات الله و شكراتو لي كانت دفعات ليهم الطبسيل التاني ديال اللحم عاد جاها الخبر اما هي تخليلهم كولشي هاكاك و تخرج ، كتسمع لصفية لي كتعاود اش طرا و جرا بالديطاي و اللا عيشة غي كتنهد و دوح براسها
عيشة: قلبي كاان حااس .. كااان حااس غاتوقع شي حاجة لشي وحدة فيكم و الضربة جات فزهرة مسكينة
صفية: غاتكون مزيانة ماتخافييش ا خالتي .. انا وكان غي تسعفيني خليني نولي نوقف على الشغل بيما جيتي ، راه باقي العشى للرجال
عيشة:(تنهدات كتهزز راسها) صافي فوتي على طامو و سيرو ، انا نتهنى على زهرة نديها للدار و نجي نلحق عليكم
أنت تقرأ
أعد لي روحي
Romanceأخيرا عزيزاتي القارئات كتاب المكتاب و تقدر لهاد القصة تشوف الضوء و تكتمل... ♡ أعـــــد لـــــــي روحــــــي بــقلــمي: غـــزلان مـــرزوقــــي ♡𝖒𝖎𝖘𝖘 𝖌𝖍𝖆𝖟𝖆𝖑𝖎 °°كـــــلــــماتـــــــــــي°° كالنهار المشرق *هي* .. و *...
