♡اعد لي روحي
♡غزالي
☆الفصل الخامس: هدنة
☆الجزء 73
ناضت طامو كتجري هربات من عيشة منها نيت تلبس حوايجها ، فحين صفية مشات شعلات الدوش باش دوش هي و زهرة يحايدو عليهم تعب السفر و تعب تمارة .. كان دوش بالحطب ، الشوميني قدو قداش كيسخن الما .. و الانبوب طالع للسقف خارج مع السطح باش يطرد الدخان .. دوشو و خرجو مزينكااات الحنيكات بحالا عصرتي عليهم الرمان ، تكلفات صفية نشفات لزهرة شعرها مزياان خلاتها ترتاح ماجات فين تسالي تا كانت عيشة رجعات .. خلاتها هي و طامو يدخلو للدوش و دخلات هي للكوزينة توجد ليهم الغذا بنفس جديد و روح نشييطة ، دخلات عليها زهرة مكمطة فبينوار سخون و الفولاغ غليض على راسها . جلسات على كرسي و دارت يدها على خدها
زهرة: نعاونك فشي حاجة
صفية: سيري غا رتاحي ا خيتي ديك هي المعاونة لي غاتعاونيني بيها
زهرة: مالكم معايا مالكم !!
صفية: زهييرو (كتقطع فمطيشة و تهضر) راكي حاملة و لي داز عليك فهاد اليومين ماشي قلييل .. راكي عزييزة و غالية و مانبغيوش شي حاجة ضرك
زهرة: عاارفة و لكن راني غي حاملة مامريضاش شادة الركنة
صفية: واخا هاكاك الحمل راه كيسخسخ .. سيري رتاحي اختي و كولشي شوية من العقدة ديالك
هززت راسها كتنهد و ناضت للبيت لي كانت فيها .. تكمشات فالكاشة و جرت عندها ديك القرعة كلات زوج معلقات و رجعت تكمشت ساهية مع الرسوم كيف العادة و مخها رااه مجلي يفكر لبعيد .. خرجات عيشة و طامو من الدوش و تحط الغذا تغذاو فجو داافئ.. الضحك و التقشاب بيناتهم من غير زهرة لي غي ساكتة و تخمم ، هاد الحمالة خرجات ليها من الجنب .. تجمعات الطبلة و تقادت اللا عيشة فالجلسة كتكوس على كاس اتاي مشحر و هازة حاجب واحد فزهرة
عيشة: مال زينة الشلحات مقلقة و حالها مغير
زهرة:(تنهدت) لا والوو
عيشة: جاوبتيني غي من هاد التنهيدة لي درتي .. شكااين !!
زهرة: واالو اخالتي والله ، الساعاتوو لله و صاف ..
عيشة: سمعي فياا ازينة الشلحات .. واخا نشوفك تررككلي و تبكي الد.م ، غي ديك الروح لي ماتقتليهاش سمعتييي .. يالاه نوضي تكعدي لبسي حوايجك شوية و نخرجوو
زهرة: دبا شكوون لي جبد شي هضرة على شي روح
عيشة:(صغرت فيها عينيها) راني فااااهماااك و حاافظااك .. و دوك الفعايل ماغايدوزوش علياا ، يالاه نوضي سعدي ببنيتي و رخييها فيد الله .. ماتعرفي منا لغذا شنو مخبي ليك الزمان
زهرة:(عينيها دمعو) لي عارفة هو غايتزاد عندي شي بجغوووط لي غاينغص عليا حيااتييي كثر ماهي منغصة .. مااكرهتش نمو ووت و نتهنى
أنت تقرأ
أعد لي روحي
Romanceأخيرا عزيزاتي القارئات كتاب المكتاب و تقدر لهاد القصة تشوف الضوء و تكتمل... ♡ أعـــــد لـــــــي روحــــــي بــقلــمي: غـــزلان مـــرزوقــــي ♡𝖒𝖎𝖘𝖘 𝖌𝖍𝖆𝖟𝖆𝖑𝖎 °°كـــــلــــماتـــــــــــي°° كالنهار المشرق *هي* .. و *...
