أعد لي روحي

104

♡أعد لي روحي
♡غزالي
☆الفصل السادس: قدر ام تدبير!
☆الجزء 104

طنيييين قوي ضرب فوذنيها .. كتحس بالدنيا كدووور بيها ، غي الافواه لي كتحرك و مكتسمع تا حاجة ، كيجيها كولشي غااارق و بعيييد .. الناس غادية جاية و البعض دايز و كيشووف فيهم مصدوم ، صفية حمرة مزيينكة كتغوت و تنهج فحين اللا عيشة غي جالسة و دايرة يدها على راسها و دوح بيه .. اما طامو دايرة يدها على فمها و مرة مرة ضرب فخادها بحرر الفقصة ، بلعت ريقها كتحس بحلقها نااااشف و شاااحفة .. بغات غي الما و لسانها تقااال عليها بقوة الصدمة ماقدرات تا تنطق ، صافي دبا!! الفلووس مشااااو و تخورت تخوييرة صحيييحة!!! ماغاتقدرش تمشي للخاريج و تنفذ بجلدها!! خرجت تنهيدة مرعودة و الضبابة بداات تغشي عينيها .. حركت راسها بالجهد كتنفضو باش تمشي ساعة والو ، حولت نظرها للا عيشة لي كانت كتشاير بيديها و تغوت مع صفية باش تسكت .. رجعت خرجت تنهيدة خرى و وقفات ركابيها خاااويين بيها ، سميتها زهرة و الزهر لااا يمت لها بصلة .. شافو فيها يتسناوها اش باغا ديير فين خطات الخطوة اللولة تزدحت على طولتها من السما للأرض مغييبة خلاتهم ناضو يتغاوتو و يفيقوها ...
خذاوها للوبيطال تاني هاد المرة خااص ماشي ديال الدولة ، كان عندها انخفاض فضغط الدم علقولها سيروم و خلاوها تا تفيق على خاطرها .. خلصات اللا عيشة و رجعت للبيت فين كاينة جلسات معاهم دايرة يدها على خدها و صفية مسحت دمعة غفلاتها

صفية: ولاااد الحراااام والله لابقاتها فييهم

عيشة: اش غاااديري كااع!! الفلووس مشات و لي عطى الله عطاااه

صفية: ايلا مارجعتهاااش راني قح.بة مقطططرررة

عيشة: يهدييك الله يا هاد البنت

طامو: بقات فيا غي هاد الزغبية

عيشة:(تنهدت) نساو عليا دبا .. كولشي من الخيير ، من قال تمشي و طرالها شي حاجة!!! من قاال يفيقو بالباسبور مزور و يدييوها تكمد عظامها و هي حاملة!!

صفية: مانعرف اخالتي و صافي .. بصح حااالفة بحلوفي بربي المعبووود ماتبقى فييهم

ضربت فخدها مفقوووصة من الشمتة لي تشمتو .. يعياااو يقولو وكان و وكان و وكااان ولايني لي كتب الله هو هاداا ، سمعو انيين خافت صادر منها و ناضو ضارو بيهاا .. كتكمش حجبانها تا بدات ترمش و هزت يدها نيت لي فيها لانطخانول دارتها على راسها

زهرة: ااااخخخ راسي

عيشة: باش كتحسي ممم!!

زهرة: راسي كيضرني ا خالتي بزاااففف

عيشة: دبا يدوزك ا بنتي شوية و يعلقولك الدوا .. تسناي غي يكمل ليك السيروم

صفية: خااالتي راها حاملة اش بغيتي يعلقو ليها

عيشة: غي الباراسيتامول ماتخافوش

طامو: لاا اخالتي لي تخلينا نخلييوها .. يكمل السيروم نخرجو و نمشيو للدار نكمد ليها راسها و نديرلها ماسااج

تنهدات اللا عيشة مالقات ماتقول و زهرة رجعت سدت عينيها كتسمع و ساكتة .. اصلا ماعندها ماتقوول .. بقات فيها غي الفقصة ديال الدملييج لي مشات اللا عيشة باعتو و هاهوما دبا صدقوو بلاااش ...لا ديدي لا حب الملووك ، سالا السيروم و رجعو للدار فالسكاااات .. تقول راهم فعزو ، وحدة ماتهضر مع لوخرى .. بدلو حوايجهم و زهرة مشات ديريكت لبلاصتها كتحس براسها غايطرطق عليها ، جات طامو دفات شوية زيت العود و لاحت فيها الخزامة تم تم طفات عليها .. خلاتها تا طلقت مزياااان صفاتها و مشات عند زهيرو جلست عند راسها و بدات تماصي و دوز ديك الزيت لشعرها ، قالت ممكن البرد و ممكن تا الاعصااب.. دلكت راسها مزيااان و شدت فولاغ عقداتو فالطرف و هزت معلقة كبيرة ديال العود ، دارت الشال على جبهتها و جات موراها محصلة المعلقة فالطرف ديال الشال و بدات تلوي تا كيتزير الشال مزيااان على راسها عاد كترخف .. دخلات عليهم صفية الاعصاب كيشطحو فراسها و هزت طامو فيها عينها كتسول فحين زهيرو مرفوووعة

طامو: فين خالتي!!

صفية: مشاات للفرماسيان .. بالشوية على راسهاا

طامو: درتي الطاجين يسخن!!

صفية: درتوو .. نمشي نجيبو و نجي

مشات للكوزينة كانت دايرة الطاجين فيه الما كيغلي غلياااان و مسدود بالغلاقة ديالو ، طفاتو و هزت غي ديك الغلاقة رجعت للبيت لقات طامو غطات راس زهرة مزيان بشال سخوون و شدت ديك الغلااقة حطتها فوق راسهاا .. ماحد ديك السخونية كدخل لراسها و كتحس بعروقها يترخاااو و الالم بداا يمشي بمررة ، سترخاااات و استحلااات السخونية و هوما عند راسها ماحسااات تا غفااات بيها عينها....