♡أعد لي روحي
♡غزالي
☆الفصل الأول: انا انهار انا اتلاشى
☆الجزء 11
بضع ايام دازت جد رتيبة و هادئة لا جديد فحياة زهرة من غير العطلة ديال العيد الكبير لي شدوها ، و هاد المرة غيير الاعياد لي دازو .. كان خاصهم يطلعو للجبل باش يعيدو مع العائلة مجموعين و داكشي لي كان ، عيدو فوحدة من القرى التابعة لعين اللوح و رجعو فحالهم مبدلين الجو و مجددين طاقتهم .. وصلو كينزلو الحوايج من اللوطو و لحم العيد و احمد غي شاد فيهم و ينكر ، دخلات كتسووط مكتحملش فاش كيبدا يرعرع عليهم و ميرا وراها بنفس الطريقة باغا غي تهنى من صداعوو
احمد: بلاما تسناي الليلة ماغانباتش فالدار
ميرا:(ضارت لعندو هازة حاجب) تاني!!
احمد: و تاالت و راابع اااش كاين يالاه
ميرا: سيير الله يعفو عليك و خلاص سييير
دخلات و زدحت الباب على حر جهدها فوجهو خلاتو بدا اسطوانة خرى من السبان .. طلع فاللوطو دور الساروت و ديمارا كيعض فشنافتو و الشتا رقييقة كطيح ، العشية تعاشات و المغرب مابقالو والو و يأذن .. و غي يطيح الليل يخرجو صحاب الحال ، وصل للفاس و شد طريقو للبلاصة المعلومة .. سطاسيونا لوطوتو و نزل كيشوف يمين شمال و يسد المونطو ، دخل لوحدة من لي كافي كيقلب بعينيه تا بان ليه و مشى جلس معاه فحين السيد لاخر حايد الجورنال و طواه حطو قدامو..
...: السيي احمد عاش من شافك .. عواشر مبروكة
احمد:(كيهزز راسو) الله يبارك فيك الله يبارك فيك ..
...: حالك ماعجبنيش السي حمد ياك لاباس
احمد: واش نتا عارف لي كاين و تقولي حالك ماعاجبنيش (تغدد) رزقي كااامل مشى و بغيتني نشطح
...:(رجع هز الجورنال) اوا اش نقوليك .. القمر هو هادا ، نهار رابح نهار خاسر ، و من زهرك المكفس بقيتي خسارة مور لوخرى تا بقيتي على الضس
احمد: شنو ندير دبا ءءاا .. نبقى الله كريم!! فلوسي مشاو .. الاراضي مشااو .. نحمد الله لي درت ديك الخربة فسمية المرى اما تا هي كون مشاات و بقيت فالزنقة
...: بيع ديك البرويطة لي عندك و ولي تراهن .. لعى و عسى يتكعد ليك الميمون
احمد:(حرك صبعو) لا لا لا .. غانشوف لي يسلفني .. نلعب هاد الليلة باشما كااان نرد رزقي
...:(بضحكة استهزاء) واايلي .. فليلة وحدة ترجع الشي كااامل لي ضاع
احمد:(حرك راسو) هاانتا غاتشووف .. نوض تحرك معايا
...: اوا خلص هاد القهوة
احمد:(قربلو كيهمس) نخلص بز..بي .. غي قولي واش نخلص بز..بي
خرج فيه عينيه خلاه كيضحك و احمد مغدد مشنوق كاره مكتاائب ماكرهش يطلع غي من فوق شي طبلة و ينقز ينتا..حر .. خرجو من تما و شدو الطريق لوحدة من دار الباطرونات شدو السهرة بيما نتاصف الليل و يشدو الطريق لشي كازينو ، و فجلسة واشمن جلسة .. صالون على قدو فيه السدادر حااادرين و طوابل تا هوما قصاار فيهم لي تشهى الخاطر من مكسرات و قطعة .. الروج ضارب الطبلة من قنت للقنت و الشيشات قداش محطوطين فالأرض ، داير رجل على رجل كيشيش و التيتيز حداه كيتشاير ماكان غي لي محزمة بالموزون و كدير تمانياتون بترمتها على ايقاعات اغاني اطلسية .. جلسات حداه مولات الشي بقفطان لااصق مبين الفورمة و جلسات حداه كضحك و تلوز فالمسكة
...: مااال الزيين سااهي
احمد:(شافيها كيتنهد) ياامنة سلفيني عشرة و نردهم ليك بالدووبل
يامنة:(طلقات ضحكة مقح..بنة ديال الغدايد) هيهييييي .. عشرة!! و مالك ماتبييع ذهب المداام
احمد:(جر جرة طوييلة من الشيشة و بخ الدخان فالهوا) بعتووو و حطيت ليها فبلاصتو البلاكيور ..
☆☆☆☆☆☆☆☆
كولشي على واش نخلص بز..بي 😅😅😅
أنت تقرأ
أعد لي روحي
Romanceأخيرا عزيزاتي القارئات كتاب المكتاب و تقدر لهاد القصة تشوف الضوء و تكتمل... ♡ أعـــــد لـــــــي روحــــــي بــقلــمي: غـــزلان مـــرزوقــــي ♡𝖒𝖎𝖘𝖘 𝖌𝖍𝖆𝖟𝖆𝖑𝖎 °°كـــــلــــماتـــــــــــي°° كالنهار المشرق *هي* .. و *...
