♡أعد لي روحي
♡غزالي
☆الفصل الثاني: في ديسمبر تنتهي الأحلام
☆الجزء 43
تحط قدامها البيض بالزبدة البلدية ، اتاي مشحرر سخون و خبز سخوون تا هو .. فرماج زيتون و زيت الزيتون تا هي ، خوا ليه و ليها اتاي و بدا يقرب ليها الحوايج باش تاكل .. عزااات عليه و عينيها طااابو البكى و شفارها الطواال بحال ديال الغزالة كاع تنسلو ، الهم طاح عليها مرة وحدة هرس ظهرها و هي صغيرة .. شدات داك الكاس نتاع اتاي كتكوس عليه و تاكل بالمهل و هو غي ساكت و حاضيها .. غي التلفزة لي دايرة ليهم الحس و مهرسة شوية ديال الزمت لي راهم فيه
امين: فاش كتفكري!!
زهرة:(بملامح ممحية) بمنين غانبدا
امين: راكي عاد برهوشة شغاديري كاع!!
زهرة: خدامة فالديوور .. كااين لي كيقلبو على خدامات
امين: سحابلك غي جي و خدم فشي دار!
زهرة: المهم مانبقاش فالزنقة
امين: لمن باعك عمك!!
زهرة: لواحد السيد خاانز فلوس
امين: مايمكنش هاداك السيد ربحك و يفرط فيك .. كاع القمايرية كيعشقو الفلووس
زهرة: ماعرفتش واش الزهر ولا قلة الزهر باش سلت من بين يديه
امين: دارلك شي حاجة!!
زهرة:(سهااات كدوز داك الكاس على شفايفها) يكون دار لي دار .. كان باقي هو املي الوحيد ، كان هو الجنة و هو الجحيم فنفس الوقت
امين:(عقد حجبانو) زهرة ياكما شي مسلسل مكسيكي هادا
زهرة:(فرطات ليها ضحيكة من الهم لي راها فيه) لي عشتو انا كثر من مسلسل مكسيكي
امين: بنت بحالك غايكون همها هو تشري ستيلويات ملونين باش تزوق دفتر الذكريات
زهرة: و تشري لصاقات ديال باربي و فلة باش تلصقهم فيه .. و فينما لقينا شي تيتيز فشي مجلة ولا جورنال قطعناه و لصقناه نتعنبو عليه
امين: و تبقى تكتب دوك العبارات ديال ام كلثوم و كاظم الساهر .. الحياااة مسرحية مؤلفها القدر
زهرة: ابطاالها البشر .. في القديم كانت تؤدي الى الحياة الزوجية
امين: و اليوم تؤدي الى مستشفى الامراض العقلية
ضحكات مبينة سنيناتها مستفين و صغييورين بحال الروز الحبة عند ختها و ضحك امين هو لاخر .. بصح فغيمون طاح ليه العجب كيفاش ديك الكميشة عاشت الاكشن و مزال واقفة
امين: واللهيلا فغييمون كنهضر معاك بنيتي .. مكتفكريش ترجعي لداركم!!
زهرة: نرجع باش يذبحني بابا!! وكان بقات عمتي حية ممكن دافع عليا و تجي جهتي .. بصح هي مااتت ا امين مااااتت
طرطقت بالبكى تاني و تشهق .. قلبها مكوي بعافية مهييلة و كلما تقول صافي هاهي طفات كتولي تشعل ، لمن ترد الرااس و لمن تشكي همهاا و شكون يشد بيدها!! شكون غايحميها و يوقف معاها و يكون سند ليها!! مخها حبس بالتفكيير فالأخير كتقول لي خلقني مااينساني
أنت تقرأ
أعد لي روحي
Romanceأخيرا عزيزاتي القارئات كتاب المكتاب و تقدر لهاد القصة تشوف الضوء و تكتمل... ♡ أعـــــد لـــــــي روحــــــي بــقلــمي: غـــزلان مـــرزوقــــي ♡𝖒𝖎𝖘𝖘 𝖌𝖍𝖆𝖟𝖆𝖑𝖎 °°كـــــلــــماتـــــــــــي°° كالنهار المشرق *هي* .. و *...
