أعد لي روحي

بارت 12

♡أعد لي روحي
♡غزالي
☆الفصل الأول: انا انهار انا اتلاشى
☆الجزء 12

تزلعات بالضحك تا ضحكاتو معاها و هو غي يبقبق فالشيشة و يسووط .. شغلو الشاغل هو يلقى فلوس باش يقمر .. تنهدت يامنة و ضربات كتفو بكتفها

يامنة: نعطيك خمسة اش قلتي

احمد:(شاف فيها مخلوع) حلفي

يامنة: بصح تردهم ليا فسيمانة

احمد:(ضحك و بانو خويات الضراس) اجي نبووسك اياامنة اااجي

زادت تزلعات كضرب بيدها على كتفو تبعدو زعماكينات و هو وذنيه تقلشو بالفرحة .. ضربو شطحة و جابت ليه الملينات خباهم فجيبو فرحان و خرج هو و صاحبو فاتجاه واحد من لي كازينو ، مشى شد بلاصتو و بدا لعبة ورا لعبة و يتراهن بحاجة قلييلة و يربح الدوبل ديالها تا قدر يرجع النص لي ضاع و خرج فرحااان و مرتااح على الاخر .. دبا رجع النص و خاصو يرجع النص لاخر و الترييبل ديالو ...

اولى خيوط الصباح انقشعت و رسلات ضوها نورات بيه المدينة ، فاقت كتجبد نعسات مرتاحة و فوق مرتاحة هاد الليلة .. تكسلات مزيان و ناضت كتفوه و تحك شعرها دازت للدوش هو اللول غسلات وجهها عاد خرجات هابطة كدندن و تعيط بصوتها لي عندو بحة زوييينة رنانة

زهرة: عمييتووو .. فيينك ياكما باقا خامرة .. عمتييييي (وقفات مصمرة) عااااااامتييييييييييي

طلقات صرخة من اعمق اعماق قلبها فاش لقاتها طايحة مجبدة فالأرض كجثة هامدة ، طاحت على ركابيها جنبها كتغوت و تهززها تا بانت ليها كتحرك رموشها و ناضت كطير جابت ليها كاس ديال الما و يديها بزوجهم كيترعدو.. بلاصتها قدها قداش فقلبها و تخطاها عمتها مشات خلاا ، هزت راسها بالشوية كتبكي شرباتها الما و ماتبقى رشاتو على وجهها و تمسح على راسها

زهرة:(كتشهق) عمتي .. مالك اعمتي قوليلي مالك .. نمشيو للطبيب!! نعيط لعمي احمد يجي يدينا للسبيطار ءءاا

ميرا:(بصوت متعب كتنهج) تعطالو فالقلب الشلاهبي لاخر ..  عاونيني نوض مابيا والوو ماتخافيش .. اي ا صدري

زهرة: شنو كيوجعك ا عمتي !! يالاه نمشيو للطبيب انا مزااوكة

ميرا:(نايضة كتعكز) غي الطونسيون دارتها بيا و صافي (جلست فوق السداري) انشرب شوية لبن حامض و تقاد

زهرة: انا نجيبولك دبا

طارت للكوزينة كتمسح دموعها و تخوي فاللبن فحين ميرا دارت يدها على خدها كتخمم .. الاعراض بداو يبانو و ايلا مازرباتش فالعلاج غاتوصل لمواصل لا يحمد عقباها ، تنهدت سادة عينيها وكان تمشي منها غي الدوخة و تكات بظهرها على الوسادة تا رجعت زهرة كتجري و فيدها كاس قدااش ديال اللبن خلاتها تهززت بالضحك بلا هواها

ميرا: الله يابنيتي و مالك على هاد الكاس

زهرة: شربي شربي باش توكضي .. راه توقعلك شي حاجة نمو وت

ميرا:(كانت كتشرب غي سمعت كلماها حطت داك الكاس) شوووت بعيد البلا عليك .. اجي عندي الحنينة اجي

جرتها لعندها عنقتها و نزلو دموعها فصمت ، فيقتها من السهوة لي سهاتها فهاد بضع ثواني بأبسط جملة .. توقعلك شي حاجة نمو وت ، تنهدات كطلب فسرها الله يشافيها و قررات تعجل فعلاجها قبل ما دهور حالتها

ميرا: زهيرو

زهرة:(مخشية فيها) همم نعام

ميرا: نوضي فطري .. انا خاصني نطلع لفاس ضروري و نجي

زهرة:(شافت فيها) علاش ا عمتي!! نمشي معاك؟؟

ميرا: لا غي بقاي .. كاع ايلا تعطلت فالعشية نرجع واخاا ، خاصني نشوف عائلة عمك نسيتي

زهرة:(عوجت فمها) اييه .. ايلا هاكا هنيتييني

ميرا: حياني عليك ا سليعفانة .. نوضي خليني نمشي .. ايلا قنطتي سيري عند سعيدة

زهرة: داكشي لي غاندييير تا انا

حركات ليها راسها زعما احياني عليك و ناضت بلاتي عليها مازال الدوخة شاداها ، طلعات بدلات عليها و هزت فلوسها لي كانت مخبية لدواير الزمان .. شافت جهة البواطة ديال الذهب تا كانت غاتهز و قالت من بعد مانديش معايا كولشي مرة وحدة ، تكبطاات مزيان وصات زهرة و عاودات باش تحضي راسها عاد خرجات فاتجاه المحطة باش تشد طريقها لفاس...