♡أعد لي روحي
♡غزالي
☆الفصل الثالث: مقطوعة من شجرة
☆الجزء 54
تكمشات فراسها كتنين و الحريق باقي فيها كيقطع تا كتقول هاهو حبس و كيرجع يحسك فيها .. بحال الموااس كيدوزو فكرشها ، خرجات اللا عيشة بجلابتها كدور بين الدروبة تا وصلات لواحد الباب و شدات ديك الخميسة بيها دقات .. جاها صوت بعيد كيسول بشكون و نطقات بقريبب ، تسنات شوية و تحل الباب كطل منو بنت فمقتبل العمر و تسائل
...: مرحبا ا لالة
عيشة: ربي يخلليك الغزالة .. كاينة لا شافية
...: دخلي اخالتي راهي لداخل
سمات الله و دخلات كتمشى بالمهل تا سبقاتها البنت ، دازو مع واحد الدخيلة مظلمة شوية تا خرجو فالمراح مسقف ديال الرياض مضوي كيبهج النفس .. حيدات اللا عيشة الشال الغليض من على راسها تا بان وجهها و جلسات فوق سداري فالوسط ديال المراح تا خرجات مرى تا هي كبييرة شوية و لايني باقا شادة شوية فصحتها .. صغرت عينيها شوية تبشر وجهها و نطقات ضاحكة مقربة ليها كتسلم و تعاود
شافية: اللا عيشة هادي!!
عيشة: هياا هااادي اللا شافية .. كي دايرة مع الصحيحة
شافية:(جلسات و جلست جنبها عيشة) اوا هاحنا الحمد الله نعديييو تا يسلكها مولاانا .. راحنا نكبرو و الركابي بداو يعياو
عيشة: كااااينة ا ختيي غي الله يجعل قد الصحة قد العمر
شافية: اميين ا ختي امييين .. ايواا ، ماالك المجية ديالك ماشي هي هاديك و اللون ديالك مااشي هو هادااك
تنهدت كتهزز راسها كانت جات ديك الخويدم الصغيرة حطات صينية نتاع اتاي و طبك ديال الفاكية و طبسيل دالحلوة و الفقاص .. خوات ليهم اتاي فالكيسان عطات كل وحد كاسها و انساحبت
عيشة: ااش غانقولك اللا شافية .. بغيتك تجي معايا تشوفيلي واحد البنية خدامة معايا ، شكيت فيها حاملة
شافية: ويييل الشيطاااان و ولادو عشرة .. كييي طرالها ياكما البنت فريييفة
عيشة: لاا لااا البنت مكتهزش الدجاجة على بيضها .. غي مسيكينة هربات من دارهم و مدينتهم و رماها الزماان لبين يديا
شافية:(هزت راسها) عاارفاك اللا عيشة نتي مرى حنيينة و كاع البناات لي لقيتيها مشردة و تايهة كديريها تحت جناحك تا كيسهل عليها الله ..
عيشة: لوجه الله .. حراام يتكرفصو مساكن و الزنقة مكترحمش
شافية: اجرك عند الله كبيير اللا عيشة (تنهدت) عاوديلي بالتفصيل شنو عندها .. باش نتافقو هنا
عيشة: البنت صغييرة اللا شافية و عاد قالت بسم الله فالدنيا لي قلنهالها غاديرها مغاتعكسش لينا .. و الغلطة لي غلطاات هاهي تخلص فيها دباا
شافية: شطرالها دبا واش كدوخ ولا كتقيى!!
عيشة: لا هادي والا هاديك .. نقزت من الدروج تا صرصرات لربي لي خلقها .. سحابلي السرة قلت نمسدلها كرشها نطلعلها .. تا كتقولي الحريق عندي لتحت فكرشي الصغيرة غي كنعكز كطير و تنزل بالحرييق
شافية:(عضت شنافتها) لا اله الا الله و صافي .. ايلا كانت حاملة طيحو ولا تخليه!!
عيشة: يالعياذ بالله اختي شافية .. اشدانا لشي روح نزهقو ها!! نخلييوه اختي تا ايلا مابغاتو هي نربييه اناا .. اوا يالاه بعدا شوفيها و نفكو ايلا كاين مايتفك بعداا
شافية: مايكون غي الخيير ان شااء الله .. انا ندير حايكي و نمشييو
ناضت اللا شافية او دادا شافية باش معروفة فديك الحوومة.. قابلة و على يديها تزادو بنات و ولاد راهم رجعو قدهم قدااش ، حكيمة و عندها معرفة بالاعشااب كداوي بيهم و كتكوي تا على العجب المعجب العجاب .. و سبحان الله ربي كينزل رحمتو على يديها ، خرجات عند عيشة لابسة حايكها و هازة قفة من القش فيدها و خرجو طالقين رجليهم فاتجاه دار عيشة .. دخلو و مشاو للبيت عند زهرة ، كانت ناعسة جنب و راسها مايل من السداري كتنيين و دمعتها على خدها .. خرجت عيشة البنات و بقات غي هي و شافية و زهرة فوسطهم صفرة بحال الحامضة
شافية: خاصنا نفرشولها فالارض ماغاتجينيش تماا
عيشة:(كتجبد الفراش) لي بان ليك هو هاداك نديروه
شافية: ماقلتيليش فوقاش المرة التالية جاتها حق الشهر
عيشة: واهو جاتها غي الشهر لي فات بصح ماطولاتش
شافية: زعما تكون التزيينة!! مهم اجي اجي نتعاونو عليها نحطوها هنا و قولهم يجيبولي ما دافي ..
أنت تقرأ
أعد لي روحي
Romanceأخيرا عزيزاتي القارئات كتاب المكتاب و تقدر لهاد القصة تشوف الضوء و تكتمل... ♡ أعـــــد لـــــــي روحــــــي بــقلــمي: غـــزلان مـــرزوقــــي ♡𝖒𝖎𝖘𝖘 𝖌𝖍𝖆𝖟𝖆𝖑𝖎 °°كـــــلــــماتـــــــــــي°° كالنهار المشرق *هي* .. و *...
