أعد لي روحي

Part 70

♡أعد لي روحي
♡غزالي
☆الفصل الرابع: نبضات رعب
☆الجزء 70

خرجو من تما العشية كانت تعاشات و العصر اذن و المغرب مابقى ليه واالو .. دخلو للدار كل وحدة فين كتنهد عيشة فاهمة زهرة مزياان و زهرة كطلب الله كل دقيقة و ثانية باش تهنى من الشي لي فكرشها ، دخلات للكوزينة كتشوف شنو طيب ليها و دماغها مرفووع .. ماباغياش تخليها بوحدها و تمشي فنفس الوقت ضروري خاصها تمشي توقف على شغلها و تكملو على اكمل وجه باش تا واحد مايشمت فيها والا يقول هاهي لالاكم عيشة لي ظلو تباهاو و تشكرو فطيابها .. كل خدمة الا و فيها الاعدااء و الشامتيين ، دارت بطاطا تصلق مع شوية خيزو .. عارفة تمام المعرفة نقطة ضعف زهرة هي بطاطا مهروسة مع شوية زيت الزيتون و بزاف دالفرمااج .. مادازتش تا نص ساعة تا كان الطبسيل موجود و الفوار كيطلع منو بالسخونية ، طلات عليها كانت مكمشة فالكاشة كتفرج فسبايستون و دايرة قرعة ما سخوونة تسخن رجيلاتها من البرد .. قربلت عندها حطات الطبسيل فالطبلة و جمعت يديها

عيشة: نوضي تاكلي

زهرة: مافيااش

عيشة: ايلا راك ناوية تقتليه بالجوع راك غااالطة راكي تقتلي غي راسك و خلاص

زهرة:(عوجت فمها) ماشي عليه .. كنفاتني ريحة الدجاج و المرقة ، شبعوني بلا هوايا

عيشة: شبعوك تا على بطاطا مربوزة و الفرماج

ناضت بعيون لامعة فيهم الفرحة، كتفرح للبطاطا مربوزة كثر مكتفرح لشي حاجة اخرى .. تنهدات زهرة على حال هاد البنت مسكينة فحين هي جرات داك الطبسيل عمرات المعلقة و خشاتها ففمها كتبنن ، كتسطى عليها بحالا راها كتاكل الشواا

عيشة: العقدة ديالك كليتيها

زهرة: تا لبلاتي .. مممم خاالتي شحال جات بنينة ، كثرتي فيها الفرمااج .. شهاد السخااوة

عيشة: كوولي و باراكة من التشقليل شحال فيك فهامات (كتقاد زيفها) ديري عقلك الله يرضي عليك .. ماتخليش قلبي يتشوى علي بنية بحالك

زهرة:(تنهدت بألم) ماغاندير والو غي تهناي

عيشة: كنتمنى ا زينة الشلحات .. كنتمنى (ناضت كتحط على كتافها كاب) غانحاول مانتعطلوش فالليل .. بحال والو غدا نسافرو

زهرة:(حلت عينيها على وسعهم) بصح!! فيين؟؟

عيشة: للصويرة .. تنساي شوية الهم لي داز عليك .. و تنساي تا شوفة باك

عضت على شنافتها غاطيير بالفرحة مالقاات راسها تا كانت ناضت عنقات عيشة مزييييرة و خرجت تنهيدة مرعودة .. هزت يدها باستها بعمق و حطت كفها على حنكها .. بحالا كتستمد من عندها القوة الحنان و الاماان، كتحس بيها فبلاصة ماماها لي تخلات عليها .. كتحس بيها بحالا عمتها لي خطفتها الموت منها فرمشة عين .. كتحس و كتحس و كتحس و تعيى تهضر و توصف و تبغي ترد لعيشة حقها ماغاتوفيهش ، دمعو اللا عيشة عينيها .. و جرتها تاني عنقتها عندها بحرارة كتقاوم دموعها ، تصرف بسييط.. خلى قلبها ينبض بعنفف شديد و تحسها بحالا بنتها ولداتها من احشاءها ، فعلا زهرة خسرات الكثير و الكثير و لكن الدنيا عطاتها واحد الهدية الا وهي اللا عيشة..