أعد لي روحي

بارت 22

♡أعدي لي روحي
♡غزالي
☆الفصل الأول: انا انهار انا اتلاشى
☆الجزء 22

رسل الصباح الضو ديال ناشرو فالأرجاء و تسلل من شقات الريدو ضوا شوية البيت و بين شنو فيها .. كانت فبلاصتها مخشية مكمشة و كتقفقف بالبرد كترعد ترعاد و وجها مزييينك و سخون تحط عليها مقراج يطيب ، تحل باب البيت كان هاز فيديه زوج ديال لي بويوط .. عراها تلمس بين رجليها و الفراش شافها ياكما بالت على راسها بسبب الخوف و البرد ولكن ماكان والو ، حط بويوط سخونة عند رجليها و لوخرى دارها عند صدرها بحالا خلاها تعنقها لعل و عسى تحس شوية بالدفى و ماتبقاش ترعد .. جر كاس ديال الما دار فيه اسبيجيك خلطها و هز راسها بالشوية كيفيقها و هي مافايقة ماناعسة ، نعسات معنكشة و نعاس كاع مريض بسباب السخانة و لاكغيب

اسيم: زييهرا .. زييهرا فيقي

زهرة:(بين الوعي واللا وعي) ببعدني

اسيم: نوضي شربي الدواا و نبعدك .. هاكي

زهرة: هنن لاا لااا عافاك

اسيم: ففف بدا يطلعلي زبل للراس انا (بقا يتقاتل معاها) نووضي حسن مانجبد معاك

جرها من رقبتها تا جلسها نيشان و زير عليها شربات داك الدوا و رجع غطاها كيدكن الغطى عند جنابها ، رجعلها ديك البويوط عنقاتها و بعد داير يديه فجيابو و يقشر فشنافتو .. سمع دقات خفيفة فالباب مشى حلو لقى الخادمة ديال الفيرمة هازة بلاطو فيديها ديال الفطور قد السخط ، شار بيدو فين تحطو و رجعات خرجت فحالها مطنشة دايرة راسها ماشافت والو .. جلس يفطر فهدوء و زهرة المسكينة مزال كترعد تا بدات دخلها ااسخونية ديال لي بويوط و الدوا بدا يدير خدمتو عاد بدات تهدن و ترخى .. نتاظمو انفاسها و مابقاتش مكنززة تما فين نعست برااحة و مشات فسابع نومة .. تنهد و ناض خارج من ديك البيت كيشوف فساعتو ، كانت قرابة الطناش ديال النهار .. نزل بخطوات رزينة خرج لبرا ، الثلج مغطي المكان كولو كيبان ليك غي البيض من القنت للقنت .. و هو باارد كيهب كيلسع البشرة ببروديتو ، لابس بوط طويل واصل تحت الركبة .. سروال اسود مزير شوية ، و لفوق لافيست سخوونة سدها بالصدايف من جهة الكتف و جاو مايلين هابطين للوسط تا للتحت .. شاف يمين شمال داير الكاسك ديالو و مشى ناحية واحد الشجرة كانت مربوطة فيها الفرس ديالو ، رباها على يدو من نهار تزادت و كبرات معاه شوية بشوية .. تنهد ركب عليها كيمسح بالشوية عند رقبتها و عي كتصهل صهيل خافت و تحرك بحركات دليل على فرحتها

اسيم: ساام توحشتينيي ممم .. ههه نو نو بالشوية شووت سااام

...: شوية و غاتبدا تنقز بالفرحة

تلفت لمصدر الصوت كان لعجوز فالسبعينات من عمرو .. بتاسم ليه و سام ضربات الضورة على راسها و تهزز

اسيم: توحشتها و توحشااتني ههه

...:(بابتسامة) بااينة غي من حركاتها (نحنح) قولي اولدي .. قبيلة مابغيتش نهضر لداخل حدا الخدامات

اسيم:(شاف فيه بعفوية) نعام ا عمي محند

محند: شكون ديك البنيتة لي جبتيها معاك

اسيم:(نحنح كيرطب حلقو) مقطوعة من شجرة

محند:(عرفو كيراوغو) تكون لي تكون اولدي .. اوياك تقهر البنت ، الدعوة تخرج غيك طولتي ولا قصرتي .. رماها المكتاب فطريقك ، و عارفها مقطوعة من شجرة .. ماتكملش عليها ا ولدي ، دير فيها حسنة ماتعرف ربي اش غايهز عليك .. شوف فيها مك و ختك و بنتك مستقبلا

اسيم:(مط شفايفو مال من السيرة) ماتخممش ا عمي كون هاني

محند: اوا على الله...

الطعاالييق انا لااا ارااهااا 🥺🥺 التتمة غدا ان شاء الله و غانحاول نبدا بكري .. تانتوما فكروني و طاكيوني باش نبدا نحط بكري .. تصبحو على خيير