♡أعد لي روحي
♡غزالي
☆الفصل الثالث: مقطوعة من شجرة
☆الجزء 60
حركات راسها متعجبة من النعاس لي ولا فيها و لتاحقت بيهم كتفطر فطور بلدي فاسي مية فالمية .. غي كملو خلاو طامو تكلف بالدار و البنات هبطو كيجمعو المرامط و مرميطة كبيرة لي فيها الدجاج المشرمل و شلا حوايج غايحتاجوهم باش يطيبو .. وقفات هوندة عند باب الرياض جاو زوج دراري كيهزو فالحوايج و يحطو اللور و البنات بجلالبهم غلاضين ديال البرد و لاويين الشيلان على راسهم
...: لالة زهييرو .. عاش من شاف هاد العوينات
زهرة: اداك سلوم الجيارة هز الحوايج حطهم فبلاصتهم بلا بساالة
...: غي اشارة وحدة منك نحضر ليك النجووم تحت رجلييك
زهرة: يااكما نتا داك الفقيه لي كيجمد الما فالسماا .. سيمو بلا ضسارة والله و نقولها لخالتي ماغايعجبها حال
صفية: مزال ماهداك الله ا سيمو من هاد التعناب دلارووب
سيمو:(حك صدرو كيتنهد) تا كنتوب و تشد الطريق و فاش كنشوف عوينات لالة زهيرو كنرجع ا زيرو
زهرة:(خنزرات فيه) وا غي تبع هاد زهييرو تا تخرج عليييك
جا ينطق غي شاف عيشة جاية سكت حادر راسو و مشى ركب جنب صاحبو .. ركبو لور بتلاتة مسطرين و اللا عيشة غي ترضي عليهم و تعاود ، دييما مسلكينها هوما فاش يكون عندها الثقل كيوصلوها بيها بقشها و يرجعوها .. وصلو لدار الفرح نزلو الحوايج و دخلو للكراج فين كانو موجودين المجامر علامن يطيبو ، كفضو البنات على ذرااعهم.. و بداو يطيبو الدجاج فحيين اللا عيشة مكلفة باللحم و كتعسل فالبرقوق ، تعاونو معاها البنات شي كتفسخ اللوز شي دارت البيض كيتصلق .. جات رحمة معاها زوج بنات لي غايتكلفو باش يغسلو المواعن و يسربييو العيالات ، سلمات عليهم و جلسات تشيخ مع اللا عيشة دايرين حديث و مغزل .. زهرة عينها غي مع دجاجها خايفة عليه و كتقطع فالكبادي بعدما طيباتهم نص طيبة من بعد عاد تلووحهم .. كطلب الله تجي البنة كيف العاادة و الا السمعة ديالهم غاطيح.. قادو الشلايض لي غايرافقو الاطباق الرئيسية ، شوية يبقاو عاطيينها للضحك و التكركير شوية يخدمو و الوقت غادي.. حيدات الدجااج و لاحت البصلة باش دغمرها مع الكبادي خلاتها طيب و بقات دور بحال الفراشة ، عندها الطياب شي حاجة عزييزة عليها و بدات تجريلها فالدم بحال الغنى و الشطييح .. مشات طلات على اللحم و دازت من جهة صفية لي كانت تقشر ماطيشة ، ماشافتش واحد القشرة كانت طايحة فالارض و تهزت للسما و تزدحت للارض شدت شدة وحدة فظهرها و عينيها خارجين حست بالعمر خارجة جاب الله كانت بعيدة على المرامط اما هي كانت اليووم تشوطات .. طارت عندها عيشة كتقلب فيها و صفية هرب منها الد م الدمووع نقزو من عينيها ، داورو بيها كل وحدة منين كتسول و هي النفس مقطوعة فيهاا .. دخلو مالين الدرا للكراج فاش سمعو الغوات و كثرة اللغى تا دخل واحد من العائلة هزها دخلها لواحد من البيوت و عيشة موراها غي كتويل مخلية صفية بوحدها مقابلة المرامط
...: كي طرالها!! واش نديوها للسبيطاار
عيشة: زهرة .. باش كتحسييي
زهرة: الحرييق اخالتي الحرييق كيقطع فياا
عيشة: تمشي للسبيطاار!!
زهرة:(عضت شنافتها) مممم لا لا لااا مانمشييش تمااا .. اممااا ظهري تهرس
...: جري عيطي لخالتك تكمد ليها ظهرها .. ربي و مزينها بنية هاديي غي العييين
عيشة:(كتهزز راسها صفرة) الله يحفظ و خلااص .. زهيرو كضرك كرشك بزااف!!
زهرة: الحريق فظهري كرشي مكنحسش بيهااا
تنهدات كتلوى بالوجع تا دخلات وحدة كتجري تشوف بنت الطيابة لي طاحت تمسد ليها ظهرها تا وقفت مسمرة و زهرة هي الاخرى طار الوجع طاار الحريق بقات غي تشووف و مخرجة عينيها!!
فاطمة: زهرة!!!!
زهرة: خالتي فاطيمة (زيييرت على يد عيشة كترعد بالخلعة) خالتي وليت شوية لاباس يالاه نمشيو
أنت تقرأ
أعد لي روحي
Romanceأخيرا عزيزاتي القارئات كتاب المكتاب و تقدر لهاد القصة تشوف الضوء و تكتمل... ♡ أعـــــد لـــــــي روحــــــي بــقلــمي: غـــزلان مـــرزوقــــي ♡𝖒𝖎𝖘𝖘 𝖌𝖍𝖆𝖟𝖆𝖑𝖎 °°كـــــلــــماتـــــــــــي°° كالنهار المشرق *هي* .. و *...
