♡أعد لي روحي
♡غزالي
☆الفصل الخامس: هدنة
☆الجزء 82
خرجات من الدوش مسندة على اللا عيشة رجليها ماقادرينش يهزوها و قلبها غي طالع .. رجعوها للبيت تكات فالناموسية كيغطيوها و اللا عيشة كتمسح ليها وجهها بفوطة فازكة شوية و كترجع شعرها لوور ، الردان سخفها و تا الطونسيون عندها مرة مقاد مرة هابط
طامو: نديرولها شوية حسوة تكمد بيها جنابها
زهرة:(حركت راسها) ام ام لااا
عيشة: نديرلك بطاطا مربوزة
زهرة: هادي ااه .. ماتكثروش الملح
صفية:(عزات عليها) زهيرو باش كتحسي دبا!! مزيانة شوية
زهرة: الردان سخفنيي
عيشة:(شافت فصفية) قبيلة جبت بكية دالفرماج مربع .. جيبيلها وحدة و ديريلها البيض يتصلق ، غي هاد الكيرية و بيض مصلوق مملح غايقادولها الطونسيون
صفية: صاف هي اللولة (ناضت تجري) نحك ليها مطيشة بيما تصلق البيض!!
زهرة:(شافت فيها فشلانة) واش سحابلكم مرميطة عندي لي جا يلوح فيها شي حاجة!! راها معدة هادي ماشي كوكوط دالحريرة
عيشة:(دارت يدها على راسها) اربي السلامة .. بغيتي مريضة بغيتي صحيحة هاد اللسان عندك زوج ميتروو .. خمدي حسن مانخمد مك يالاه
رجعت تكات على رجلين عيشة كتفرنس و صفية خرجات تجيب ليها الفرماج .. حست بالراحة و هي فأحضان عيشة ، ربي عوضها بشحال من حاجة و حاحة علاش لي تبقى هازاها مين تقالت .. تنهدات و هزت راسها فاللا عيشة
زهرة: عشاكم غايبرد ا خالتي
عيشة: ماعلييش .. نهجي نتي شوية و نوضو نتعشاو!! دبا بداك الوحم كنتي مشيبانا و غاتزيدي تشيبينا
زهرة: حرام عليك اخالتيي .. فكرتيني فماما ، بغيت نمشي غدا نهضر معاها
عيشة: فين تهضري معاها!!
زهرة: نشوفو شي سيبر .. نخلي ليها غي ميساج و نشوفها كي دايرة و فين واصلة ، توحشتها
عيشة: و زعما ماتقولهاش لباك!!
زهرة: لا .. بابا مكيعرفش لهادشي و هي مكتحملش تهضر معاه (تنهدت) شحال غانبقاو هناا!
عيشة: تا نحس بيك رتاحيتي و نرجعو .. و مرة هرى تبقاي تاخذي احتياط فاش تخرجي
زهرة: داكشي فاش لقيتيني كنفكر .. غانبقى مرة مرة ندير اللثام
عيشة: زهيروو .. اححمم
زهرة: نعام ا خالتي
هزت عينيها فيها و اللا عيشة كانت كتمشط ليها شعرها بصباعها .. تنهدت و الحروف واحلين فحلقها ، تقولها ليها ولا لا!! خايفة تفهمها غلط .. و لكن هي بغاتها تضمن راسها و مستقبلها و دير علاياش تولي !!! ماشي غي هادشي تربي ولدها ولا بنتها بلاما تخاف و بلاما تهز الهم .. تنهدت كتحاول تحرر الحروف من حلقها و ترتب كلماتها فين جات تنطق دخلات صفية
صفية: هاكي ها الفرمااج .. كولي و اجيو نتجمعو كامليين ماتبقايش هنا راسك
زهرة: لا لا ريحة الزيتون فالمرقة طلعات ليا قلبي .. تا تعشاو و نجي نتكمش حداكم
صفية: هوووف .. خالتي يالاه نتعشاو ، طامو دارت بطاطا تصلق هي و البيض
عيشة:(هززت راسها) صاف واخا .. هانا جايا
مشات صفية كتشالي بشعرها و عيشة ناضت خلات زهرة تقاد راسها على الوسادة .. غطاتها و زادت خارجة تا استوقفتها فالباب
زهرة: خالتي شنو كنتي باغا تقولي ليا!!
عيشة:(ابتاسمت فوجهها ابتسامة عذبة) ماشي شي حاجة .. رتاحي دبا بلاتي و لحقي علينا...
أنت تقرأ
أعد لي روحي
Romanceأخيرا عزيزاتي القارئات كتاب المكتاب و تقدر لهاد القصة تشوف الضوء و تكتمل... ♡ أعـــــد لـــــــي روحــــــي بــقلــمي: غـــزلان مـــرزوقــــي ♡𝖒𝖎𝖘𝖘 𝖌𝖍𝖆𝖟𝖆𝖑𝖎 °°كـــــلــــماتـــــــــــي°° كالنهار المشرق *هي* .. و *...
