طلعت لشمبرتي من هدرتهم يعني راح يفيق بيا . قعدت فوق السرير نخمم في حل طريق لي نروحلها نلقاها مغلوقة في وجهي علابالي نهايتي كيفاش راح تكون يا في سبيطار يا برة مطرودة من دار سيرتو ادا سمعو خالي الوسطاني ومرتو هما أصلا راهم يستناو في اقل حاجة عليا غير باه يطردوني برة . شفتوا دخل هاز في يدو بلاط فيه سندويتش وكاس تاع جي . حتى هو قال كون تغطس روحها في الذهب متزيدش ترجع كيما كانت يعني موحال راح يوقف معايا سيرتو بعد كلشي صرى . قالي في واش راكي تخممي راني من الساع وانا نقولك احكمي . قتلوا والوا قالي مراكيش دايخة درك قتلوا لالا راني لباس حطلي لبلاط فوق سرير وقعد في الكرسي تاع الكوافاز قابلني ودار رجل فوق رجل قالي مدام راكي لاباس تقدري تقوليلي وش شربتي صباح حتى وصلتي للحالة هاذي قتلوا راني قتلك شربت دوا تاع راس قالي شوفي جوليا أنا مرانيش ناكل من وذني باه تفوتي عليا حاجة كيما هادي بصح معليش نفوتها بصح تفكري هادي القعدة وبلي جيت سقسيتك وانتي كذبتي عليا كيما بزاف مرات كذبتي فيهم عليا وكان نفيق بيك راكي ديري في حاجة ملازمش ديريها متتوقعيش وش ممكن ندير فيك فهمتي ولالا . وقف وجا ماشي قالي لي راني ندير فيه كامل في خاطر الحلفة والوعد لي حلفتهملي يماك سينو انتي متهميني ما نكسر راسي بيك وحدة كيما انتي بنت . كان راح يقولها كي شافني الدمعة في شفاري سكت وكمل خرج . وليت نقول لروحي شفتي يا جوليا بلي انتي ما عندك حتى واحد شفتي يا جوليا بلي انتي أصلا متستاهليش تعيشي . شفتي يا جوليا بلي من راحت يماك كان لازم تلحقيها ومتعقديش في دنيا ظالمة كيما هادي . حلي الوحيد ولي كاين أصلا هو اني نزرب نتزوج ونخرج من هاد الدار حبيت ولا كرهت كون نبقا هنا راح يفيقو بيا . هزيت التلفون وعيطت لعليلو هز عليا قالي جوليا كيفاش حتى عيطيلي حسيتي بيا بلي توحشتك وخفت نعيطلك تكوبي عليا قتلوا علي مذابيا في اقرب وقت تجي نديرو عقد ونروحو من هنا راح يفيقو بيا . قالي علاه انتي مزالكي تشربي في هذاك الرهج . قتلوا ميهمكش فيا ادا باغي صح تتزوج بيا في يدك من هنا لغدوة تجي تهدر مع خالي بلي على شهر دير العرس ولا نفضح كلشي ونحكي كلشي من لول لخر فهمت ولالا قالي بصح خالك قالي لالا حتى يفوت عام قتلوا ميهمنيش فيك أنا عندك شهر تخرجني من هاد الدار ولا نقول كلشي وانت الخاسر أنا من بكري ما عندي ما نخسر حتى لي كنت خايفة نخسرهم خسرتهم وكملت قالي معليش أنا نجي نهدر معاه غدوة وأنتي ثاني اوقفي معايا قدامو متبقايش ساكتة كشغل أنا راني مسيف عليك كيما المرة لي فاتت . تفتح الباب دخل اصيل لقا التلفون في وذني بعدت التلفون من وذني سمعو قاعد عيط ألو الو جوليا راكي تسمعي فيا .شاف معايا شوفة منقدرش نوصفها شفتو أنا شحال من مرة راني نجرح في قلبو يعني متلوموهوش على الشي لي دارو ولا راح يديرو في المستقبل أنا تاع صح كسرتلو قلبو وكل مرة راني نثبتلو بلي أنا منستاهلش حبو . رمالي بواط تاع دوا قالي كي تكملي اشربي منو زوج حبات وارقدي . ودار خبط الباب وخرج . كوبيت على عليلو ورميت التلفون وباينة كملت الليلة بكا ونواح .
صباح كي وصلت التسعة بدلت حوايجي وهبطت لقيتهم متلمين على الفطور وكي عادت الجمعة كأنو كل قاعدين حكمت بلاصتي بسكات هزيت كاس تاع لحليب يدي عادت تترعد حتى ساح شوي طلعت راسي لقيتوا يشوف مع يدي ويثبت ، حطيت الكاس وهزيت الكرواسون ناكل . طبطب الباب ناض مسلم فتح سمعناه يهدر ويقول تفضل دخلو للصالون جيهة الرجال . وجا عدنا قالوا بابا علي خطيب جوليا جا قالي عندي هدرة معاكم . شافوا معايا كامل نطق خالي علابالك علاه جا وش من هدرة هادي غير الخير . قتلوا معلاباليش . وقف اصيل قالي معلابالكش ياك . وتبسم باستهزاء هز مافتحوا وجا خارج . لحقوه خالي ومسلم راحو عندو نسمعو في الهدرة بصح مسمعناش مليح الموضوع . كامل يسقسيو فيا وش كاين علاه جا حتى جاني مسلم قالي أرواحي كان يبان مشنف وحواجبنا مقرونين حتى كي هدر معايا ماشافش فيا . خرج لحقتو حتى وصلنا لصالة تاع الرجال دخلنا . لقيتهم قاعدين خالي وحيد وخالي الصغير ومسلم واصيل وعليلو . غير دخلت شافوا معايا أنا عينيا مركزين غير مع اصيل وجهوا سيف ميقصوش قالي عليلو وش حوالك جولي لباس ، مقدرتش نهدر درتلو غير براسي ايه .وسكتت قالي خالي صح جوليا تفاهمتي انتي وعلي تعقدو شهر الجاي ويهزك ديراكت بلا عرس بلا والوا راه يقولي للي واجد من كلشي وانتي مراكيش باغية لا عرس لا والوا . شفت مع اصيل لقيتوا يشوف فيا . سكتت مقدرتش نهدر قالي اهدري بنتي إذا راكم متفاهمين ربي يسهل منوقفش في طريقكم . تنهدت قتلوا ايه متفاهمين . قالي ربي يسهل . دورت ديراكت خرجت . لحقني مسلم قالي من اليوم ما راني خوك متعرفيني ما نعرفك .
